მთავრობამ ანტიკრიზისული გეგმა წარმოადგინა. როგორც პრემიერ-მინისტრმა გიორგი გახარიამ, გეგმის პრეზენტაციისას განაცხადა, კრიზისული მენეჯმენტისთვის ქვეყანა დახარჯავს 3 მილიარდ 500 ათას ლარს. 1 მილიარდ 35 მილიონი ლარი დაიხარჯება მოქალაქეების სოციალურ მხარდაჭერაზე, ეკონომიკასა და მეწარმეებზე - 2 მილიარდ 110 მილიონი ლარი. როგორც პრემიერმა განაცხადა, აღნიშნული გეგმა არ გულისხმობს პოსტკრიზისულ პერიოდის ეკონომიკის აღდგენას.

ეკონომიკის ექსპერტი დემურ გიორხელიძე for.ge-სთან ინტერვიუში აღნიშნული გეგმის შეფასებისას ამბობს, რომ გეგმა არსებულ გამოწვევებს ვერ პასუხობს და ხელისუფლება სულ მალე, უფრო დიდი პრობლემების წინაშე აღმოჩნდება.

დემურ გიორხელიძე: ეს არის გადარჩენის მოკლევადიანი გეგმა და შეიძლება ითქვას, რომ სულ არარაობას სჯობია. წარმოდგენილი გეგმა, არასწორი მიმართულებებით არის გაკეთებული. ერთადერთი, კარგი რაც არის, სოციალური დახმარებები იქნება 350 ათას კაცზე, მაგრამ ჩემთვის გაუგებარია რას ნიშნავს იმაზე ხაზგასმა, რომ დახმარება მიეცემა მათ, ვინც სამუშაო დაკარგა. ვისაც დაკარგული ჰქონდა და უმუშევარი იყო ის უნდა მოკვდეს შიმშილისგან? ამიტომ, გაუგებარი ბევრი რამ არის და ალბათ, ეს გეგმა კიდევ უფრო დაზუსტდება. კარგია, რომ სოფლის მეურნეობის სფერო ხდება ერთ-ერთი მნიშვნელოვანი, მაგრამ ბანკებზე მიბმა, რომ ბანკებს მისცემენ ფულს, ისინი გასცემენ სესხებს და ამით ქვეყანა წინ წავა, ეს არის სწორედ ის უბედურება, რისგანაც ვერ გამოერკვა დღემდე ჩვენი მთავრობის მეთაური და სამწუხაროდ, შედეგიც ძალიან რთული იქნება. ბანკები ამ წელს დაამთავრებენ ფანტასტიკური მოგებით, მაგრამ ეკონომიკა იქმება უმძიმეს მდგომარეობაში. ამიტომ, ჩემი შეფასება ასეთია, რომ, რა თქმა უნდა, ეს გეგმა „არაფერს“ სჯობს, მაგრამ საბოლოოდ, აქედან არაფერი არ გამოვა.

სოფლის მეურნეობის განვითარებაზე კი არის გეგმაში ლაპარაკიმ მაგრამ ხვნა-თესვა ცოტა დაგვიანებული ხომ არ არის?

- რა თქმა უნდა, ძალიან დაგვიანებულია. სოფლის მეურნეობას თავისი აგრარული ვადები აქვს და ამ პერიოდში მთავრობას სოფლის მეურნეობაზე სიტყვაც არ დასცდენია. მხოლოდ გუშინ მისცა ნებართვა გლეხებს, რომ მიწა დაემუშავებინათ. ამიტომ მე არ ვიცი რა იქნება. ისე გავა ეს გაზაფხულის პერიოდი და როგორც მოუხვნელია უამრავი მიწა, ისევე დარჩება. ეს რას ნიშნავს, ამაზე დასკვნები მკითხველს მივანდოთ.

უფრო კონკრეტულად, რა გამორჩა თავის გეგმაში მთავრობას, რაზე უნდა მოეხდინა ფოკუსირება?

- მე პრემიერის დღევანდელ გამოსვლაში ვერ დავინახე, რომ ის გრძნობდეს იმ საფრთხეებს, რაც დღეს მსოფლიოს ემუქრება. ერთადერთი ნეტარი ქვეყანა მხოლოდ საქართველოა. ჩვენი მთავრობა, რა თქმა უნდა, აქ ისეთ რამეს ვერ გააკეთებს, რასაც შეერთებული შტატები და მდიდარი ქვეყნები აკეთებენ, მაგრამ შენ გაქვს შენი პასუხისმგებლობა. პირველ რიგში, არა მხოლოდ ადამიანების და მოქმედი საწარმოების გადარჩენა, არამედ სტიმულის მიცემა, რომ დღეს ადგილზე შეიქმნას პროდუქცია. ამაზე ლაპარაკი არ ყოფილა. გადამამუშავებელ მრეწველობაზე განცხადებები არ ყოფილა. ის, რომ წადი ბანკში და ბანკი ფულს მოგცემს და თუ არ მოგცემს, თავში ქვა გიხლია, ეს ვერ არის კარგი მიდგომა. „აწარმოე საქართველოში“, რაზეც იყო ლაპარაკი, ეს არის პროპაგანდა, თითქოს რაიმე გავლენა ჰქონდეს ეკონომიკაზე, გარდა ერთი, ორი კარგი პროექტისა. ეს არის ის სქემა, რომელიც უვარგისია კრიზისულ პერიოდში და არანაირ დადებით შედეგს არ მოიტანს.

არსებული შეზღუდვები უკვე ადამიანების პროტესტს იწვევს, თუმცა ვერ უარვყოფთ, რომ სიტუაციის ნებაზე მიშვებაც მძიმე შედეგებს მოიტანს..

- მთელი მსოფლიო ელოდება საშინელებას. ბუნებრივია, ადამიანები შეშფოთებულები არიან. შეუძლებელია დააბოლო ადამიანები იმ არაფრისმაქნისი რეკლამებით, რომელიც ტელევიზიებით გადაიცემა. იმიტომ, რომ ადამიანებს ფული უთავდებათ და მთავრობა ამდენი ადამიანის გამოკვებას, უბრალოდ, ვერ შეძლებს. ამიტომ, რაღაცნაირად უნდა მიეცეთ ადამიანებს საშუალება, რომ საკუთარ თავებს მაინც მიხედონ. ეს შეზღუდვები ფაქტობრივად, ძალიან აფერხებს სოფლის მეურნეობას. ისეთი შთაბეჭდილება მრჩება, რომ ხელისუფლება ძალიან გაერთო ამ პროპაგანდით რაც გადის „იმედზე“. ეს შავი, ბოლშევიკური პროპაგანდა შეურაცხყოფს ადამიანებს. უნდა დავიცვათ დისტანცია, მაგრამ ბრიყვებივით არ უნდა ვიყოთ დარწმუნებული, რომ ვიღაცა ჩვენზე ზრუნავს, ეს ცუდია, როგორც ჩანს, ამ პროპაგანდაში არსებობს სხვა მიზნებიც.

რა მიზნებზე საუბრობთ უფრო კონკრეტულად რომ გვითხრათ?

- თუნდაც მარნეულის პროტესტი. არ არის საჭირო იმისი ხაზგასმა, რომ ისინი არიან ეთნიკური აზერბაიჯანელები, ესენი საქართველოს მოქალაქეები არიან და თუ მათ, დღეს ქართული ენა არ იციან და რაღაც პრობლემა აქვთ, ეს ქართველების ბრალია, ჩვენ არ ვუშვებთ მათ იმ საერთო ცხოვრებაში. მე არ მგონია, რომ იმდენად პარტიული იყვნენ მარნეულის მოქალაქეები, ასეთი მასშტაბის პროტესტი დაეგეგმათ და განეხორციელებინათ. თუმცა, პარტიული ორგანიზაციებიც ცხადია, თავისას ეცდებიან.

რატომ დააგვიანა ხელისუფლებამ, რატომ მიიყვანა სიტუაცია პროტესტამდე?

- ბევრ რამეზეა პრობლემა. ავკრძალეთ მანქანების მოძრაობა და მაინც უამრავი მანქანა მოძრაობს, ამაში რაიმე გონიერი არის? ისევ ნეპოტიზმი, ისევ ცუდი რეაქციები და ამას, რა თქმა უნდა, მოაქვს ნეგატიური განწყობები.

გასაგებია, რომ არსებული შეზღუდვები დისკომფორტს ქმნის თითოეული ადამიანებისთვის, მაგრამ ეს იმ სტატისტიკით და მოცემულობითაა გამოწვეული, რაც ჩვენთან ერთად მთელს მსოფლიოშია, არ მეთანხმებით?

- მე მინდა, რომ ვენდო ექიმებს. კარგია, რომ ექიმებმა თავიდანვე შეძლეს დაეკავებინათ თავისი ადგილი, ამაში ხელისუფლებასაც მადლობა ეკუთვნის, მაგრამ სხვადასხვა შეხედულებები არსებობს. მაგალითად, შვედები საერთოდ უგულებელყოფენ ყველანაირ შეზღუდვას და არ ვიცი, რა გამოვა. მაგრამ, მგონია, რომ შეზღუდვები სრულიად მისაღებია და არანაირი უკმაყოფილება არ შეიძლება იყოს, უბრალოდ ჩემთვის ძალიან გამაღიზიანებელია ის საზიზღარი ბოლშევიკური რეკლამა, რომელიც მთელი დღის განმავლობაში გადის ტელევიზიებით, ხელები დაიბანე, იჯექი სახლში და ასე შემდეგ, ეს არის შეურაცხმყოფელი.

საარჩევნო წელია და ხელისუფლების რეიტინგზე როგორ აისახება ეს ყველაფერი, წარმატებების პარალელურად არსებოს კიდევ გარკვეული ჩავარდნებიც...

- ძალიან მინდა, რომ ამ მძიმე მდგომარეობიდან მინიმალური ზარალით გამოვიდეთ. არც ერთი ხელისუფლება არ არის მარადიული. ამ ხელისუფლებას, გარკვეულ შემთხვევაში რეიტინგი უმაღლდება, მაგრამ ეს არის მოკლევადიანი. სიტუაცია მთელს მსოფლიოში იმაზე უარესია, ვიდრე ჩვენი ხელისუფლების განცხადებებიდან ჩანს. რა მოხდება, თუკი ევროპაში დაიწყება სოციალური ბუნტი? გაეროს ხელმძღვანელების მიერ გაფრთხილებულია მსოფლიო, რომ უზარმაზარი შიმშილია მოსალოდნელი, სად გაიქცევა მაშინ ხელისუფლება, ისევ პროპაგანდას განახორციელებს? „იმედი“ სად გაიქცევა? ამიტომ ყველაფერს პრაგმატულად უნდა დანახვა. საშიშროება მსოფლიოსთვისაა და საქართველოს ხელისუფლებისთვის არანაირი საფრთხე არ არის? ეს ილუზიაა, თუმცა საქართველოს ხელისუფლებები, ოცდაათი წელია, ყოველთვის ილუზიაში იყვნენ და რითი მთავრდებოდა ეს, ყველამ კარგად ვიცით.

ხელისუფლებას ამ შემთხვევაში შეუძლია ხელი მსოფლიო კრიზისისკენ გაიშვიროს...

- მსოფლიოში უდიდესი შესაძლებლობების ქვეყანაში, როგორიც შეერთებული შტატებია, 22-მა მილიონმა ადამიანმა სამუშაო დაკარგა. უდიდესი გამოცემები გადმოსცემენ იქაურ მძიმე სიტუაციას, ფაქტიურად დახლები ცარიელია, ეს ხდება უმდიდრეს ქვეყანაში. ამერიკის ხელისუფლებამ, ტრილიონობით დოლარი გაისროლა, რომ ეკონომიკა გადაარჩინოს. საქართველო არის უღარიბესი ქვეყანა, მოსახლეობას აქვს კვების პრობლემა და ის მიზერული ერთჯერადი დახმარების სახით გაცემული თანხები, სიცოცხლის შესანარჩუნებლად, საკმარისი არ არის. მსოფლიოს უდიდესი ქვეყნები სერიოზულად არიან მოსალოდნელი ეკონომიკური პრობლემებით შეშფოთებული და ერთადერთი არხეინი ქვეყანა, ქოცებად და ნაცებად დაყოფილი, რომლებიც ერთმანეთს შეურაცხყოფენ, თითქოს ერთი საფრთხე არ არსებობს, არის საქართველო. ეკონომიკა ისედაც მკვდარი იყო, ჩვენ იმპორტზე ვართ დამოკიდებული და უკვე აკრძალვაა დაწყებული კვების პროდუქტების ექსპორტისა, ანუ, ჩვენ ვერ განვახორციელებთ იმპორტს. ამიტომ, ხელისუფლებამ აქცენტი უნდა გააკეთოს შემდეგზე: პირველ რიგში, ყველაფერი უნდა გააკეთოს, რომ ერთი გოჯი მიწაც კი არ დაჩეს დაუმუშავებელი და გამოუყენებული. შიმშილი რომ დაიწყოს, ხელისუფლება ვერაფერს ვერ გააკეთებს, ეს ღარიბი ქვეყანაა. ამიტომ, ხელი უნდა შევუწყოთ იმათ, ვისაც შეუძლია რამე აკეთოს და შემოსავალი გაიჩინოს. უახლოესი წლები იქნება უმძიმესი.