საქართველოს საპარლამენტო დელეგაციამ 6-7 დეკემბერს  მონაწილეობა მიიღო გაეროსა და საპარლამენტო კავშირის IPU-ს ერთობლივ ღონისძიებაში. სესიაზე განხილული იყო მსოფლიოში არსებული კონფლიქტები, მათი გადაჭრის გზები და პარლამენტის როლი კონფლიქტების მოგვარების პროცესში. გაეროს ქალთა საბჭოში განსაკუთრებით აღინიშნა საქართველოს პარლამენტში ქალთა რაოდენობის ზრდა. საუბარი შეეხო ასევე ქალთა როლს კონფლიქტების მოგვარების კუთხით. დელეგაციის შემადგენლობაში შედიოდნენ პარლამენტის წევრები: ელისო ჩაფიძე, გიორგი ვოლსკი და პაატა ლეჟავა.

უკანასკნელ პერიოდში საქართველოს ახალი ხელისუფლების მიმართ ჩვენი ქვეყნის დასავლელი პარტნიორების მხრიდან გამოთქმულ კრიტიკულ შეფასებებს ქართული საზოგადოება „ნაციონალური მოძრაობის“ მიერ უცხოეთში „კარგ მუშაობას“ უკავშირებს, ხოლო „ქართულ ოცნებას“ საგარეო ურთიერთობებში პიარ-სტრატეგიას უწუნებენ. ამიტომ, თითოეული ასეთი შეხვედრა, რომლის ფარგლებშიც მხარეებს შორის ინფორმაციის გაცვლა არის შესაძლებელი, ძალიან მნიშვნელოვანია და საზოგადოების ყურადღების არეალში ექცევა. შესაბამისად, For.ge გაეროში ქართული დელეგაციის ვიზიტის დეტალებით დაინტერესდა და ამის შესახებ დელეგაციის ხელმძღვანელს, პარლამენტის წევრს, ელისო ჩაფიძეს ვესაუბრეთ.

ელისო ჩაფიძე: „ეს იყო ახალი მოწვევის პარლამენტის საპარლამენტო დელეგაციის პირველი ვიზიტი გაეროში. ვიზიტი საინტერესო იყო იმით, რომ ჩვენ მიგვიწვიეს პარლამენტების დელეგაციების საერთაშორისო შეკრებაზე, სადაც კენიის, ბურკინა-ფასოს და სიერა ლეონეს კონფლიქტები და მათთან დაკავშირებული საკითხები განიხილებოდა. მოწვეულები იყვნენ შესაბამისი ქვეყნების პარლამენტის თავმჯდომარეები. ძალიან მნიშვნელოვანი იყო ის, რომ საუბარი იყო კონფლიქტების მოწესრიგების საქმეში პარლამენტების როლზე, საუბარი იყო ძალიან ბევრი საერთაშორისო აქტისა და რეზოლუციის შესახებ, რომლებიც ამ კონფლიქტებთან და ზოგადად, მსოფლიოში არსებულ კონფლიქტებთან არის დაკავშირებული. განსაკუთრებით გამახვილდა ყურადღება იმაზე, თუ როგორია ამ ყველაფერში ქალების როლი. ქალთა ასოციაციის წარმომადგენლების მხრიდან აღინიშნა, რომ საქართველოს პარლამენტში ქალთა შემადგენლობის გაზრდა უდავოდ დადებითია.

გარდა ამისა, ვიმსჯელეთ ისეთ საკითხებზე, თუ როგორ უნდა მოხდეს იმ ადამიანების გასამართლება, რომლებსაც აქვთ პოლიტიკური თანამდებობა და ამავე დროს, კონფლიქტებში არიან დამნაშავეები, ანუ სხვადასხვა ტიპის კონფლიქტებს უკეთებენ პროვოცირებას. ჩემთვის ძალიან სასიამოვნო იყო ვყოფილიყავი იმ დელეგაციის ხელმძღვანელი, რომელშიც უმრავლესობის მხრიდან შედიოდა ბატონი გია ვოლსკი. მოგეხსენებათ, ბატონი გია საქართველოს პარლამენტის იმ კომისიის ხელმძღვანელია, რომელიც კონფლიქტების მოწესრიგების თემაზე იმუშავებს. ბატონ გიას დოპლომატიური მოღვაწეობის ხანგრძლივი სტაჟი გააჩნია, ცხრა წლის განმავლობაში ნიუ-იორკში გაეროს ოფისში მუშაობდა, ძალიან ბევრ გამოჩენილ დიპლომატთან ჰქონია შეხება და ძალიან კარგი კონტაქტები აქვს. ზოგადად, ასეთი დელეგაციები მიზნად ისახავს იმას, რომ სხვადასხვა ქვეყნის პარლამენტებს შორის ურთიერთობები დამყარდეს.

ჩვენთვის განსაკუთრებით მნიშვნელოვანი და სტრატეგიული საკითხია, რომ გაეროს არაღიარების რეზოლუციასთან დაკავშირებით სხვა ქვეყნის პარლამენტებმა ასამბლეების და რეზოლუციების მიღების დროს მხარი დაგვიჭირონ. ასევე მნიშვნელოვანია, სხვა ქვეყნებს ინფორმაცია მივაწოდოთ ჩვენს ქვეყანაში არსებული ვითარების შესახებ, არჩევნებთან დაკავშირებით, ასევე იმ კონფლიქტებთან დაკავშირებით, რომლებიც საქართველოს ტერიტორიაზე არსებობს და ამ ქვეყნების მხარდაჭერა მოვიპოვოთ.

ვიზიტის ფარგლებში შეხვედრა გვქონდა და გვმასპინძლობდა საქართველოს წარმომადგენლობა გაეროში, შევხვდით ქართველ დიპლომატებს და საგარეო გამოწვევებთან დაკავშირებით ვისაუბრეთ, რაც ძალიან მნიშვნელოვანია. საპარლამენტო უმცირესობის მხრიდან დელეგაციის წევრი გახლდათ ვანის მაჟორიტარი დეპუტატი, ბატონი პაატა ლეჟავა. მიმაჩნია, რომ ჩვენ დავარწმუნეთ საერთაშორისო საზოგადოება, რომ კოჰაბიტაცია ამ შემთხვევაში წარმატებით განხორციელდა და საკმაოდ ბევრ თემასთან დაკავშირებით საერთო ხედვები და ინტერესები გაგვაჩნია. ბუნებრივია, ჩვენ ძალიან ბევრს ვკამათობთ (ცივილიზებულ ფარგლებში), თუ რამდენად არიან ის ადამიანები პოლიტპატიმრები, რომლებიც საქართველოს პარლამენტმა აღიარა. ჩვენ ვფიქრობთ, რომ ეს ადამიანები პოლიტპატიმრები არიან და ამიტომ, მათი უფლებების დაცვაზე ვზრუნავთ, მაგრამ არის საერთო ინტერესები, რაც ქვეყნის საგარეო იმიჯის წარმოჩენას შეეხება.

ასევე ჩვენ საუბარი გვქონდა პალესტინასთან დაკავშირებულ რეზოლუციაზე, რაც უდავოდ მნიშვნელოვანია და საერთაშორისო საზოგადოებამ კარგად უნდა გაიგოს, რომ საქართველოს საგარეო უწყების მხრიდან ეს არის შუალედური გადაწყვეტილება. მოკლედ, მიმაჩნია, რომ ძალიან საინტერესო და წარმატებული გაცნობითი ხასიათის ვიზიტი გვქონდა.

გარდა იმისა, რაზეც თქვენ საუბრობთ, არის ასეთი ტიპის შეხვედრების არაოფიციალური მხარე, ანუ ე.წ. კულუარებიც. იყო თუ არა ამ ფორმატში ჩვენს უცხოელ პარტნიორებთან ინფორმაციის გაცვლა?

- სწორედ ასეთი გაცნობითი ხასიათის ვიზიტებს ძალიან დიდი მნიშვნელობა აქვს იმისთვის, რომ ყველას დავანახოთ, რამდენად ცივილიზებული, პროდასავლური და ამავე დროს, კოჰაბიტაციისათვის მზად მყოფია „ქართული ოცნება“ დღეს პარლამენტში. როდესაც გაერო, ან სხვა საერთაშორისო ორგანიზაციები ხედავენ იმას, რომ ჩვენც იმავე ენაზე ვსაუბრობთ, რომელზეც ისინი, რომ ჩვენთვის გასაგებია ის ტერმინოლოგია, რომ მთავარია ადამიანის უფლებები და პრიორიტეტი ადამიანს ენიჭება და ა.შ. ბუნებრივია, ეს გაცნობითი პროცესი მათი მხრიდან შესაბამისად იქნება შეფასებული. თუ დღევანდელ ეტაპზე გარკვეული ტიპის შენიშვნები მოდის იმისათვის, რომ ორივე მხარე თავშეკავებულობის ფარგლებში მოქმედებდეს, დარწმუნებული ვარ, რომ საქართველოს მიმართ ეს დამოკიდებულება რამდენიმე თვის შემდეგ შეიცვლება, ჯერ ერთი იმის გამო, რომ „ქართული ოცნება“ არ არის იმ ტიპის პოლიტიკური ძალა, რომელსაც შეიძლება ასე ესაუბრო (თუნდაც დიპლომატიურ ენაზე), ხოლო მეორე, იმის გამო, რომ ისინი დაინახავენ, რამდენად ჯანსაღი და საქართველოს ინტერესებზე მზრუნველი ძალა მოვიდა ხელისუფლებაში.

ეს მინიშნებები იმასთან დაკავშირებით, რომ არ მოხდეს წინა ხელისუფლების წარმომადგენლების დაკავება, ან მათ მიმართ ანგარიშსწორება, ჩემი აზრით, პრევეციულ ხასიათს ატარებს. სხვათაშორის, მე მახსოვს, რომ 2003 წელსაც იყო ასეთი რამ. მაგალითად, მაშინ რამდენიმე დიპლომატმა გამაფრთხილა, რომ თუკი ედუარდ შევარდნაძეს დააპატიმრებდნენ, ეს ჩვენსა და მათ ქვეყნებს შორის ურთიერთობების დაძაბვას გამოიწვევდა. მაშინ ცოტა არ იყოს გავმხიარულდი და ვიკითხე კიდეც, ხომ არ გგონიათ, რომ მე ან გენერალური პროკურორი, ან მიხეილ სააკაშვილი ვარ-მეთქი. ამით იმის თქმა მინდა, რომ ამგვარი მესიჯები ასეთ გარდამავალ პერიოდში ყოველთვის კეთდება. აქედან გამომდინარე, ამაში განსაკუთრებულს ვერაფერს ვხედავ. პირიქით, საერთაშორისო საზოგადოებას ვარდების რევოლუციის შედეგად მოსული ხელისუფლების მიმართაც ისეთივე ფხიზელი დამოკიდებულება რომ ჰქონოდა, როგორიც „ქართული ოცნების“ მიმართ გააჩნია, მიმაჩნია, ვარდების ხელისუფლებას ეს უფრო წაადგებოდა, რომ ადამიანის უფლებები აღარ დაერღვია და დღეს ჩვენ მათ მიმართ ნაკლები პრეტენზიები გვექნებოდა. ამდენად, ეს სრულიად ჯანსაღი პროცესია და არანაირად არ ვფიქრობ, რომ ამ მომენტმა ჩვენ უნდა გაგვაღიზიანოს.

თქვენ აღნიშნეთ, რომ ამ განცხადებებს ერთგვარი პრევენციული ხასიათი აქვს. თუ იყო ამგვარი მესიჯები თქვენი გაეროში ვიზიტის დროს და საერთოდ, თქვენი შეფასებით როგორი განწყობა აქვთ ჩვენს პარტნიორებს საქართველოში მიმდინარე პროცესების მიმართ?

- ამ ვიზიტის დროს საქართველოში მიმდინარე პროცესები არ განხილულა. როგორც მოგახსენეთ, საუბარი იყო უფრო მწვავე და ცხელ კონფლიქტებზე და მიმაჩნია, რომ დიდი ბედნიერებაა, რომ ჩვენ ასეთ სტადიაში მყოფი კონფლიქტები არ გვაქვს, პირიქით, ჩვენ მათი მოგვარება გვინდა. მსურდა, რომ შევხვედროდი რამდენიმე ისეთი ქვეყნის დელეგაციას, რომელსაც ჩვენი ქვეყნის მომავლისათვის დიდი მნიშვნელობა აქვს, თუმცა აღმოჩნდა, რომ ჩვენი მეზობელი ქვეყნების (მათ შორის რუსეთის) დელეგაციები ამ ასამბლეას არ ესწრებოდნენ. შესაბამისად, მათთან შეხვედრის შესაძლებლობა არ მოგვეცა. რაც შეეხება დასავლურ ორგანიზაციებს, ამ თემასთან დაკავშირებით არანაირი უარყოფითი მესიჯი მათგან არ მიგვიღია. მით უმეტეს, დღევანდელი სიტუაციითაც კი საქართველოს მიერ მიღებული გადაწყვეტილებების 75% გაეროში ამერიკის შეერთებული შტატების რეზოლუციების იდენტურია. აქედან გამომდინარე, ვფიქრობთ, რომ ჩვენი ხელისუფლების მიერ მიღებული ბოლო გადაწყვეტილებაც საქართველოს და ამერიკის შეერთებული შტატების ურთიერთობაზე უარყოფით გავლენას არ მოახდენს.