დასავლეთის შიში, რომ შესაძლოა, საქართველოში მიმდინარე პროცესებმა პოლიტიკური დევნის სახე მიიღოს, ამჯერად, ევროკავშირის ელჩმა საქართველოში, ფილიპ დიმიტროვმა გაახმოვანა, რომელიც სააკაშვილის ხელისუფლების მიმართ საკმაოდ ლოიალური განცხადებებით არის ცნობილი. მისი შეფასებით, მნიშვნელოვანია, არ შეიქმნას შთაბეჭდილება, რომ მართლმსაჯულება პოლიტიკურ მიზეზებზეა მორგებული. მისივე განმარტებით, ევროკავშირისა და შეერთებული შტატების სხვადასხვა წარმომადგენლებმა ამის შესახებ განცხადებები უკვე გააკეთეს. 

„ბევრს ვერაფერს დავამატებ იმას, რაც უკვე განაცხადეს ევროკავშირისა და შეერთებული შტატების სხვადასხვა წარმომადგენლებმა. მნიშვნელოვანია, არ შეიქმნას შთაბეჭდილება, რომ მართლმსაჯულება პოლიტიკურ მიზეზებზეა მორგებული“, - განაცხადა ფილიპ დიმიტროვმა.

როდესაც სააკაშვილის ხელისუფლებამ ხელისუფლეაში მოსვლისთანავე ტელეკამერების თანხლებით შუაღამისას ხალხის ლოგინიდან წამოყრა, ტელევიზიების დარბევა დაიწო, სააკაშვილის ხელისუფლების სამართალდამცველებმა შიშის სინდრომის გასაჩენად ქუჩებში ხალხის ჩაცხრილვა, პოლიტიკური ოპონენტების დევნა, საპროტესტო აქციების დარბევა და უმიზეზოს ხალხის ციხეში ჩაყრა დაიწყო, მთელი 8 თუ 9 წელი დასავლეთი ქართული ხელისუფლების რეფორმებზე ლაპარაკობდა. მართალია, იგივე დასავლეთის მხრიდან ადამიანის უფლებების დარღვევის ფაქტებზე მწვავე შეფასებებიც კეთდებოდა, მაგრამ ამას საჩქაროდ წარმატებულ რეფორმებზე საუბრები ცვლიდა.

დღეს დასავლეთი უკვე ახალ ხელისუფლებას აკრიტიკებს და ცალკეული დასავლელი ჩინოვნიკების მხრიდან „ნაციონალური მოძრაობის“ ადვოკატირება, სულ ცოტა, გაკვირვებას იწვევს. ეს არის პრევენცია ჩვენი მეგობრების მხრიდან თუ მხარდაჭერის გამოცხადება ხელისუფლებისათვის ამ თემებზე ექსპერტი რამაზ საყვარელიძე გვესაუბრება.   

ბატონო რამაზ, დასავლეთის მხრიდან სააკაშვილის რამდენიმე მაღალჩინოსნის დაკავებას საკმაოდ კრიტიკული განცხადებები მოჰყვა. ახლა, ევროკავშირის ელჩი, ბატონი დიმიტროვიც იგივეს იმეორებს, რომ მთავარია ამ დაკავებებმა პოლიტიკური დევნის შთაბეჭდილება არ შექმნას. მაშინ, როდესაც სააკაშვილის მთელი მოღვაწეობა სავსე იყო პოლიტიკური დევნის ფაქტებით, დასავლეთს ასეთი მწვავე განცხადებები არ გაუკეთებია. დღეს კი აკრიტიკებს ხელისუფლებას, რომელმაც ჯერჯერობით ვერ მოასწრო რამის დაშავება. თქვენი აზრით, ამას როგორი ახსნა შეიძლება ჰქონდეს?

- დასავლეთის რეაქცია იმდროინდელ მოვლენებზე, რაზეც ქართულ საზოგადოებას ჰქონდა რეაქცია და დღევანდელზე, აშკარად განსხვავებულია. ამ შემთხვევაში დიმიტროვის განცხადებაზე კომენტარს არც გავაკეთებდი, რადგან დიმიტროვი ხშირად აკეთებდა ისეთ განცხადებებს, რაც მისივე, ანუ ევროპული მხარისთვის არის წამგებიანი.

როგორც ჩანს, დასავლეთი ვერ ხვდება, რომ თუკი ქართული საზოგადოების ნდობა არ ექნება მის სიტყვებს, ეს მხოლოდ და მხოლოდ დასავლეთის პოლიტიკის დისკრედიტაციას გამოიწვევს ამ საზოგადოებაში.

სამწუხაროდ, ასეთი შეცდომები ხშირად მოსდით დასავლეთის პოლიტიკურ მოღვაწეებს, და განსაკუთრებით ხშირად მოსდის ხოლმე ეს შეცდომა ბატონ დიმიტროვს.

დიმიტროვისგან ძალიან ხშირად მოგვისმენია მიხეილ სააკაშვილის და „ნაციონალური მოძრაობის“ მხარდამჭერი განცხადებები, როდესაც მთელი ქართული საზოგადოება ამა თუ იმ ფაქტზე აღშფოთებული იყო. ის მხოლოდ „ნაციონალური მოძრაობის“ მიერ მიწოდებულ ინფორმაციას ეყრდნობა თუ ტენდენციურია, როგორ შეიძლება შეფასდეს მისი მოღვაწეობა?

- ტენდენციური რომ არის ეს ფაქტია. ელემენტარულად, კრიტიკული შენიშვნების რაოდენობა სააკაშვილისა და ივანიშვილის ხელისუფლების მიმართ რომ დადო, უკვე ეს პროპორცია გამოაჩენს ტენდენციურობას. რომ აღარაფერი ვთქვათ, რა ხდებოდა წინა ხელისუფლების დროს და რა ხდება ამ ხელისუფლების შემთხვევაში. რა ხდებოდა იგივე 7 ნოემბერს, 26 მაისსა და ა.შ.

მაგრამ მთავარი ისაა, რატომ არის ტენდენციური - ეს არის მხოლოდ დაუფიქრებლობა და არაკომპეტენტურობა და პროფესიასთან შეუსაბამობა თუ აქ რაიმე სხვა ინტერესია. ამ კითხვაზე პასუხის გაცემა მე არ შემიძლია.

ის პროცესები, რომელზეც ბატონ დიმიტროვს ეჭვი აქვს, რომ პოლიტიკურ მიზეზებზე მორგებულად არ გამოჩნდეს, ტოვებს თუ არა შთაბეჭდილებას, რომ შესაძლოა, ეს პოლიტიკური დევნა იყოს?

- ირაკლი ოქრუაშვილის ჩამოსვლამ კიდევ ერთხელ შეგვახსენა ის სტილი, როგორც მოქმედებდა სააკაშვილის ხელისუფლება ოპონენტების მიმართ. ვგულისხმობ, წამყვან ოპონენტებს. ოქრუაშვილი, ნინო ბურჯანაძე გამოცხადებული იყო რუსეთის აგენტად. ბიძინა ივანიშვილის წინააღმდეგ მოქმედებათა მთელი ციკლი გვახსოვს. ამ ფონზე დღევანდელი პროკურატურის მოქმედება პოლიტიკურ დევნად რომ შეაფასო, მაშინ როდესაც ის წინა მოქმედებები, პოლიტიკურ დევნასთან დაკავშირებით, არ შეუფასებია დასავლეთის არ ერთ მოღვაწეს, ცოტა ღიმილის მომგვრელია.

თუ ჩვენი პოზიციიდან გამოვალთ, ანუ საქართველოს მოქალაქეების, საქართველოს მოქალაქეებისთვის ეს სურათი ჯერჯერობით პოლიტიკური დევნის სურათს არ წააგავს.

როგორ ფიქრობთ, მოსალოდნელია თუ არა დესტაბილიზაცია, თუკი ეს პროცესები, ვგულისხმობ დაპატიმრებებს, კიდევ უფრო გაფართოვდება, დასავლეთი სწორედ იმას შიშობს, ამ ყველაფერს უმართავი პროცესები და დესტაბილიზაცია არ მოჰყვეს...

- არ არის მოსალოდნელი, რადგან „ნაციონალური მოძრაობის“ მომხრეთა რაოდენობა ვერ შექმნის დესტაბილიზაციის პირობას, თუკი ეს იგულისხმება.

თუკი ამაში ხალხის უკმაყოფილება იგულისხმება, ხალხი შეიძლება უკმაყოფილო იყოს, თუკი ეს პროცესები, სამართლის აღდგენის პროცესები შენელდა. აი, მაშინ შეიძლება შეიქმნას დესტაბილიზაცია.

თუმცა „ნაციონალური მოძრაობა“ მუდმივად აპელირებს და ხმამაღალ განცხადებებს აკეთებს იმასთან დაკავშირებით, რომ მათ პოლიტიკურად სდევნიან. ასეთ განცხადებებს დასავლეთის მხრიდან რა შეფასებები შეიძლება მოჰყვეს?

- არ გამოვრიცხავ, რომ დასავლეთის ზოგიერთი წრეები, რომლებსაც ჯერჯერობით დარჩათ გაურკვეველი, რამდენად არის ივანიშვილი რუსეთთან და რამდენად გაატარებს მის პოლიტიკას. არ გამოვრიცხავ, რომ დასავლეთში ასეთი წრეები ცდილობენ იპოვონ ივანიშვილის ხელისუფლებაზე ზეწოლის თემები. მაგალითად, ისევე, როგორც უკრაინის დღევანდელი ხელისუფლებისთვის ტიმოშჩენკო არის მასზე ზეწოლის თემა და ტიმოშჩენკოს თემაში სწორედ პოლიტიკური დევნის ქვეტექსტი იგულისხმება.

თუ დადგება მაგალითად, ქალაქის მერის პასუხისმგებლობის საკითხი, სხვებს აღარ ჩამოვთვლი, რადგან მხოლოდ ბიუჯეტის არამიზნობრივი ხარჯვის გამო შესაძლოა, უამრავი ჩინოვნიკის პასუხისმგებლობის საკითხი დადგეს და საქმე პრეზიდენტამდეც კი მივიდეს, ასეთ შემთხვევაში როგორც შეფასებებს უნდა ველოდეთ დასავლეთისგან?

- უნდა გავაცნობიეროთ, რომ საქართველოს მოსახლეობა არის გადამწყვეტი. თავის დროზე დასავლეთის ინტერესში „ვარდების რევოლუციამდე“ ზურაბ ჟვანიას გაპრემიერება იყო, მაგრამ მოსახლეობის მხარდაჭერამ სააკაშვილი გახადა პირველი პირი და დასავლეთმა მერე სააკაშვილზე ააწყო თავისი პოლიტიკა.

ანალოგიურად დღეს, თუ მათ რაღაც მიზეზების გამო სააკაშვილის თემა არ უნდათ, რომ მოიხსნას ქართული პოლიტიკური ცხოვრებიდან, ამ შემთხვევაში ისინი შეიძლება სულ სხვა ინტერესებით ხელმძღვანელობდნენ. მაგრამ გადამწყვეტი საქართველოს მოსახლეობაა. როგორ გადაწყვეტილებასაც ქართველი ხალხი მიიღებს, ამის მიხედვით აეწყობა დასავლეთიც.

ჩვენ დასაწყისში ვნახეთ, რომ დასავლეთი საკმაოდ ფრთხილი იყო ივანიშვილთან მიმართებაში. დღეს ვხედავთ, რომ ამერიკის ელჩი დღეში რამდენიმეჯერ ეკონტაქტება ივანიშვილს და დასავლეთმა პირველ პირად მიიღო ივანიშვილი, მიუხედავად იმისა, რომ ასეთი რამ მას არასოდეს არ გაუკეთებია სხვა პრემიერებთან მიმართებაში. ასე რომ, დასავლეთი ნელ-ნელა მოდის ქართული საზოგადოების არჩევანის მხარეს. ისევე როგორც პირველი ოქტომბრის არჩევნებისას, შემდგომი პოლიტიკის გაგრძელების დროსაც გადამწყვეტი არის საქართველოს მოსახლეობა.