პოლიტოლოგ თამარ კიკნაძის შეფასებით, სანამ საქართველოში იარსებებს დესტრუქციული პოლიტიკური ძალა, ჯანსაღი პოლიტიკური პროცესები არ იქნება. მისი თქმით, ოპოზიციის მიზანია პროცესების რადიკალიზაცია, რაც დესტრუქციული გლობალისტური ძალების ინტერესში შედის და, რომლებიც რუსეთში საკმაოდ კარგად არიან ფეხმოკიდებულნი.

for.ge თამარ კიკნაძეს ესაუბრა.

ძალიან ხშირად, გიორგი რურუას სახელი ჩნდება ევროპელი და დასავლელი პოლიტიკოსების განცხადებებში, როგორც პოლიტიკური ლიდერი... პოლიტიკური პატიმარი და მოუწოდებენ ხელისუფლებას, რომ გაანთავისუფლონ იგი პატიმრობიდან. რამდენად კორექტულია მსგავსი მოწოდებები, როდესაც რურუას ბიოგრაფია მდიდარია უმძიმესი სისხლის სამართლის დანაშაულით? ეს მაშინ, როდესაც ანალოგიურ ბრალდებაზე დასავლეთის ქვეყნებში სასაჯელი არის უმძიმესი...

თამარ კიკნაძე: დავიწყოთ იქიდან, რომ პრეზიდენტის კეთილი ნება იყო უგულავა და ოქრუაშვილის შეწყალება, რათა საპარლამენტო არჩევნების წინ შეენარჩუნებინათ სიმშვიდე. მაგრამ ისინი პოლიტიკოსები იყვნენ, რურუა უფრო კულისებს მიღმა მოქმედი პერსონა და ჩვეულებრივი კრიმინალური ელემენტია. ჩემი აზრია, რომ არც ის ორი ადამიანი უნდა შეეწყალებინა პრეიდენტს, მაგრამ როგორც გითხარით, ეს იყო პოლიტიკური სტაბილურობის შენარჩუნების მიზნით გაკეთებული ქმედება.

დასავლური პოლიტიკის წარმოება ვინც იცის, კარგად იცის, რომ ლობიზმი არის ძალიან გავრცელებული. უამრავი ლობისტური კომპანია არსებობს, იმათი საშუალებით 9 წელი იყო „ნაციონალური მოძრაობა“ ხელისუფლებაში. მათ ძალიან კარგად აითვისეს ეს მექანიზმები და გარდა ამისა, „ნაციონალური მოძრაობა“ იყო გლობალისტური ძალების მიერ მხარდაჭერილი ძალა და დღესაც ასეა. რაც დღეს ხდება, ეს ნიშნავს, რომ არაფრად აგედებენ ქვეყნის სუვერენიტეტს, უაპელაციოდ ერევიან ქვეყნის სუვერენიტეტში და მოგვიწოდებენ პატიმრობიდან გავანთავისუფლოთ ეს კრიმინალები. შეიძლება, მათ არც კი იციან ვინ არის რურუა, ან რა წარსული აქვს და მერწუმენთ, რომ არც აინტერესებთ.

იმიტომ, რომ მათ თავიანთი ინტერესები აქვთ და ეს არის ფინანსები?

- რა თქმა უნდა, ამისთვის გასამრჯელოს იღებენ და ეს ხდება ოფიციალურად. იმიტომ, რომ ოფიციალურად არის დაშვებული ლობიზმის კანონი და გარდა ამისა ეს ძალები არაოფიციალურადაც შეკრული არიან ნაციონალებთან. ამიტომ ვამბობ, რომ სამართლებრივად არც უგულავა და ოქრუაშვილი არ უნდა გამოეშვათ. მათი განთავისუფლებით, მით უმეტეს მოახლეობული არჩევნების წინ, „ქართულ ოცნებას“ რეიტინგი დააკლდა.

ეს გასაგებია, მაგრამ დანაშაულის სიმძიმის მხრივ, ალბათ, არ შეიძლება ერთ ჭრილში განვიხილოთ, ოქრუაშვილი-უგულავა და რურუა...

- ავიღოთ გიგი უგულავა, რომელიც თავისი სიტყვებით ამბობს, რომ 50 მილიონი აიღო, ეს არის პირდაპირი მტკიცებულება და უმძიმესი დანაშაული, რადგან საქმე გვაქვს კორუფციასთან. რაც შეეხება ოქრუაშვილის ქმედებას 20 ივნისს, აბა ერთი სხვა ქვეყანაში გაბედოს ვინმემ და ძალადობრივი გზით შეეცადოს პარლამენტში შევარდნას. ეს არის სახელმწიფოს წინააღმდეგ მიმართული უმძიმესი დანაშაული. მე ვფქირობ, რომ ამ ხელისუფლებამ ძალიან დიდი შეცდომა დაუშვა, როდესაც პოლიტიკურად არ შეფასდა „ნაციონალური მოძრაობის“ 9 წლიანი ეპოქა. დიახ, უნდა მისცემოდა პოლიტიკური შეფასება 2008 წლის რუსეთ-საქართველოს ომს და ომით გამოწვეულ შედეგებს; იმას, რომ მოსახლეობის ნახევარი ციხეში იყო; ადამიანებს აუპატიურებდნენ, კლავდნენ. დიახ, ეს ნამდვილად იყო დანაშაულებრივი რეჟიმი.

მაგრამ, ნახეთ, „ნაციონალური მოძრაობა“ აქეთ გადმოდის შეტევაზე. იქით შედავების პოლიტიკა აქვთ არჩეული, იმიტომ რომ ძალიან კარგად ფლობენ ამ ტექნოლოგიებს. გარდა ამისა არიან გავლენის აგენტები, მათ ხელშია მედია, რომელიც კარგად ფინანსდება და სწორედ რურუა იყო ერთ-ერთი დამფინანსებელი ტელეკომპანია „მთავარის“, რომელშიც მოღვაწეობენ გვარამია და გაბუნია, რომლებიც რუსულ-ქართული კონფლიქტის პირდაპირ პროვოცირებას ახდენენ. ამაზე ხმა უნდა აიმაღლოს როგორც ხალხმა, ასევე ხელისუფლებამ. სხვებს ეძახიან რუსეთის აგენტებს, ამ დროს თვითონ უკეთებენ პროვოცირებას, რომ რუსეთმა საქართველოში განაახლოს დესტრუქციული ქმედებები.

ამას მიზანმიმართულად აკეთებენ, რადგან ეს არის ხელისუფლების ოპონენტების პოლიტიკის ნაწილი, რომელიც ამავე დროს, არის რუსეთის ინტერესებში?

- რა თქმა უნდა, ეს არის ძალიან დესტუქციული გლობალისტური ძალების ინტერესში, რომლებიც რუსეთში კარგად არიან ფეხმოკიდებულები. ამას ქვეყნის მტრობის მეტს ვერაფერს დავარქმევ. ნახეთ, რა კარგად ინიღბებიან? - აგინებენ პუტინს და სინამდვილეში იმათ საქმეს აკეთებენ, ისევე, როგორც 2008 წლის ომი იყო რუსეთის სასარგებლოდ განხორციელებული ქმედება. პოლიტიკა იზომება მხოლოდ შედეგებით და შედეგები საქართველოსთვის იყო ძალიან მძიმე. ანუ, ეს ჟორიკა არა მარტო კრიმინალია იმ თავისი განხორციელებული ქმედებებით, არამედ ხელის შემწყობია ანტიქართული, ანტისახელმწიფოებრივი საქმის კეთების და ეს კარგად ჩანს „მთავარი“ არხის პოლიტიკურ გადაცემებში, მოწოდებში და გვარამია-გაბუნიას საქმიანობაში.

რურუა, როგორ პოლიტიკური ლიდერი, მედია მფლობელი და „პოლიტპატიმარი“ - ამ რეალობის შენარჩუნება სჭირდება ოპოზიციას იგივე საერთაშორისო არენაზე? რურუას პოლიტპატიმრობის ისტორია ქვეყნის შიგნით გაყიდვადი არ არის...

- რურუას, როგორც პოლიტიკურ ლიდერს არავინ არ იცნობს. მისი ფიზიონომია პირველად სასამართლო დარბაზიდან ვნახე. როდესაც „ნაციონალებს“ ვიღაცა კრიმინალის გათეთრება უნდათ, ეგერევე პოლიტიკურ მანტიას შემოასხამენ ხოლმე. რატომ? - იმიტომ, რომ სამწუხაროდ, დღეს დასავლური დესტუქციული ძალების მხარდაჭერით პოლიტიკა გახდა ინდულიგენცია ბევრი ადამიანისთვის, რომლებიც რეალობაში არიან კრიმინალები და ამაშია ყველაზე დიდი პრობლემა.

პატიმარი რურუა უფრო სჭირდება ოპოზიციას, თუ თავისუფლებაში მყოფი რურუა?

- ყოველთვის ვამბობ, რომ ეს ოპოზიცია არის დესტრუქციული ძალა. საარჩევნო კანონთან დაკავშირებით შეთანხმება მიღწეული იყო იმიტომ, რომ მთელი ეს პროცესი ჩვენი პარტნიორი ქვეყნების ჩარევით და ელჩების მონაწილეობით ხორციელდებოდა. ოპოზიციას უკან დასახევი გზა აღარ ჰქონდა, რადგან მოლაპარაკებები ელჩების შუამდგომლობით მოხდა. მაგრამ ამ ოპოზიციას ეს არ აინტერესებს, მათ დესტუქციული ქმედებების გაგრძელება უნდათ. არ აწყობთ არჩევნები, რადგან ოპოზიცია ვერ მიიღებს იმდენ ხმას, რამდენიც მათ უნდათ, ვინაიდან დისკრედიტირებულები არიან. ამიტომ მათ აწყობთ პროცესების დაძაბვა. უნდათ, რომ მუდმივად ჰქონდეთ საფუძველი და მიზეზი იმისთვის, რომ ქვეყანაში იყოს მუდმივი არაკონსენსუსური პოლიტიკური კულტურა. ამიტომ ვამბობ, რომ თავიდანვე უნდა მომხდარიყო მათი პოლიტიკური შეფასება. სანამ საქართველოში იარსებებს ეს დესტრუქციული პოლიტიკური ძალა, ჯანსაღი პოლიტიკური პროცესები არ იქნება. ამიტომაც არის, რომ რურუა უცებ გახდა პოლიტიკოსი, უცებ გაპიარდა მისი ფიგურა. ეს იმისთვის სჭირდებათ, რომ არჩევნებში მათი წარუმატებლობა დაბრალებული იქნას ხელისუფლებაზე, რომ პატიმრობაში დატოვა „პოლიტპატიმარი“ რურუა.

დესტუქციული ოპოზიცია რამდენად შეძლებს პროცესების ესკალაციას? ვაკვირდებით რა პროცესები დაიწყო „მთავარმა“ რუსეთის მიმართულებით, შესაძლებელია, პროცესების იმ კონდიციამდე მიყვანა, რომ ახალი კონფლიქტის წინაშე აღმოვჩნდეთ რუსეთთან?

- რუსეთი არის ატომური ქვეყანა და შენ აქედან დედას აგინებ მის პრეზიდენტს. ეს ისეთი ანომალიაა, რომ ხელისუფლებამ ამაზე სათანადო ზომები უნდა მიიღოს. ეს არა მარტო იმ ქვეყნის პრეზიდენტის შეურაცხყოფაა, არამედ ეს არ ჯდება ქართველი ადამიანის მენტალიტეტში. ჩვენ კარგად ვიცით ვაჟა ფშაველას და სხვა კლასიკოსების ნაშრომები, სადაც მტერსაც პატივისცემა უნდა რადგან ეს შენი პატივისცემაა, პირველ რიგში. რაც მთავარია, ეს არის ძალიან კარგად შენიღბული პიარაქცია. ვითომ პატრიოტები არიან, ეს ბევრზე მოქმედებს, რადგან პოლიტიკური განათლება მოსახლეობის გარკვეულ ფენებში არ არის ისეთი მაღალი, როგორც საჭიროა და ემოციები სჭარბობს პრაგმატულ პოლიტიკურ ქმედებებს.

ნაციონალები არიან დამნაშავეები და ახლა ხელმეორედ ცდილობენ ახალი კონფლიქტის პროვოცირება მოახდინონ რუსეთთან. სამწუხაროდ, იცით რაშია საქმე? - ესენი არიან იმ გლობალისტური ძალების წარმომადგენლები, რომლებიც ყველა ქვეყანაში არიან დღეს. მაგალითად, ეს ძალები იგივე პრობლემებს უქმნიან ტრამპს ამერიკაში. ამიტომ, სრულიად შესაძლებელია, რომ დასაყრდენი ჰპოვონ რუსეთში და რუსეთმა თავისი დესტრქციული ქმედებები განახორციელოს სწორედ ამ ეგიდით, რომ ვიღაცა ორი ჟურნალისტი ასე იქცევა, რაც არის ამაზრზენი. რასაც გაბუნია და გვარამია აკეთებენ, ეს არ არის არც ქართველობა, არც ადამიანობა, არ ვიცი, რა დავარქვა ამას. სამწუხაროდ, ორკესტრირებულად მოქმედებენ და ვიღაცის შეკვეთას ასრულებენ.

ფაქტია, რომ ხელისუფლების განებივრებულია ოპოზიცია და ხშირად, არაადეკვატურად ბევრს თმობს...

- ძალიან ხშირად მახსენდება რუზველტის სიტყვები - „სუსტი სახელმწიფო განუხრელად იმის წინაპირობაა, რომ ავტორიტარიზმი ჩამოყალიბდეს“. არ შეიძლება სისუსტე გარკვეულ ნაწილში, მით უმეტეს „ნაციონალურ მოძრაობასთან“. ამიტომ ვლაპარაკობ, რომ პოლიტიკური შეფასება უნდა მისცემოდა ამ ყველაფერს. ნაციონალები ფესვგადგმული არიან ძალოვან სტრუქტურებში, საელჩოებში, დასაყრდენი აქვთ ამ გლობალურ ძალებში და შესაძლებელია ხელისუფლება უფრთხილდება ამ რაღაცა ქმედებას, რომ არ მიიღოს უფრო დიდი უსიამოვნება.

ძალიან დიდი მნიშვნელობა აქვს გლობალურად როგორ განვითარდება მოვლენები, რომ ჩვენს ხელისუფლებას გაეხსნას ხელ-ფეხი თავისუფალი ქმედებისთვის. ალბათ, ხალხის აქტიურობაც არის საჭირო, მაგრამ ეს ხალხი დაიღალა ამდენი პოლიტიკისგან, სამოქალაქო საზოგადოებაც დისკრედიტირებულია და არა მხოლოდ ჩვენთან. ასევე, ყველაზე გავლენიანი და ამ გლობალისტების მიერ მხარდაჭერილი, უხვად დაფინანსებული არასამთავრო ორგანიზაციები, რომლებიც ნამდვილად არ არიან ქართული ძალა, ისინი არ იღწვიან ქართული სახელმწიფოს სიძლიერისთვის.