რეგლამენტში ცვლილებების პროექტის თანახმად, ობიექტური გარემოებების არსებობისას, პარლამენტის თავმჯდომარის გადაწყვეტილებით, პარლამენტს კონსტიტუციითა და რეგლამენტით გათვალისწინებული უფლებამოსილებების განხორციელება დისტანციურად, სათანადო ელექტრონული საკომუნიკაციო საშუალებების გამოყენებით შეეძლება. როგორც არჩილ თალაკვაძემ განაცხადა, შესაძლოა პარლამენტი საკარანტინო რეჟიმზე გადავიდეს.
უმრავლესობის მიერ მომზადებული კანონპროექტი სესიაზე პირველად გავიდა. ცვლილებების მიხედვით, ქვეყანაში საგანგებო მდგომარეობის ამოქმედების შემთხვევაში, უმაღლესი საკანონმდებლო ორგანო ონლაინრეჟიმში იმუშავებს, თუმცა გაჩნდა გარკვეული კითხვები, ხომ არ ეწინააღმდეგება ინიციატივა ქვეყნის კონსტიტუციას. დეპუტატები დაინტერესდნენ როგორ უნდა მოხერხდეს საკანონმდებლო ორგანოს დისტანციურად მუშაობა და რამდენად ეფექტური იქნება იგი.
საპარლამენტო უმრავლესობის წევრის ირაკლი კობახიძის განცხადებით, საქართველოს კონსტიტუციაში არის ჩანაწერი, რომლის თანახმადაც პარლამენტი საგანგებო სიტუაციების დროსაც იკრიბება.
„მე ხაზს გავუსვამდი კონსტიტუციის ჩანაწერს, რომლის თანახმადაც პარლამენტი იკრიბება საგანგებო მდგომარეობის შემთხვევაშიც. აქ სამსჯელოა კონსტიტუციურობის ჭრილში რამდენად არის დასაშვები დისტანციურად პარლამენტის შეკრება. ასევე უნდა გააანალიზდეს ის რისკები, რომელიც კიბერუსაფრთხოებას უკავშირდება“, – აღნიშნა ირაკლი კობახიძემ.
მისი თქმით, თუ საჭირო იქნება საგანგებო მდგომარეობის გამოცხადება, პარლამენტს მთავრობასთან აქვს კომუნიკაცია და შესაბამის გადაწყვეტილებას მიიღებენ. კობახიძის განცხადებით, ამის საჭიროება როგორც გლობალურ, ასევე საქართველოში არსებულ ტენდენციებზე იქნება დამოკიდებული.
„ყველაფერი დამოკიდებულია მოვლენების განვითარებაზე თუ საჭირო იქნება უფრო ფართო ზომების მიღება, ვიდრე ამის საშუალება გვაქვს ჩვენ დღეს, საგანგებო მდგომარეობის გარეშე, ბუნებრივია, არ უნდა გამოცხადდეს საგანგებო მდგომარეობა. თუ გლობალური და ადგილობრივი ტენდენციების გათვალისწინებით, საჭირო და აუცილებელი იქნება საგანგებო მდგომარეობის გამოცხადება, თეორიულად ეს ვარიანტიც უნდა იყოს, ბუნებრივია, ჩვენ გვაქვს მჭიდრო კომუნიკაცია მთავრობასთან და ამის საფუძველზე ჩვენ მივიღებთ შესაბამის გადაწყვეტილებას. ამ გადაწყვეტილებას ერთობლივად იღებენ პრეზიდენტი, მთავრობა და პარლამენტი და ასეთ რეჟიმში განიხილება ეს საკითხი, თუ ის დადგა დღის წესრიგში“, – განაცხადა ირაკლი კობახიძემ.
უმრავლესობის ყოფილი წევრის, თამარ ჩუგოშვილის განცხადებით, პარლამენტის შეკრებას მნიშვნელოვანი დატვირთვა აქვს და მისი ჩანაცვლება ელექტრონული კომუნიკაციებით უკიდურეს შემთხვევაში უნდა მოხდეს. ჩუგოშვილის განცხადებით, ოპოზიცია ჩაერთვება ამ ნორმის ჩამოყალიბებაში და უმრავლესობას შესთავაზებს როგორ შეიძლება მიიღონ ისეთი ფორმულირება, რაც დისტანციური მუშაობის შემოღებას შესაძლებელს გახდის, მაგრამ ამავე დროს, გადააზღვევს რისკებს.
„პარლამენტის შეკრებას აქვს ძალიან მნიშვნელოვანი დატვირთვა და მისი ჩანაცვლება უნდა მოხდეს ელექტრონული კომუნიკაციებით ძალიან ფრთხილად და უკიდურეს შემთხვევაში“, – აცხადებს თამარ ჩუგოშვილი.
მისი თქმით, რისკები არის მაღალი, არის კიბერუსაფრთხოების რისკებიც და ასევე, რისკებიც, რომელიც დაკავშირებულია პარლამენტის შეკრების გარეშე გადაწყვეტილებების მიღებასთან.
„ჩანაწერი ამბობს ორ რამეს, რომ გადაწყვეტილებას იღებს თავმჯდომარე და იღებს ობიექტური საჭიროების შემთხვევაში. ეს არის ძალიან ფართო ჩანაწერი, რომელიც სინამდვილეში ძალიან სუბიექტური გადაწყვეტილების შესაძლებლობას აძლევს პარლამენტის თავმჯდომარეს. ამ დროს უდიდესი მნიშვნელობის საკითხია, მხოლოდ გამონაკლის შემთხვევებში შეიძლება ასეთი რამ დავუშვათ და კანონით უნდა იყოს გარანტიები გაწერილი“, – განაცხადა თამარ ჩუგოშვილმა.
თავდაცვისა და უშიშროების კომიტეტის თავმჯდომარის ირაკლი სესიაშვილის განცხადებით, სახელმწიფომ უნდა დაიცვას ბალანსი, ერთი მხრივ იზრუნოს მოქალაქეთა ჯანმრთელობაზე და მეორე მხრივ, არ უნდა შეიქმნას ქვეყნის განვითარებას შეფერხების საფრთხე. მისი თქმით, შეიძლება ითქვას, რომ ქვეყანა უკვე იყენებს საგანგებო მდგომარეობის გარკვეულ ელემენტებს, მაგრამ ამას არ ეძლევა იურიდიული სახე.
„მთავრობის შესაბამისი რეკომენდაციებით, გარკვეულწილად შექმნილია მოცემულობა, სადაც საგანგებო მდგომარეობის ელემენტებს ვიყენებთ. კარგია, რომ საზოგადოება დაწესებულ რეკომენდაციებს და შეზღუდვებს იღებს სწორად. ყველას ესმის, რომ ეს საფრთხე არის სახელმწიფოს და თითოეული ჩვენგანის წინააღმდეგ მიმართული. გუშინ პრემიერმა თქვა და მეც მინდა ხაზი გავუსვა, რომ ჩვენი ამოცანაა არსებულ გამოწვევას ვებრძოლოთ ჩვენი მთელი რესურსით და შესაძლებლობებით, თუმცა გვქონდეს მინიმალური ზარალი.
ჩვენ უნდა ვიპოვოთ ოქროს შუალედი და მოვახერხოთ ბალანსის დაცვა, რომ ერთი მხრივ, დავიცვათ ჩვენი მოქალაქეები და მათი ჯანმრთელობა და მეორე მხრივ, შევინარჩუნოთ ქვეყნისთვის საჭირო სასიცოცხლო ელემენტები, რაც არ შეაფერხებს ჩვენი ქვეყნის განვითარებას“, – განაცხადა ირაკლი სესიაშვილმა.
რომან გოცირიძე არ ფიქრობს, რომ შექმინილი ვითარება იმდენად მძიმე იყოს, რომ პარლამენტი წავიდეს და სამზარეულოდან იღებდეს გადაწყვეტილებას.
„პარლამენტის დისტანციური მუშაობის შესახებ კანონი არის უკიდურესად საფრთხის შემცველი, ვინაიდან შესაძლებელია იგი იყოს გამოყენებული ბოროტად და მან ძალიან არაჯანსაღ პოზიციებს შეუწყოს ქვეყანაში ხელი. ამიტომ, საჭიროა ძალიან ფრთხილი მიდგომა და თუკი იქნება განსაკუთრებული, საგანგებო ვითარება, მსგავსი კანონი უნდა მოქმედებდეს მხოლოდ შეზღუდული დროით და უნდა იყოს დათქმა, რომ ორი თვის შემდეგ ეს კანონი კარგავს ავტომატურად ძალას.
რამდენჯერაც ოპოზიცია პიკეტს მოინდომებს ამ პარლამენტის თუ მომავალი პარლამენტის წინააღმდეგ, იმდენი „ჩათში“ აწყონ საპარლამენტო სხდომები, ან რამდენჯერაც დისკომფორტი შეექმნება საპარლამენტო უმრავლესობას, პარლამენტის სხდომა მობილური ტელეფონებით ატარონ და უკონტროლოდ მიიღონ გადაწყვეტილებები – არავინ იცის კენჭისყრის სისტემა როგორ იქნება გაკონტროლებული და საერთოდ, უსაფრთხოების საკითხები, ეს არის ძალიან საშიში თემა“, – განაცხადა რომან გოცირიძემ.
დამოუკიდებელმა დეპუტატმა ლევან გოგიჩაიშვილმა არ იცის დისტანციურად ვის უნდა დაელაპარაკონ, ან კობახიძის გაკეთებული ინტერნეტ–კონფერენცია რა შედეგის მომტანი იქნება. მისი თქმით, ეს მდგომარეობა ქვეყანაში ძალიან ბევრ რამეს შეცვლის თარიღების თვალსაზრისით.
„დისტანციურად ვის უნდა დაელაპარაკონ? ამიტომ მგონია, რომ ეს მდგომარეობა ჩვენს ქვეყანაში ძალიან ბევრ რამეს შეცვლის თარიღების თვალსაზრისით. მე ასეთი მოლოდინი მაქვს, ნეტა არ შეცვალოს, მაგრამ ვერ წარმომიდგენია, ინტერნეტის საშუალებით როგორ უნდა ჩავატაროთ საყოველთაო განხილვა. კობახიძის გაკეთებული ინტერნეტ-კონფერენცია რა შედეგის მომტანი იქნება, არ ვიცი“, – განაცხადა ლევან გოგიჩაიშვილმა.
