კომუნიკაციების მარეგულირებელ კომისიაში ხმაურიანი სხდომა ჩატარდა. სხდომაში ტელემაუწყებლების წარმომადგენლები მონაწილეობდნენ და საუბარი ციფრულ მაუწყებლობაზე გადასვლას ეხებოდა. მარეგულირებელი კომისიის ერთ-ერთმა წევრმა, აკაკი სიხარულიძემ ჯერ სხდომის ორგანიზატორებს უსაყვედურა იმის გამო, რომ იგი არ მიიწვიეს, შემდეგ კი სხდომა პროტესტის ნიშნად დატოვა.

For.ge-სთან საუბარში აკაკი სიხარულიძე აცხადებს, რომ მარეგულირებელ კომისიაში სხდომების ჩატარების შესახებ მას არ ატყობინებდნენ და ეს მის განსხვავებულ პოზიციას უკავშირდება. მან ასევე განაცხადა, რომ შესაძლოა საკუთარი უფლება-მოსილების შეწყვეტის თხოვნით პარლამენტს მიმართოს. შეგახსენებთ, კომუნიკაციების მარეგულირებელი კომისიის მიმართ საზოგადოების წარმომადგენლებს სერიოზული პრეტენზიები გააჩნიათ, რადგან მარეგულირებელი პრაქტიკულად ხელისუფლების ხელში თავისუფალ მედიაზე ზეწოლის მექანიზმად იყო გადაქცეული. განსაკუთრებული პრეტენზიები მარეგულირებლის ხელმძღვანელის, ირაკლი ჩიქოვანის მიმართ არსებობს, რადგან იგი მედია და სარეკლამო ბიზნესში მოღვაწეობს და მის შემთხვევაში ინტერესთა კონფლიქტი აშკარად სახეზეა.

ჩიქოვანი კომუნიკაციების ეროვნული კომისიის თავმჯდომარედ 2009 წლის ივნისში აირჩიეს. მანამდე იგი ტელეკომპანია „რუსთავი-2“-ის გენერალური დირექტორი და აქციების 30%-ის მფლობელი იყო. ამავე დროს თავის ორ ბიზნესპარტნიორთან - გიორგი კურცხალიასთან და გიორგი გეგეშიძესთან ერთად ფლობდა და დღესაც ფლობს უმსხვილეს სარეკლამო კომპანიას „მაგი სტილი“.

ჩიქოვანთან დაკავშირებით ბევრი პრეტენზია არსებობს, განსაკუთრებით იმ მიმართულებით, რომ საკუთარი ბიზნესის ინტერესებს იგი მარეგულირებელი კომისიის თავმჯდომარის სახით ძალიან აქტიურად ლობირებს. მასვე უკავშირდება თავისუფალი მედია-საშუალებების შევიწროვება, რაც განსაკუთრებით აქტუალური იყო უკანასკნელი ერთი წლის განმავლობაში, მასე შემდეგ, რაც ქართულ პოლიტიკურ სივრცეში ბიძინა ივანიშვილი გამოჩნდა.

კომუნიკაციების მარეგულირებელი კომისიის წევრი, აკაკი სიხარულიძე, რომელმაც კომისიის სხდომა პროტესტის ნიშნად დატოვა, დღეს ირაკლი ჩიქოვანზე საუბარს ერიდება, თუმცა ამბობს, რომ მას კომისიაში იგნორირებას იმიტომ უკეთებდნენ, რომ სანქცირებებთან დაკავშირებით განსხვავებული პოზიცია ჰქონდა.

აკაკი სიხარულიძე: „ საქმე მხოლოდ დღევანდელ სხდომაში არ არის. თუმცა რაც შეეხება ამ სხდომას, იგი იმართებოდა ციფრულ მაუწყებლობაზე გადასვლასთან დაკავშირებით. მოგახსენებთ, რომ ციფრულ მაუწყებლობაზე გადასვლის პროექტი მარეგულირებელ კომისიაში ჯერ კიდევ 2009 წელს შევიტანე და გადაწყვეტილია, რომ საბოლოოდ ეს პროექტი 2015 წლისთვის უნდა განხორციელდეს. ჩემივე შეტანილ პროექტთან დაკავშირებით უკვე მეშვიდე თუ მერვე სხდომა იმართება და არ მეძახიან ამ სხდომებზე. საერთოდ, ცოტა სხვა მიმართულებები იკვეთება ამ მხრივ, გარკვეული დისტანცირება ხდება ჩემს მიმართ. ამასთანავე, ეს პირველი შემთხვევა კი არ არის, უკვე ორი წელია ასე გრძელდება, ერთხელ, ორჯერ, ათჯერ და მოკლედ გავაკეთე ის განცხადება, რაც გავაკეთე.

თქვენი აზრით, რატომ ხდებოდა თქვენგან დისტანცირება?

- საერთოდ, ყველა საკითხთან დაკავშირებით ჩემი გამოკვეთილი აზრი მქონდა ხოლმე და ხანდახან, ძალიან კრიტიკულიც ვიყავი. სხვა ვერაფრით ვერ ავხსნი ჩემს მიმართ ასეთ დამოკიდებულებას.

იქნებ დააკონკრეტოთ, რასთან დაკავშირებით გქონდათ განსხვავებული აზრი?

- მაგალითად, ჩემი აზრი მქონდა სანქცირებებთან დაკავშირებით. მე არ ვარ მომხრე, რომ უმნიშვნელო გადაცდომაზე კომპანია დაჯარიმდეს. მაგალითად, როდესაც ყოველი თვის 20 რიცხვში ყველა კომპანიამ (იქნება ეს ტელევიზია, ფიჭური კავშირის ოპერატორი, საკაბელო მაუწყებელი თუ ინტერნეტ-ოპერატორი) უნდა წარმოადგინოს ინფორმაცია მათი შემოსავალ-გასავლის შესახებ, ასევე იმასთან დაკავშირებით, რომ კომპანიის მესაკუთრეებში ცვლილებები არ არის და ა.შ. თუკი კომპანია ამ დოკუმენტაციას მაგალითად 21 რიცხვში წარმოადგენს, მიმაჩნია, რომ ამის გამო არ უნდა დააჯარიმო. რეალურად ასეთი ინფორმაციის ერთი ან ორი დღის დაგვიანებით წარმოდგენა არაფერს წყვეტს და რა მოხდება, რომ ამის გამო კომპანია არ დაჯარიმდეს? მაგალითად საკაბელოში 7-8 კაცი რომ მუშაობს, ერთხელ რომ დააჯარიმებ 3 ან 5 ათასი ლარით, მეორედ დააჯარიმებ და კვდება ის ბიზნესი, რადგან ვერ აუდის ამხელა სანქციებს. უმუშევარი უმუშევრად რჩება და ცალკე კიდევ ბიზნესის ჩაკვდომასაც იწვევს ამგვარი მიდგომა. ეს მხოლოდ ერთი მაგალითი მოვყევი, მაგრამ იქ კიდევ უამრავი სხვა რამ იყო, რაზეც ახლა უბრალოდ არ ვაპირებ საუბარს.

თქვენ რაზეც საუბრობთ, საერთოდ ასეთი ქმედებები ძირითადად თავისუფალი მედია-საშუალებების წინააღმდეგ იყო ხოლმე მიმართული. ამ შემთხვევებზეც გამოთქვამდით ხოლმე პროტესტს?

- ძალიან ბევრი ასეთი შემთხვევა იყო. სადაც კანონში წერია, რომ მარეგულირებელმა უნდა არეგულიროს და არსებობს სანქცირება, იქვე წერია, რომ არსებობს ხელშეწყობაც. ესენი კიდევ სულ პირიქით იქცეოდნენ. ამიტომ ამ საკითხზე ჩვენს შორის იყო აზრთა სხვადასხვაობა. თუკი ვინმე დაინტერესდება, ჰკითხონ გნებავთ „გლობალ ტვ“-ს, გნებავთ „მეცხრე არხის“, „მაესტროს“, „მაგთის“ ხელმძღვანელობას, ვინ იყო აქტიური ამ საკითხებთან დაკავშირებით. მუდმივად ვიძახდი - სანქცირებები ნაკლებად, ხელშეწყობა კი მეტია საჭირო.

ახლა თქვენ ღიად საუბრობთ ამ თემაზე, მაგრამ აქამდე  პროტესტი ღიად არ დაგიფიქსირებიათ.

- როგორ უნდა გამომეხატა, დავმდგარიყავი და მეჭორავა? ეგ არის პროტესტი და მაინცდამაინც ეგ არის მისაღები ფორმა? როდესაც უკვე მართლა გამევსო მოთმინების ფიალა, ავდექი და ვთქვი. შეიძლება არც არაფერი უნდა მეთქვა, უბრალოდ ავმდგარიყავი და წამოვსულიყავი, მაგრამ, ნუ... ვთქვი.

ამ ყველაფრის შემდეგ აპირებთ მარეგულირებელ კომისიაში მუშაობის გაგრძელებას?

- არ ვიცი, შეიძლება განცხადებით მივმართო პარლამენტს, რომ უფლება-მოსილება შემიჩერონ. ამ წუთში ჯერ გადაწყვეტილება მიღებული არ მაქვს, ჯერ ვფიქრობ, მაგრამ შესაძლოა, ასეც მოვიქცე.

ბატონო აკაკი, საზოგადოებას სერიოზული პრეტენზიები გააჩნია მარეგულირებელი კომისიის ხელმძღვანელის, ირაკლი ჩიქოვანის მიმართ, მის მედია და სარეკლამო ბიზნესებთან დაკავშირებით, საუბარია ინტერესთა კონფლიტზე. თქვენ როგორი პოზიცია გაქვთ ამასათან დაკავშირებით?

- არ ვიცი, ირაკლი ჩიქოვანთან დაკავშირებით ვერაფერს გეტყვით. ეს ჩემი საქმე არ არის.

რამდენადაც ცნობილია, პარლამენტი აპირებს, რომ მარეგულირებელი კომისიის შემადგენლობა შეცვალოს, რადგან ამ შემადგენლობის მიმართ სერიოზული პრეტენზიები არსებობს ქართულ საზოგადოებაში. როგორ ფიქრობთ, მარეგულირებელი კომისიის წევრები მართლაც შესაცვლელები არიან?

- თუ აპირებს პარლამენტი, ალბათ გადახედავს. როგორც საჭიროდ ჩათვლის, ისე უნდა მოიქცეს, ამაზე სხვას ვერაფერს გეტყვით.