მმართველ გუნდში არ ადასტურებენ ინფორმაციას იმასთან დაკავშირებით, რომ იურიდიულმა დეპარტამენტმა გამოაქვეყნა დასკვნა, რომლის მიხედვითაც ე.წ. გერმანულ მოდელზე მიზანშეწონილად მიაჩნია, კანონპროექტის განხილვის პროცედურის დაწყება.

„ევროპული საქართველოს“ ლიდერი გიგა ბოკერია აცხადებს, რომ მიიღეს პარლამენტის იურიდიული დეპარტამენტის დასკვნა, რომ ოპოზიციის პროექტი კონსტიტუციას არ ეწინააღმდეგება. როგორც ბოკერიამ ჟურნალისტებს განუცხადა, დასკვნაში წერია, რომ კანონპროექტი განხილვისთვის მზადაა.

„გერმანული მოდელი, რაზეც ჩვენ ვნახეთ უტიფარი რეაქცია ხელისუფლების, რომ განხილვაც კი არ შეგვიძლია იმდენად არაკოსტიტუციურიაო, განხილვა და გაგზავნაც კი სირცხვილია ვენეციის კომისიაშიო, მივიღეთ ამ ხელისუფლების პირობებში არსებული იურიდიული დეპარტამენტის დასკვნა, რომ ეს პროექტი კონსტიტუციას არ ეწინააღმდეგება.

თუ მეტ–ნაკლებად აშკარაა კონსტიტუციასთან წინააღმდეგობა, ისინი დასკვნას დებენ, რომ არის პრობლემა და არ შეიძლება ამის განხილვა. თუ პატარა ეჭვიც აქვთ ხოლმე, მკაფიოდ და პირდაპირ წერენ ხოლმე, რომ კონსტიტუციას ეწინააღმდეგება. ამ პროექტზე არაფერი მსგავსი არ დაწერეს. წერია, რომ მზადაა განხილვისთვის“, – აღნიშნა გიგა ბოკერიამ.

საპარლამენტო უმრავლესობის ლიდერის მამუკა მდინარაძის განცხადებით, სპეკულაციური იქნება, თუ ვინმე გაბედავს ისეთი საოცრების თქმას, რომ პარლამენტის იურიდიულმა დეპარტამენტმა რაღაც დასკვნა მოამზადა, რომელიც კონსტიტუციურობას ეხება ან არ ეხება.

„საუბარია მხოლოდ ფორმალურ დასაშვებობაზე, რაც ხდება ნებისმიერი კანონპროექტის შემთხვევაში, განიხილავს ფორმალურ ტექსტს და მსვლელობას აძლევს კანონპროექტის განხილვას, ბიუროს სხდომაზე შემოაქვს. იმის „გაყიდვა“, რომ კონსტიტუციურობასთან და მის შესაბამისობასთან დაკავშირებით თითქოს გააკეთა რაღაც დასკვნა, სპეკულაციურია“, – განაცხადა მამუკა მდინარაძემ.

გიგა ბოკერიას ინფორმაციას არ ადასტურებს პარლამენტის იურიდიულ საკითხთა კომიტეტის თავმჯდომარე ანრი ოხანაშვილი, რომლის განცხადებით, იურიდიულ დეპარტამენტს არ აქვს იმის უფლება, რომ კონსტიტუციასთან შესაბამისობის საკითხი გადაწყვიტოს. ოხანაშვილის განმარტებით, იურიდიულ დეპარტამენტს ტექნიკური ფუნქცია აკისრია და კონსტიტუციასთან შესაბამისობის საკითხს ვერ გადაწყვეტს.

„ეს არის წმინდა ტექნიკური საკითხი. ასე რომ, წინასწარ ასე ომახიანად ნუ იქნებიან, ნუ განაცხადებენ, რომ კონსტიტუციასთან შესაბამისობაშია. ეს არის მხოლოდ ტექნიკური პროცედურა, რომელიც ქმნის შესაძლებლობას, რომ პროცედურა დაიწყოს. ასევე იყო, როდესაც კოლეგებმა, პარლამენტის უფრაქციო წევრებმა დაარეგისტრირეს უზენაესი სასამართლოს მოსამართლეების უვადოდ დანიშვნის შეჩერების საკითხი, რომელიც ასევე არაკონსტიტუციური იყო და იურიდიულ საკითხთა კომიტეტმა დავწერეთ სამართლებრივი დასკვნა, რომ ეს იყო კონსტიტუციასთან შეუსაბამო“, – განაცხადა ანრი ოხანაშვილმა.

„შენების“ მოძრაობის ლიდერი განმარტავს, რომ პარლამენტის იურიდიული დეპარტამენტი არ არის საკონსტიტუციო სასამართლო და ის არ იღებს საბოლოო გადაწყვეტილებას, მაგრამ დავით უსუფაშვილის განცხადებით, ფაქტია, რომ მათ ვერ აღმოაჩინეს პრობლემა, რომლის გამოც ბიუროს ურჩევდნენ, რომ არ განეხილათ. უსუფაშვილის განმარტებით, კანონპროექტი ერთი კვირის წინ შევიდა პარლამენტში და დღეს გადაეცა ბიუროს შემდგომი პროცედურებისთვის.

„საპარლამენტო პრაქტიკით, კანონპროექტს წინდაწინ იხილავს იურიდიული დეპარტამენტი, ასევე საბიუჯეტო დეპარტამენტი და თუ მათ აქვთ რამე იმ ტიპის გადაულახავი პრობლემების განცდა, ამას ბიუროს მოახსენებენ, რომ არ მიაჩნიათ მიზანშეწონილად იმიტომ, რომ ის რაღაცას ეწინააღმდეგება. ამჯერად დასკვნა არის დადებითი, რომ შეიძლება მისი განხილვა.

ეს პროექტი მთლიანად არის შესული, რომელსაც გერმანულ პრინციპზე დაფუძნებული ქართული მოდელი ჰქვია. ამ მოდელში არის გერმანულად განაწილების ინიციატივა პროპორციული თვალსაზრისით და მრავალმანდატიანი მაჟორიტარული ოლქები 73 მაჟორიტართან დაკავშირებით.

არ არის საუბარი არანაირ ახალ წინადადებაზე, არამედ არის საუბარი ოპოზიციის მიერ შეთავაზებულ კანონპროექტში ორ ნაწილზე. მრავალმანდატიანი მაჟორიტარული ოლქების თაობაზე ყველაფერი ამ დოკუმენტში წერია. უმრავლესობამ ეს ყველაფერი იცის და სჭირდება დრო, რომ ამ კომპონენტზე თავისი პოზიცია ჩამოაყალიბონ“, – განაცხადა დავით უსუფაშვილმა.

„ახალი საქართველოს“ ლიდერის განმარტებით, ფაქტია, რომ ოპოზიციის მიერ შეტანილი კანონპროექტის იურიდიული კომიტეტის მიერ დარეგისტრირება მათი მნიშვნელოვანი წარმატებაა. გიორგი ვაშაძე ამბობს, რომ ის „ქართულ ოცნებას“ არ ენდობა და მოუწოდებს, საზოგადოება ისევ არ მოატყუოს, წინააღმდეგ შემთხვევაში, ის აცხადებს, რომ ხელისუფლება საერთო ეროვნული წინააღმდეგობის მოძრაობას მიიღებს.

„ჩვენს პრინციპულ, შეუპოვარ და რაც მთავარია, სიმართლისთვის ბრძოლას აქვს პირველი მნიშვნელოვანი შედეგები – „ქართულმა ოცნებამ“ დაიწყო უკან დახევა, ეს იყო გუშინდელი მოლაპარაკების მოკლე რეზიუმეც, დღეს პარლამენტმა დაარეგისტრირა კანონი და მიზანშეწონილად მიიჩნევს ამ კანონპროექტის განხილვას, ესეც ძალიან მნიშვნელოვანი წარმატებაა ამ ბრძოლაში.

მაგრამ აქვე მინდა ვთქვა, რომ ჩემი ნდობა „ქართულ ოცნებასთან“ მიმართებაში არის ნულოვანი, ნულზე უფრო ქვემოთ. აქედან გამომდინარე, ჩვენ ვერანაირად ვერ მოვეშვებით და პირიქით, გაცილებით უფრო ფართო ფრონტით უნდა ვიბრძოლოთ – ეს არის მშვიდობიანი, არაძალადობრივი პროტესტი, ეს არის პიკეტირებები პარლამენტის, ეს არის რეგიონებში გაშლა“, – აცხადებს გიორგი ვაშაძე.

ანალიტიკოს გია აბაშიძის განცხადებით, მნიშვნელოვანია როცა დაპირისპირებული მხარეები აღწევენ კონსენსუსს. მისი თქმით, ამ დაპირისპირებისას მნიშვნელოვანი იქნებოდა დასავლელი პარტნიორების ჩარევა, მედიაცია, რაც მოხდა.

„ზუსტად მათ შემოგვთავაზეს ისეთი იდეა, რომელიც ხელისუფლებისთვის არის თავსებადი კონსტიტუციასთან. ჩვენ ხომ გვაქვს ორი შეუვალი პოზიცია, ერთი ამბობს, რომ ე.წ. მოდიფიცირებული გერმანული მოდელი არის თავსებადი კონსტიტუციასთან, მეორე ამბობს, რომ არ არის. პარალელურ რეჟიმში ვხედავთ, რომ ვენეციის კომისიასა და „ოდირში“ გაგზავნეს შეკითხვები, თავსებადია, თუ არა.

ახლა ეს მოლაპარაკება რომ შედგა და ხელისუფლება დათანხმდა, განიხილოს ეს პრინციპი, მართლაც ძალიან სასიხარულო და მნიშვნელოვანია. მრავალმანდატიანი, მაჟორიტარული ოლქები გულისხმობს საარჩევნო ოლქების გამსხვილებას, როგორც გავიგეთ, 10 საარჩევნო ოლქი იქნება მრავალი მანდატით. მთავარია, რაზე შეჯერდებიან. თუ იდეა, პრინციპი ორივესთვის მისაღებია, ახლა როგორც გავიგეთ, „ქართულმა ოცნებამ“ ითხოვა 2 კვირა.

გადაამუშავებენ გუნდში. შეიძლება საკუთარი არგუმენტებიც შესთავაზონ, მაგრამ ის, რომ ჭერქვეშ, მაგიდასთან წყდება პროცესები, კარგია. ცუდია, ის, რომ დამოუკიდებლობის 30 წლის მანძილზე ჩვენ კიდევ გვიწევს, დაპირისპირებულ პოლიტიკურ მხარეებს შორის მედიატორი იყოს უცხოელი პარტნიორი“, – აცხადებს გია აბაშიძე.

ექსპერტი გია ხუხაშვილი მიიჩნევს, რომ ხელისუფლებისა და ოპოზიციის შეხვედრის მეორე რაუნდის შემდეგ, ზომიერი ოპტიმიზმის საფუძველი არის. მისი განმარტებით, იმ მოდელის თანახმად, რომელსაც ოპოზიცია ხელისუფლებას სთავაზობს, კონსტიტუცია ძალაშია და მაჟორიტარების ინტერესები დაცულია.

„ოპოზიციის შეთავაზებული მოდელით, მაჟორიტარების ინტერესებიც არის დაცული, იმიტომ რომ, პირველ რიგში, პრიორიტეტი ენიჭებათ მაჟორიტარებს და ისინი გადიან ყველა შემთხვევაში და პროპორციულით ხდება, ფაქტობრივად, პარლამენტის შევსება მაჟორიტარული მოცემულობიდან გამომდინარე.

ასე რომ, კონსტიტუცია ძალაშია, მაჟორიტარების ინტერესები დაცულია. ერთადერთი, რამაც შეიძლება, ეს პროცესი შეაჩეროს არის ხელისუფლების შიში ძალაუფლების დაკარგვის იმიტომ, რომ თავისი კონკურენტულობით ეს მოდელი საკმაოდ ახლოს არის პროპორციულთან“, – განაცხადა გია ხუხაშვილმა.