ტყვიის საწარმოს გახსნა და ქვეყანაში სამხედრო თვითმფრინავების წარმოების აღდგენა – ირაკლი ღარიბაშვილი თავდაცვის სამინისტროში ამბიციური გეგმებით მოდის. როგორც ღარიბაშვილმა განაცხადა, ტყვიის საწარმოს მშენებლობის შესახებ პროექტი ჰქონდა, რაც ახლა უნდა განახორციელოს. თავდაცვის ახალი მინისტრი აცხადებს, რომ საქართველოში უნდა დაიწყოს ყველა სახის იარაღის წარმოება, ბირთვულის გარდა. ღარიბაშვილის მთავარი ოცნება არის საქართველოში სამხედრო მრეწველობის აღორძინება და განვითარება. ქვეყნის უდიდეს გამოწვევად ქვეყნის ოკუპაციას ასახელებს.

„ჩვენი ტერიტორიების 20% არის ოკუპირებული. ეს, რა თქმა უნდა, პირველი სახის გამოწვევაა. ამ ფონზე მნიშვნელოვანია, რომ ჩვენი ჯარი იყოს ძლიერი. რა თქმა უნდა, მე არ ვგულისხმობ იმას, რომ ჩვენი ჯარის გაძლიერება ვინმეს ან რაიმეს წინააღმდეგაა მიმართული, არამედ ჩემი სურვილი – სამხედრო მრეწველობის განვითარება, ერთ–ერთი მთავარი პრიორიტეტია.

ყოველწლიურად მხოლოდ თავდაცვის სამინისტრო რამდენიმე ათეულ მილიონს შეიძლება ხარჯავდეს, ისევე როგორც სხვა სამინისტროები, შსს თუ სხვა, თუნდაც ტყვია–წამლის შეძენაში, რაც ერთ–ერთი მთავარი პრობლემაა. ჩემი ჯერ კიდევ მინისტრობის და შემდეგ პრემიერ–მინისტრობის დროს, ერთ–ერთი მთავარი პროექტი მქონდა ტყვიის საწარმოს მშენებლობა საქართველოში. ვფიქრობ, ეს უნდა გავაკეთოთ ჩვენ და უნდა დავიწყოთ დღესვე და, რა თქმა უნდა, ყველა სახის იარაღის წარმოება, გარდა ბირთვულის. მე ვფიქრობ, რომ ჩვენ ამას შევძლებთ“, – განაცხადა ირაკლი ღარიბაშვილმა.

კიდევ ერთი პროექტი, რომელიც ღარიბაშვილს აქვს, ეს არის სამხედრო თვითმფრინავების წარმოების აღდგენა. როგორც ღარიბაშვილმა განაცხადა, საქართველოში ყველაფრის წარმოებაა შესაძლებელი, მათ შორის რაკეტების და სხვა მაღალტექნოლოგიური პროდუქციის.

„საქართველი იყო ერთ–ერთი გამონაკლისი, სადაც მაღალტექნოლოგიური საწარმო არსებობდა. დღესაც არსებობს ე.წ. 31–ე ქარხანა, სადაც ჩვენ ვუშვებდით სამხედრო თვითმფრინავებს. საბედნიეროდ, ქვეყანაში ჯერ კიდევ გვაქვს ინტელექტუალური რესურსი. ის ადამიანები, რომლებიც მუშაობდნენ ამ უნიკალური მაღალტექნოლოგიური პროდუქციის შექმნაზე, ჯერ კიდევ ცხოვრობენ ქვეყანაში. მე ვაპირებ ამ საკითხის დასმას მთავრობის შემადგენლობაში. ჩვენ უნდა გამოვიყენოთ ეს უნიკალური შესაძლებლობა, ეს შანსი, რომ აღვდგინოთ სამხედრო თვითმფრინავების წარმოება“, – განაცხადა ირაკლი ღარიბაშვილმა.

თავდაცვის ახალი მინისტრის ინციატივას მხარს უჭერს შს მინისტრი ვახტანგ გომელაური, რომლის განცხადებით, ღარიბაშვილის ინიციატივა ბიზნესისთვის მომგებიანი იქნება.

„რაც შეეხება იარაღის წარმოებას, მე ვიცი ეს თემა ძალიან კარგად. ადრე იყო საუბარი ტყვიის წარმოებაზე, რომელიც ძალიან მნიშვნელოვანია. ძალიან დიდი თანხები გაედინება ქვეყნიდან ტყვიის შესაძენად, როგორც შინაგან საქმეთა სამინისტროდან, ისე თავდაცვის სამინისტროდან, უსაფრთხოების სამსახურიდან და ძალოვანი სტრუქტურებიდან, სადაც შეიარაღებული ჯგუფები ჰყავთ. აქედან გამოდინარე, ეს ინიცაიტივა ძალიან მნიშვნელოვანი და მომგებიანიც იქნება ბიზნესისთვის. თუნდაც, კერძო პიროვნება დაინტერესდება და ჩადებს რაღაც თანხას“, – განაცხადა ვახტანგ გომელაურმა.

ირაკლი ღარიბაშვილის ინციატივას მხარს უჭერენ ანალიტიკოსები და აცხადებენ, რომ ეს არის დროული ინიციატივა. ექსპერტი უსაფრთხოების საკითხებში ვახტანგ მაისაია ამბობს, რომ იარაღის წარმოება საქართველოზე დადებითად აისახება, რადგან ქართული იარაღის წარმოება ეკონომიკური განვითარების სტიმულას იძლევა.

„ძალიან ჯანსაღი, ამბიციური გეგმაა. ყველა ქვეყნის თავდაცვისუნარიანობა განისაზღვრება იმით, თუ რამდენად შეუძლია თავად უზრუნველყოს შეიარაღების ტიპების მიწოდება საკუთარი თავდაცვის ძალებისათვის. თუ საქართველომ შეძლო საკუთარი თავის დაკმაყოფილება საბრძოლო ტექნოლოგიებისა და შეიარაღების კუთხით, ეს ძალიან პოზიტიური მოვლენა იქნება. აღსანიშნავია, რომ სხვა ქვეყნის შეიარაღების იმპორტზე დამოკიდებულება უფრო დიდი საფრთხის შემცველია, ვიდრე საკუთარი შეიარაღების წარმოება.

საკუთარი იარაღის წარმოება ეკონომიკური განვითარების სტიმულს იძლევა. ჩვენმა მეზობელმა ქვეყნებმა: აზერბაიჯანმა და სომხეთმა უკვე დიდი ხანია განავითარეს აღნიშნული მიმართულება. აზერბაიჯანი კი უკვე იარაღის ექსპორტიორი ქვეყნების სიაშიც მოიაზრება. ასე რომ, თუ ჩვენ ამ ამბიციურ გეგმას განვახორციელებთ, ეს საქართველოს დიდ წარმატებას მოუტანს. აღნიშნული მიმართულება ძალიან აქტუალურია სამხედრო პოლიტიკის გატარებისა და წარმოების კუთხით“, – განაცხადა ვახტანგ მაისაიამ.

ექსპერტ მამუკა არეშიძის განცხადებით, მხოლოდ იმის გამო, რომ საქართველო საკუთარ ტყვია–წამალს არ აწარმოებს, ქვეყანა ათეულობით მილიონ დოლარს კარგავს.

„ჩვენი ქვეყანა იარაღს აწარმოებდა, ახლა კი სამხედრო ტექნიკას აწარმოებს, რასაც პერმანენტული სახე არ აქვს. ჩვენ ტყვია-წამლის წარმოება შგვიძლია თავისუფლად. იმის გამო, რომ ტყვია–წამალს არ ვაწარმოებთ, ყოველწლიურად რამდენიმე ათეულ მილიონ დოლარს ვკარგავთ. ვფიქრობ, რომ გარკვეული შეიარაღების წარმოება შეგვიძლია. ყოველწლიურად, თუ არ ვცდები, 60 მილიონი დოლარი იხარჯება სამხედრო ნივთების შეძენაში“, – განაცხადა მამუკა არეშიძემ.

„სპეცსამსახურების საქმიანობაზე საზოგადოებრი კონტროლის, საქართველოს ცენტრის“ თავმჯდომარე, ბესიკ ალადაშვილი არ იზიარებს კრიტიკოსების განცხადებას, რომ იარაღის წარმოება ომის მზადებას ნიშნავს. მისი თქმით, ღია ციფრებია, მსოფლიომ იცის რამდენი იარაღი გვაქვს, რამდენს ვყიდულობთ და რამდენს გვჩუქნიან. თუ ყიდვის მაგივრად, საქართველო იქნება მწარმოებელი, ეს რატომ არის ომისთვის მზადება, ამაში ლოგიკას ვერ ხედავს ალადაშვილი.

„ჯერ კიდევ 90–იანი წლების დასაწყისში, როდესაც საბჭოთა კავშირის დაშლა რეალური ჩანდა, მაშინაც, ვფიქრობ, რომ ჩვენ დამოუკიდებელი სამხედრო სამრეწველო პოტენციალი შეიძლებოდა გვქონოდა. ბუნებრივია, პატივს არ გცემენ თუ არ ხარ ძლიერი. სუსტს ყველა ჩაგრავს. გვინდა თუ არა, შეიარაღებული ძალები და ჩვენი თავდაცვის ძალები უნდა იყოს მცირე, მობილური და საქართველოს სამხედრო ეროვნული უსაფრთხოების სტრატეგიიდან უნდა გამოდიოდეს. მხოლოდ ისე არ უნდა ვქნათ, ჩვენ დავიწყოთ იარაღის წარმოება, იყოს უხარისხო და ძვირად ღირებული“, – აცხადებს for.ge–სთან საუბრისას ბესიკ ალადაშვილმა.

პოლიტოლოგ რამაზ საყვარელიძის განცხადებით, ყველაფერთან ერთად, საქართველოს გარშემო არიან მეზობლები, რომლებსაც ასევე ოკუპირებული აქვთ ტერიტორიები. ამ მეზობლებიდან, მისი თქმით, არც ერთი არ არის ხელებჩამოშვებული და გაცილებით ძლიერი სამხედრო პოტენციალი აქვს ორივეს, ვიდრე საქართველოს.

„ვგულისხმობ ამიერკავკასიის მეზობლებს და არა ჩრდილოეთს. სამხედრო პოტენციალის გაძლიერება არ ნიშნავს, რომ მაინც და მაინც ომს აპირებ. თავდაცვასაც სჭირდება სამხედრო პოტენციალი და არ არის გამორიცხული თავდაცვის პირობებში აღმოჩნდნენ. მეზობლები იმიტომ ვახსენე, რომ არც ისინი აპირებენ ომს, მაგრამ სამხედრო პოტენციალს ზრდიან. ისეთ რეგიონში ვართ, რონ ძალიან დიდი შანსია შეტევის განხორციელების. რუსეთი ყველაზე გამოცდილი მტერია, ჩვენ შეიძლება ასეთი მტერი თუ არა, აგრესორი მოგვევლინოს ბევრი სხვადასხვა მხრიდან“, – აღნიშნა for.ge–სთან საუბრისას რამაზ საყვარელიძემ.