ნაციონალური მოძრაობა ახალ ხელისუფლებას წერტილოვან დარტყმებს აყენებს ხან ევროპიდან, ხანაც ამერიკიდან. ამჯერად სააკაშვილის ძველი მეგობრები გამოჩნდნენ სცენაზე. ამერიკელი სენატორები საქართველოს პრემიერ-მინისტრ ბიძინა ივანიშვილს ღია წერილით მოუწოდებენ, დაუმტკიცოს მსოფლიოს, რომ „საქართველო სასამართლოს მიხეილ სააკაშვილის მთავრობის წევრებთან პოლიტიკური ანგარიშსწორების მიზნით არ იყენებდა“.

„ჩვენ ღრმად შეშფოთებულები ვართ დაკავებებით, გამოძიებებით, დაპატიმრებებით და ოპოზიციის წარმომადგენლების პოლიტიკური დევნის შესახებ გავრცელებული ხმებით. დღეს ჩვენ ვწერთ მზარდი შეშფოთებით იმის ალბათობაზე, რომ ეს ქმედებები შესაძლოა, იყოს პოლიტიკურად მოტივირებული და არჩევნების შემდგომ პერიოდში ქულების დასაწერად მიმართული. ჩვენ მოგიწოდებთ, რომ თქვენმა ადმინისტრაციამ გააკეთოს ყველაფერი იმისათვის, რათა არიდებული იყოს აღქმაც კი იმისა, რომ ყოფილი ხელისუფლების წევრების მიმართ შერჩევითი სამართალი გამოიყენება...ჩვენ მივესალმებით თქვენ სიტყვებს, რომელიც გამორიცხავს შერჩევით სამართალს, თუმცა ჩვენ მწუხარებით აღვნიშნავთ, ბოლო დროს განვითარებული მოვლენებით ღრმა შეშფოთებას. განსაკუთრებით შემაშფოთებელი იყო თქვენი საგარეო საქმეთა მინისტრის, მაია ფანჯიკიძის კომენტარები იმის თაობაზე, რომ საქართველოს ყოფილი მაღალჩინოსნები „კრიმინალები და დამნაშავეები“ არიან. დანაშაული და უდანაშაულობა უნდა განისაზღვროს მიუკერძოებელი სასამართლოს მიერ და საპირისპირო ძირს უთხრის კანონის უზენაესობას. წლევანდელი საპარლამენტო არჩევნები ეჭვგარეშე იყო გამყოფი, თუმცა საარჩევნო კამპანია დასრულდა“, - წერენ სენატორები ჯინ შეინი, ჯო ლიბერმენი, ჯეიმს რიში, ლინდსი გრეჰემი და ჯონ მაკკეინი თავიანთ წერილში, რომელიც 6 დეკემბერს გამოცემა Foreign Policy-ში გამოაქვეყნეს.

გამოცემის ინფორმაციით, გასული რამდენიმე კვირის განმავლობაში, მას შემდეგ, რაც პარტია „ქართულმა ოცნებამ“ მილიარდერ ივანიშვილის ლიდერობით გაიმარჯვა საპარლამენტო არჩევნებში, მაღალი რანგის ამერიკელი და ევროპელი ოფიციალური პირები გამოთქვამდნენ თავიანთ შეშფოთებას იმის თაობაზე, რომ წინა ხელისუფლების 23 ოფიციალური პირის მიმართ სამართლებრივი დევნა, მათ შორის კორუფციისა და წამების ბარლდებებით, პოლიტიკურად მოტივირებული იყო.

სენატორების წერილს რამდენიმე დღესი მოჰყვა აშშ-ს სახელმწიფო მდივნის მეორე მოადგილის ტომას მელიას საქართველოში ვიზიტი, რომელიც სავარაუდოდ, საკუთარი თვალით დააკვირდება ქვეყანაში მიმდინარე პროცესებს. როდის დასრულდება შემოტევა საქართველოზე და როგორ დარწმუნდება დასავლეთი, რასთან გვაქვს საქმე, პოლიტიკურ თუ სამართლებრივ დევნასთან, ამ თემაზე ექსპერტი კახა კახიშვილი გვესაუბრება.

ბატონო კახა, თქვენი შეფასებით, რამდენად ობიექტური იყო  წერილი, რითაც ამერიკელმა სენატორებმა ბიძინა ივანიშვილს მიმართეს?

- ჩემი აზრით ბოლომდე ობიექტური წერილი არ იყო, მაგრამ ეს წერილი იყო, რომელიც მიწოდებული ინფორმაციის საფუძველზე გაკეთდა. ისევ და ისევ ტექნოლოგიურად ნაცმოძრაობა უფრო კარგად ახერხებს კომუნიკაციას საერთაშორისო ორგანიზაციების წარმომადგენლებთანაც და სენატორებთანაც ვიდრე „ქართული ოცნება“. თუმცა ამას თავისი ახსნა აქვს, რომელიც რაღაც ლოგიკას ექვემდებარება.

ნაცმოძრაობას 15-წლიანი კონტაქტები აქვს რომელიც მეგობრულ კონტაქტებში გადაიზარდა ბევრად სხვას მიშნავს, ვიდრე ახალი ძალისთვის ახლა დაწყებული ურთიერთობები. ამას ემატება ძლიერი ლობისტური ჯგუფები, რომლებიც ნაცმოძრაობაზე მუშაობენ.

ნახეთ, როგორი ციკლი იკვრება: ლობისტების მიწოდებული ინფორმაცია იმ კუთხით, რა კუთხითაც სურს ნაციონალურ მოძრაობას, ინფორმაციას ადასტურებენ ელჩებიც (ზოგიერთი ელჩი), ამას ემატება ნაციონალური მოძრაობის მიერ მართული არასამთავრობო ორგანიზაციებისგან მიწოდებული ინფორმაცია. როდესაც თავს იყრის სხვადასხვა წყაროს მიერ მიწოდებული იდენტური ინფორმაცია, ასეთ დასკვნებს აკეთებენ.

წერილის ერთ-ერთი ავტორი ცნობილი მაკკეინიც არის...

- როდესაც მაკკეინზეა ლაპარაკი, ვიცით, არც დაუმალავს, მას და სააკაშვილს მეგობრული დამოკიდებულება რომ აკავშირებთ. გარდა ამისა, მაკკეინთან დაახლოებულ ადამიანებს აშშ-ში საკმაოდ ძლიერი ლობისტური კომპანია აქვთ შექმნილი. ეს კომპანია მაკკეინის პარტიის წევრი კონგრესმენების მიერ არის დაფუძნებული და სხვათა შორის, მაკკეინს ობამამ უჩივლა კიდეც წინასაარჩევნო პერიოდში აშშ-ს პროკურატურაში ამ ლობისტური კომპანიის გამო, რომელიც რუს ოლიგარქებს ლობირებდა ამერიკის კონგრესში.

ამ წერილში მოყვანილია ციტატა მაია ფანჯიკიძის ინტერვიუდან, სადაც საგარეო საქმეთა მინისტრი ამბობს, რომ საქართველოს ყოფილი ხელისუფლების ჩინოვნიკები კრიმინალები და დამნაშავეები არიან. სენატორების წერილში ნათქვამია, რომ დანაშაული და უდანაშაულობა მიუკერძოებელმა სასამართლომ უნდა დაადგინოს, რაშიც ვერ შევედავებით. იყო თუ არა შეცდომა მაია ფანჯიკიძის მხრიდან ასეთი ფრაზა, იმის მიუხედავად, რომ ყოფილი ჩინოვნიკების კრიმინალობის შესახე ეჭვები ლამის მთელ საქართველოს გააჩნია?

- ვთვლი რომ ეს შეცდომა იყო, მაგრამ ნაციონალურმა მოძრაობამ ძალიან კარგად იცის რა ფრაზები აღიზიანებს უცხოელებს და სწორედ ასეთ ფრაზებს აწვდიან ხოლმე ჩვენს პარტნიორებს. თუმცა ჩვენმა თანამდებობის პირებმა უნდა დაიმახსოვრონ,  ვიდრე რაიმე სიტყვას იტყვიან, აუცილებლად უნდა დაფიქრდნენ, რა შეიძლება მოჰყვეს ამ სიტყვას. ვინაიდან კარგად ხედავენ, რომ საკმაოდ ყურადღებით აკვირდება დასავლეთი როგორც მათ მოქმედებებს,  ისე მათ ნათქვამს.

არა მხოლოდ მაია ფანჯიკიძეს, სხვა მაღალი თანამდებობის პირსაც არაერთხელ წამოსცდენია წინასწარ, რომელიმე ადამიანის წინასწარ დაკავების შესახებ ინფორმაცია. როდესაც ხედავენ, რომ ლუპით აკვირდებიან დასავლეთის ორგანიზაციები, ცოტა კორექტულები უნდა იყვნენ.

ერთის მხრივ მესმის, რომ სამწუხაროდ, დასავლეთი „ვერ ხედავდა“ ვერც პოლიტიკურ და უკანონო დაკავებებს, ვერც მკვლელობებს, რომელიცვ ხდებოდა სამართალდამცავების მიერ, მაგრამ, რეალობა ის არის, რომ „ვერ ხედავდა“ იმიტომ, რომ სააკაშვილი მათი პროდუქტი იყო.

ახლა ხომ ხედავენ, რომ სურთ, იმაზე ააგონ მთელი პიარი, რომ აქ მოვიდა ხელისუფლება, რომელმაც თავდაყირა დააყენა მთელი სამართალი. ამიტომ კორექტულები უნდა იყვნენ და თითოეული სიტყვა აწონ-დაწონონ. ისინი უკვე აღარ არიან ოპოზიციონრები, რომელთა სიტყვასაც არც თუ დიდი წონა ჰქონდა დასავლეთში. ახლა ისინი ქვეყნის ხელისუფლებაში არიან და მეტი პასუხისმგებლობა მართებთ.

პრინციპში, ამ წერილის ფორმა იყო  გამაღიზიანებელი - ის Foreign Policy-ში გამოქვეყნდა, თორემ რაზეც სენატორები ლაპარაკობენ, რომ არც ერთმა გამოძიებამ არ უნდა გააჩინოს პოლიტიკური დევნის ეჭვიც კი, ამას იზიარებს თავად ხელისუფლებაც და საზოგადოებაც. ქართულ საზოგადოებასაც არანაკლებ აინტერესებს ის მტკიცებულებები, რომლითაც ამ ადამიანებისათვის ბრალეულობის დადასტურება მოხდება...

- არაერთხელ გვისაუბრია, რომ 8 წლის მანძილზე გამოძიება იყო ნულის ტოლი, მტკიცებულება რა იყო, ისიც კი არავის აინტერესებდა. ერთი ადამიანის სურვილი საკმარისი იყო, ვინმეს დასაჭერად ან ქონების წასართმევად, ეს მიდგომა უნდა შეიცვალოს ყველას მიმართ, როგორც ძველი, ჩინოვნიკების, ისე მთელი სისტემის მიმართ.

იმისთვის, რომ საქმეზე დადგეს გამამტყუნებელი განაჩენი, ეს არ უნდა იყოს დამოკიდებული ვინმეს სურვილსა და განწყობაზე. უტყუარ, გადამოწმებულ მტკიცებულებებზეა ლაპარაკი, ვგულისხმობ არა ერთ კონკრეტულ მტკიცებულებას არამედს მთელ ბაზას. ეს არის მოთხოვნა საზოგადოების ახალი პროკურატურისადმი (თუმცა კი ისევ ძველი კადრებით) რომ კანონის უზენაესობა იყოს.

დღეს თუ ჩვენ ავყევით ეიფორიას, რომ „რა კარგია, ჩინოვნიკებს იჭერენ, არ მაინტერესებს რა ფასად“, ასე იყო მაშინაც, როცა შევარდნაძის ჩინოვნიკებს იჭერდნენ და საზოგადოებას უხაროდა.

როცა მორჩნენ მათ დაჭერას და ქონების ჩამორთმევას, შემდეგ თითოეული ჩვენგანის კარს დააკაკუნეს. ამისი პრევენცია რომ მოხდეს, დღესვე უნდა იყოს მოთხოვნა საზოგადოების მხრიდან, რომ პროკურატურამ უნდა დაასაბუთოს  თითოეული ბრალდება.

წინასწარ მაქვს განცდა, რომ ეს სასამართლო იმ პოლიტიკური გუნდის სურვილისამებრ, ვგულისხმობ ნაციონალურ მოძრაობას, აპირებს ძალიან ბევრ საქმეზე, მათ შორის ძველი თანამდებობის პირების საქმეებზე, არსებითი განხილვის დროს გამოიტანოს გამამართლებელი განაჩენი, რითაც კიდევ ერთხელ მოახდენს  პროკურატურის სერიოზულ დისკრედიტაციას. შესაბამისად - ახალი ხელისუფლების დიკრედიტაციას დასავლეთში.

მერე ნახეთ, ნაცმოძრაობის პიარკამპანია დასავლეთში - ხომ გეუბნებოდით, რომ ესენი ხალხს იჭერენ პოლიტიკური ნიშნით და არა მტკიცებულებებით! მოხდება აღრიცხვა სასამართლოებმა რამდენი გამამართლებელი განაჩენი გამოიტანეს, მიუხედავად იმისა, რომ პროკურატურა ედავებოდა. და ეს იქნება კიდევ ერთი მცდელობა, უჩვენონ დასავლეთს, როგორი მონსტრი ხელისუფლება მოვიდა საქართველოში.

ყველაფერს რომ თავი დავანებოთ საზოგადოების მოთხოვნა და ეს პრინციპები არის გასათვალისწინებელი იმისთვის, რომ პროკურატურა ძალიან კარგად მოემზადოს, ვიდრე ნებისმიერ თანამდებობის პირს მისცემს პასუხისგებაში.

დღეს უკვე მხოლოდ მოწმის ჩვენებაზე ადამიანს პასუხისგებაში ვერ მისცემ. მითუმეტეს, როდესაც მოწმეს შეუძლია ჩვენება გადათქვას. ის, რაც ეპატიებოდა ადეიშვილს, იმიტომ, რომ სხვა გამოსავალი არ იყო - მოწმე როდესაც ჩვენებას გადათქვამდა იმასაც იჭერდნენ - დღეს ეს აღარ გამოვა...

ეს იქნება კაგი ლაკმუსი იმისათვის, რომ ერთხელ და სამუდამოდ შეწყდეს საუბარი, რომ თითქოსდა საქართველოში არის პოლიტიკურად მოტივირებული დევნა. შეცდომები იყო დაშვებული და, დარწმუნებული ვარ, ესეც მიიტანეს აშშ-ს სენატორებთან და სხვა ორგანიზაციებთანაც. მაგალითად, გუნავას, კალანდაძის საქმეებზე, დღესაც ვერ ხსნის გამოძიება, რასთან გვაქვს საქმე.

თქვენ თქვით, რომ სასამართლო ძალიან ბევრ გაგამართლებელ განაჩენს გამოიტანს, სენატორები ამბობენ, რომ ბიძინა ივანიშვილი საქართველოს სასამართლოს სააკაშვილის ჩინოვნიკების წინააღმდეგ იყენებს. სენატორებს გონიათ, რომ სასამართლო და იუსტიციის საბჭო ახალმა ხელისუფლებამ დააკომპლექტა?

- როდესაც დღეს მაკკეინი და სხვა გავლენიანი სენატორები ასეთ წერილს აწერენ ხელს, როგორც მინიმუმ, უნდა შეესწავლათ, რომ სასამართლო არ არის ბიძინა ივანიშვილის. ის დღესაც მიხეილ სააკაშვილის სასამართლოა და როგორც ჩანს, ინფორმაცია ზედაპირულად არის მიწოდებული, ისე აქვთ ხელი მოწერილი, რომ ბოლომდე სიტუაციაში არ არის გარკვეული ის ხალხი, ვინც ამ წერილს ხელს აწერს. ყველაფერს რომ თავი დავანებოთ, სასამართლოს რომ კუბლაშვილის მეშვეობით დღესაც სააკაშვილი აკონტროლებს, ეს ზუსტადაც არავისთვის არ არის ახალი.

მარტივია ამის გაშიფვრა - ის მოსამართლეები, რომლებიც ვერ ბედავდნენ ერთხელ მაინც შეეცვალათ პროკურატურის შუამდგომლობა აღმკვეთი ღონისძიების მოთხოვნაზე, დღეს ვხედავთ, რომ განსაკუთრებით მძიმე დანაშაულის გამო ჩადენილი ბრალდებულებისთვის პროკურატურის მოთხოვნას არ ითვალისწინებენ და უფრო მსუბუქ აღმკვეთ ღონისძიებას უფარდებენ გირაოს ღონისძიებით, თანაც სახელმწიფოს თანხებით. ცოტა უფრო ღრმად რომ ჩაეხედათ სენატორებს, სხვა პრობლემებს ნახავდნენ.

აშშ-ს სახელმწიფო დეპარტამენტის მეორე მოდგილის, ტომას მელიას ვიზიტი მორიგი შეშფოთების დადასტურება ხომ არ არის - ჩამოვიდა, რომ საკუთარი თვალით იხილოს რა ხდება?

- ყველაფერი, რაც ხდება, ერთი დიდი კამპანიის ნაწილია. არაერთხელ გვითქვამს, რომ ნაციონალებს პოლიტიკური დევნილის სტატუსი სჭირდებათ. მათ მოახერხეს და არჩევნების აღიარებით დემოკრატიის გვირგვინი მოირგეს. ახლა დევნილი ოპოზიციის სტატუსიც სჭირდებათ იმისათვის, რომ მხარდაჭერა გაეზარდოთ უცხოეთისგან. უცხოეთიდან უფრო მეტი კონტროლი განხორციელდეს ივანიშვილის მთავრობაზე.

ამავდრულად, ახალაიას გამოჩენა და „დამიჭირე-დამიჭირეს“ ძახილი იყო იმ გეგმის ნაწილი, შემდგომში ვანო მერაბიშვილის მხრიდან იმ პასპორტის მიწოდება, ამ კამპანიის ნაწილია - მესაზღვრეებს რომ გაეჩერებინათ და ვიღაცას მისი დაკავების გადაწყვეტილება მიეღო, კიდევ ერთხელ აგორდებოდა თემა, რომ პრეზიდენტის ვიზიტიც კი ჩაშალა ბიძინა ივანიშვილმა აბსურდული მოტივით.

ეს არის ერთი ძლიერი ლობისტური კომპანიის კონსულტანტების გეგმა, რომელსაც ნაცმოძრაობა ახორციელებს.

ზუსტადაც არ არის ცუდი, რომ თავად მელია ჩამოვიდა საქართველოში. რაც უფრო მეტი ადამიანი ჩამოვა და გაეცნობა, რეალურად სურათს, რაც უფრო მეტი ადამიანი გაესაუბრება რეალურ არასამთავრობო ორგანიზაციებს, რომლებიც დამოუკიდებლობის რეჟიმს სააკაშვილის მმართრველობის პერიოდშიც კი ინარჩუნებდნენ, უფრო უკეთესი იქნება.

ასე რომ, ვურჩევდი, ყველა დაინტერესებულ მხარეს, სტრატეგიულ პარტნიორებს, მოკავშირეებს, მანამ, სანამ წერილზე ხელს მოაწერენ, მითუმეტეს იმ წერილზე, სადაც შინაარსი და მდგომარეობა ნამდვილად არ ემთხვევა ერთმანეთს, უკეთესი იქნება გადაამოწმონ ყველა ის ინფორმაცია, რომელიც მათთან იყრის თავს.

ამისი მაგალითიც არსებობს - 26 მაისი რომ გათენდა, იმდენი დადებითი ინფორმაცია იყო გასული ზოგიერთი არასამთავრობო ორგანიზაციის მხრიდან, ევროსაბჭოს სტრუქტურებში, თითქოს ყველაფერი კანმონიერების ფარგლებში მოხდა. მერე უცხოელებს ამ საკითხთან მიბრუნებაც კი არ სურდათ. შემდეგ უკვე სხვა არასამთავრობო ორგანიზაციების აქტიურობის შედეგად გაირკვა აქ რა ხდებოდა და კიდევ იმ ფოტოგრაფების გმირული სურათების წყალობით რომელიც გადაიღეს, თორემ 26-ში ისე მოალამაზეს ყველაფერი!... ყველა არასამთავრობო, რომელიც მათი მართულია, აგზავნიდა დასკვნებს, რომ სააკაშვილი კანონიერად მოიქცა.

იუსტიციის მინისტრმა გააკეთა განცხადება, რომ გიგა ბოკერია კოჰაბიტაციის სანაცვლოდ პატიმრების გათავისუფლებას და გარკვეული საქმეების თაროზე შემოდებას გვთავაზობსო. მანამდე ბიძინა ივანიშ -პოლტიკური ვაჭრობა? ქურდული გარიგება? ისეთი შთაბეჭდილება რჩება, მტრული ბანაკები ერთმანეთს ნოტას რომ უგზავნიან და ულტიმატუმებს უყენებენ...

- ეს არის პოლიტიკური ვაჭრობა, გარიგება, ჩვენში ჯერ კიდევ არის შემორჩენილი, როდესაც პოლიტიკოსები ხალხის ზურგს უკან რაღაცაზე კონსულტაციას მართავენ. ეს იგრძნობა კიდეც, როდესაც ზოგიერთი გადაწყვეტილება კონსულტაციის შედეგად არის მიღებული. იგივე გენშტაბის უფროსის დანიშვნა, ელჩების დანიშვნაზე მიდის საუბარი რაღაცის სანაცვლოდ, რამდენადაც ვიცი, ცესკოს წევრების პროფესიული ნიშნით დანიშვნაზეც მოდის ვაჭრობა. ასეთი კოსულტაციები იმართება...

თუმცა ამ შეთავაზებებზე საჯაროდ დაიწყო ლაპარაკი, ასეთი მოლაპარაკებები როგორც წესი, კულისებში ხდება-ხოლმე, არასაჯაროდ. რაკი ხმამაღლა დაიწყო ლაპარაკი, როგორ ფიქრობთ დასავლეთი ამაზეც გამოხატავს რეაქციას?

- ამაზე საუბარი ვერც უნდა გაბედოს ვინმემ, რომ გითხრას, გირგვლიანის, რობაქიძის და სხვა საქმეების გადახედვას თავი დაანებეთ რაღაცის სანაცვლოდო. მეორეა, რომ გააჩნია, დასავლეთს როგორ მიაწვდი.

ბოლო რამდენიმე წელია, დასავლეთში ბევრ რამეს ლობისტების გარეშე ვერ გააკეთებ. ეს არის ერთი დიდი პრობლემა მსოფლიო პოლიტიკაში და ამაზე საუბრობს მთელი მსოფლიო. სხვათა შორის, იგივე აშშ-ში საკმაოდ გამკაცრდა ლობისტური საქმიანობის მინიტორინგი. აღმოჩნდა რამდენიმე ფაქტი, სადაც პირდაპირ კორუფციული გარიგება იყო და არა ლობისტური საქმიანობა.

იგივე ევროპაში, ძალიან დიდი ხნის განმავლობაში აკრძალული იყო ლობისტური საქმიანობა, რადგან თვლიდნენ, რომ ეს არის კორუფციის ჭაობი პოლიტიკოსებისთვის. ასე რომ, ერთია, როცა რაღაცას განაცხადებ, მაგრამ მეორე - როგორ მიიტან უცხოელებამდე.

მე მგონია, რომ არის თემები, რაც აუცილებლად უნდა მივიდეს უცხოელებამდე, ოღონდ ისე, რომ საფუძველი და ამის მტკიცებულებები უნდა არსებობდეს. ალბათ ამაზე უკვე მუშაობენ.