ინგრედიენტები

ბისკვიტი:

ფქვილი - 95 გ

გამაფხვიერებელი - 1 ს/კ

მარილი - 1/2 ს/კ

კვერცხი - 4 ცალი

შაქარი - 150 გ

ვანილის ექსტრაქტი - 1 ს/კ

მცენარეული ზეთი - 2 ს/კ

შიგთავსი (ჯემი)

მარწყვი - 300 გ ( პატარა ნაჭრები)

შაქარი - 50 გ

წყალი - 15 მლ

არაჟნის შიგთავსი

არაჟანი 20% - 300 გ

ვანილი - 1 შეკვრა

შაქრის პუდრა - 100 გ

მომზადების წესები

მარწყვის ჯემის (შიგთავსის) მომზადება.

პატარა ქვაბში მოათავსეთ მარწყვი, შაქარი და წყალი. მიიყვანეთ ადუღებამდე და ურიეთ ნელ-ნელა.  ეცადეთ კოვზის დახმარებით ერთიანი მასა მიიღოთ, ისეთი, როგორიც ჯემია. ადუღეთ , სანამ მასა არ გასქელდება,დაახლოებით 15-20 წუთი. გადმოდგით გაზქურიდან და გააციეთ.

ბისკვიტის მომზადება.

წინასწარ გაახურეთ ღუმელი 180 გრადუსზე. წაუსვით საცხობ ფორმას ( 30X40 სმ) კარაქი და გადააფარეთ პერგამენტის ფურცელი.

საშუალო ზომის ჯამში ჩაყარეთ ფქვილი,გამაფხვიერებელი და მარილი. დიდ ჯამში მოათავსეთ კვერცხი,შაქარი და ვანილის ექსტრაქტი. აურიეთ მიქსერით , სანამ ჰაეროვან მასას არ მიიღებთ. დაუმატეთ ზეთი და ფქვილის მასა. ბისკვიტის მასა მოათავსეთ საცხობ ფორმაში , გადაანაწილეთ კარგად.

გამოაცხვეთ 12-15 წუთი.

სუფთა ტილო მოათავსეთ მაგიდაზე,მოაყარეთ შაქრის პუდრა და ღუმლიდან გამოღებული თხელი ბისკვიტი დაადეთ ზემოდან.  სანამ ბისკვიტი ცხელია, გადაახვიეთ ტილოს დახმარებით.

არაჟნის შიგთავსი

არაჟანი მოათავსეთ მარლაში და გააჩერეთ მაცივარში მთელი ღამე. დილით არაჟანი დაგხვდებათ კარგად გაწურული და უფრო სქელი.

გადაიტანეთ არაჟანი ჭურჭელში და შემოდგით მეორე ჭურჭელზე, რომელშიც უნდა ჩაასხათ ყინულებიანი წყალი. შურიეთ არაჟანს შაქრის პუდრა და ვანილი და ათქვიფეთ მიქსერით 15-20 წუთი.

რულეტის მომზადება

გაასწორეთ ბისკვიტი და წაუსვით მარწყვისა და არაჟნის შიგთავსი. კვლავ გადაახვიეთ და შედეთ მაცივარში 1 საათით.