20 ივნისს, რუსთაველის გამზირზე განვითარებულ მოვლენებთან დაკავშირებით, საქალაქო სასამართლოში მაგისტრი მოსამართლის თანდასწრებით გამოკითხეს გიგი უგულავა. გამოკითხვის დასრულების შემდეგ „ევროპული საქართველოს“ წევრმა აღნიშნა, რომ მას შეკითხვები დაუსვეს სახელმწიფო გადატრიალების საქმეზე. უგულავას განცხადებით, ხელისუფლებას სურს, რომ პარალელი გაავლონ ვარდების რევოლუციასთან.

„დამრჩა შთაბეჭდილება, რომ გამოძიება საგამოძიებო ნაწილის დონეზე საერთოდ გაუგებრობაშია. ფაქტია, პოლიტიკური ხელმძღვანელებისა და პროკურატურისა და შსს–ის ხელმძღვანელებისგან იძიებენ მისტიურ სახელმწიფო გადატრიალებას. ჩემი პირველი კითხვა გამოძიების მიმართ იყო, სახელმწიფო გადატრიალების საქმე საერთოდ არ ახსენეს და ჯგუფური ძალადობს ორგანიზების, 225–ე მუხლზე იყო, როცა დავაზუსტე, ეს სხვა საქმეა, ის სხვა საქმეა, არა ერთი საქმეა, თუმცა მუხლი არ იყო მითითებული.

ხელოვნურად არის დაჩეხილი ეს საქმე იმისთვის, რომ რაღაც გამოყონ, სადღაც მოეჭდიონ, რომ რაღაც გამოუვიდეთ, ხელებს აცეცებენ სიბნელეში, თვითონ არ იციან, რას აკეთებენ, ორკესტრირებულად აქვთ სურვილი, რომ ეს მონათლონ სახელმწიფო გადატრიალებად. მომიწია ისტორიული ექსკურსი ჩამეტარებინა გამოძიებისთვის. ხელისუფლების დაუოკებელი სურვილია, რომ პარალელი გაავლონ ვარდების რევოლუციასთან“, – განაცხადა გიგი უგულავამ.

გიგი უგულავა ამტკიცებს, რომ საქმეში ყველა სახელი და გვარი ერთ ქვაბშია ჩაყრილი და იმისდა მიხედვით, რომელი პოლიტიკოსის განეიტრალება მოუნდებათ, ამოწევენ გვარს. მისი თქმით, ბრალის წარდგენა–არწარდგენა ჩვენი პროკურატურის მხრიდან ივანიშვილის პირობებში არის პირობითობა.

„არაფერს შეცვლის, ვიქნები ამ საქმეზე ბრალდებული თუ მოწმე. რაც შეეხება მელიას გამოსვლას, მკითხეს ამაზე. ნიკა მელიას გამოსვლა ონლაინ საერთოდ არ მომისმენია. ეს გავიგე მეორე დღეს. მისი გამოსვლა პირადად მე არ მომეწონა, მაგრამ სრული პოლიტიკური უტიფრობა და სამართლებრივი თავხედობაა ის, რომ მისი გამოსვლა და შემდეგ განვითარებული ჩხუბი პარლამენტის წინ მონათლო სახელმწიფო გადატრიალებად. ეს სამართლებრივი ნონსენსია და პირად საუბრებში გამომძიებლებიც და მოსამართლეებიც ამას აღიარებენ, რომ ეს არის სამართლებრივი პროპაგანდისთვის და არა სამართლის დადგენისთვის წარმოებული გამოძიება“, – განაცხადა გიგი უგულავამ.

„ევროპული საქართველოს“ ადვოკატი, ალექსანდრე მგელაძე მისი დაცვის ქვეშ მყოფისთვის მოწმის სტატუსის შეცვლას და დაკავებას გამორიცხავს. მგელაძის განმარტებითვე, უგულავასთვის კითხვები სახელმწიფო გადატრიალებასთან დაკავშირებით არ დაუსვამთ.

„გადატრიალების მცდელობასთან დაკავშირებით კითხვები არ დასმულა. უფრო მეტსაც მოგახსენებთ, როცა მოსამართლემ თავიდან განმარტება გააკეთა, გვითხრა, რომ დაკითხვა მხოლოდ სისხლის სამართლის კოდექსის 225–ე მუხლთან დაკავშირებით მიმდინარეობდა. იმ ვითარებაში, რაც ჩემთვის ცნობილია, გამოვრიცხავ მოწმის სტატუსი შეეცვალოს გიგი უგულავას, თუმცა ხელისუფლება რას მოიმოქმედებს, ამის თქმას ვერ შევძლებ“, – აღნიშნა ალექსანდრე მგელაძემ.

საქალაქო სასამართლოში მივიდა 20–21 ივნისის მოვლენებისას ჯგუფურ ძალადობაში მონაწილეობის ბრალდებით დაკავებული ზურაბ ბუდაღაშვილის დედის, მაგული გობეჯიშვილის შეფასებით, სამართალი ყველასთვის ერთნაირი უნდა იყოს. მას კითხვა უშუალოდ გიგი უგულავასთან ჰქონდა და უნდოდა მოესმინა მისგან პასუხი – იყო თუ არა მისი შვილი დამნაშავე.

„მე მგონი, ბატონი გიგიც იგივე მუხლით იყო დაკითხვაზე დაბარებული. მაინტერესებს, ჩემი შვილი ციხეში რისთვის არის გამოკეტილი და რითი წარმოადგენს ჩემი შვილი სახელმწიფოსთვის საშიშროებას? თუ უნდათ, მე ჩავანაცვლებ მას. უგულავას ვერ დაველაპარაკე, მაგრამ მის ადვოკატს დაველაპარაკე და მისგან მივიღე პასუხი, რომ ჩემი შვილი დამნაშავე არ არის. პასუხმა ცოტა დამაკმაყოფილა და გული დამიმშვიდდა“, – განაცხადა მაგული გობეჯიშვილმა.

პარალელურად, შს სამინისტროში 20–21 ივნისის ღამის ეპიზოდთან დაკავშირებით დაკითხვა განახლდა. გამომძიებლებმა რუსთაველის 18 ნომერში მდებარე ღია კაფის მეპატრონე, მუნიციპალური ტრანსპორტის მძღოლი და მელიქიშვილის ქუჩაზე მცხოვრები მოწმეები დაკითხა. ავტობუსის მძღოლს, გენადი კოვზირელს აქციის მონაწილეები 20 ივნისს გზის ჩახერგვას აიძულებდნენ, თუმცა მათი იდენტიფიცირება არ შეუძლია, ვინაიდან მათ ნიღბები ეკეთათ.

„კოსტავას ქუჩაზე, არმისული ფილარმონიასთან გამაჩერეს და მომთხოვეს გზის გადაკეტვა. მათ ნიღბები ეკეთათ და სახეზე ვერ დავინახე. ავტობუსში ისხდნენ მგზავრები. შემეშინდა ერთ მომენტში, რადგან დავინახე, რომ ისინი ქუჩაში ცეცხლს უკიდებდნენ ყუთებს და შეიქმნა საშიშროება ავტობუსი აალებულიყო, ვინაიდან ის გაზზე მუშაობს“, – განაცხადა გენადი კოვზირელმა.

შსს–ში იმყოფებოდა მელიქიშვილის 13 ნომერში ცხოვრები მარიამ ბაშალეიშვილი, რომლის განცხდებით, დაახლოებით 21 ივნისს, 03:00 საათზე, აქციის მონაწილეთა ნაწილი მელიქიშვილის ქუჩაზე იმყოფებოდა, ისინი ხმაურობდნენ, რის გამოც ის საკუთარი სახლის აივანზე გამოვიდა. როგორც ბაშალეიშვილი აცხადებს, მისმა გამოჩენამ აქციის მონაწილეთა ნაწილის აგრესია გამოიწვია.

„ხმაურზე გამოვედი აივანზე და რომ დამინახეს, მთხოვეს ჩავსულიყავი და შევერთებოდი მათ. ამის შემდგომ დამიწყეს გინება, მესროლეს ქვა, რომელიც შემთხვევით ავიცილე. მესროდნენ ნაგვის პარკებს და სხვადასხვა ნივთებს. შემდგომ დავინახე, რომ ისინი სროლას პოლიციის მისამართით აგრძელებდნენ. სახეზე არავინ დამინახავს, მათ ნიღბები ეკეთათ“, – განაცხადა მარიამ ბაშალეიშვილმა.

ამ საქმეში საინტერესო დეტალია ის, რა ხდებოდა 20 ივნისს უკვე პარლამენტის შენობაში. გამოძიება მუშაობს რეკორდული რაოდენობით საშვის დაშვებაზე. როგორც ირკვევა, ძირითადად საშვი გამოწერილია „ნაციონალური მოძრაობის“ წევრებზე და ამ მიმართულებით დეპუტატები – სალომე სამადაშვილი და თინა ბოკუჩავა აქტიურობდნენ.

გიგი უგულავას თანაპარტიელი, გიგა ბოკერია 20 ივნისს პარლამენტის დაცვის გაძლიერების მიზეზად პოლიტიკური პარტიების მხრიდან საშვების დაშვების გაათმაგებული შემთხვევების დასახელებას ანეკდოტს უწოდებს და აღნიშნულს აბსურდულ ამბად მიიჩნევს.

„უნდა გადავხედო რამდენი საშვი მაქვს დაშვებული და ვის დავაბრალო ეს ყველაფერი. ამაზე სერიოზული პასუხი ძალიან მიჭირს. ტრაგიკული ღამე რომ არ ყოფილიყო, სადაც ადამიანებმა თვალი დაკარგეს, კონტექსტი რომ არ ჰქონდეს ტრაგიკული, ანეკდოტი იქნებოდა.

ეს ყველაფერი რომ ჩაივლის, არჩევნებში რომ დამარცხდება ივანიშვილის ძალა და ისტორიას ჩავაბარებთ, როგორც ჩვენი ბებიები ამბობდნენ–წყალს გავატანთ ამ ცუდ ამბავსო, მერე გავიხსენოთ ეს, როგორც ამ ხელისუფლების ანეკდოტები. დღეს, ამ აბსურდულ ამბავს სერიოზულად არ აღვიქვამ“, – აცხადებს გიგა ბოკერია.

ოპოზიციონერი დეპუტატების მიერ გაათმაგებული რაოდენობის საშვების გამოწერა იყო ერთ–ერთი საკითხი, რაზეც შს მინისტრი გიორგი გახარია ექსპერტებს ესაუბრა. უსაფრთხოების საკითხებში ექსპერტის, ამირან სალუქვაძის განცხადებით, შეხვედრაზე გიორგი გახარიამ ისაუბრა, თუ რატომ მიიღეს ეს გადაწყვეტილება, თუ რატომ უნდა გაეძლიერებინათ პარლამენტის დაცვა. მისი თქმით, ამის ერთ–ერთი ინდიკატორი იყო გაათმაგებული რაოდენობით საშვების გამოწერა სხვადასხვა პოლიტიკური პარტიების მხრიდან.

„მან ციფრებიც კი დაასახელა, რომ საშუალოდ დღეში თუ, მაგალითად, რომელიმე პარტია 2–3 საშვს უშვებდა, ამ შემთხვევაში დეპუტატები ახდენდნენ 10 და მეტი საშვის დაშვებას. მთლიანობაში, ეს, რა თქმა უნდა, საკმაოდ დიდ ციფრს მიიღებდა. დავუშვათ, რომ 30–40–მა დეპუტატმა 10–20 ადამიანი რომ შეიყვანოს, გამოდის რამდენიმე ასეული მხარდამჭერი შიგნით. ეს იყო ერთ–ერთი მიმანიშნებელი, რის გამოც მიიღეს ის ზომები, რაც მიიღეს“, – განაცხადა ამირან სალუქვაძემ.

მისი თქმით, შეხვედრაზე გიორგი გახარიამ თქვა, რომ შესაძლოა, 20 ივნისის ღამეს გარკვეულწილად პანკისის მოვლენებმაც იმოქმედა, როცა პატარა რეზინის ტყვიებმა ზეგავლენა ვერ მოახდინა.

„პირველ რიგში ვთქვათ ის, რომ როცა კომენტარს აკეთებ, მოსახლეობა შეცდომაში არ უნდა შეიყვანო და არ უნდა თქვა, რომ ეს არის დათვის საწინააღმდეგო ტყვია. ნებისმიერი იარაღი, რასაც პოლიციელი იყენებს, შეიძლება აღმოჩნდეს ლეტალური, გააჩნია როგორ გამოვიყენებთ. მინისტრმა თქვა, რომ შესაძლოა, 20 ივნისის ღამეს გარკვეულწილად იმოქმედა პანკისის მოვლენებმა, როცა პატარა რეზინის ტყვიებმა ზეგავლენა ვერ მოახდინა. შეცდომები არის ტყვიების გამოყენების ნაწილში და არა მის სახეობებში.

ჩვენ შევთავაზეთ, რომ კარგი იქნება უცხოელი სპეციალისტების მოწვევა, მეტი სანდოობისთვის, რომ ცალკეული მომენტები, სადაც კითხვები გაჩნდება გამოძიების დროს, იყოს შეფასებული მათ მიერ. გახარიამ ასევე აღნიშნა, რომ იყო შემთხვევები, სადაც არის ძალის გადამეტება, ანუ არ იყო აუცილებლობა და ვიღაცას დაავიწყდა, რომ ადამიანთან აქვს საქმე, მერე რა, რომ ის აპროტესტებდა და ერთი საათის წინ პოლიციელს ურტყამდა, სპეცრაზმელს აქვს თმენის ვალდებულება. გახარიამ ისიც აღნიშნა, რომ ეს ტყვიები, ნაყიდია 2012 წელს, წინა ხელისუფლებამ შეისყიდა არჩევნებამდე სამი თვით ადრე“, – განაცხადა for.ge–სთან საუბრისას ამირან სალუქვაძემ.

ექსპერტი თორნიკე შარაშენიძე აცხადებს, რომ გიორგი გახარია ამბობს, რომ ბოლო მომენტამდე პოლიცია ცდილობდა მხოლოდ კორდონით შეეჩერებინათ მომიტინგეების შტურმი, თუმცა მოწინააღმდეგე მხარე იყო ძალიან მომზადებული და როდესაც უკვე ძალიან გართულდა მათი შეკავება, იძულებულნი გახდნენ გამოეყენებინათ სპეციალური საშუალებები.

„ვიყავი იქ იმ ღამეს, წამოვედი მანამდე სანამ დაიწყებოდა ის უბედურება, რაც დაიწყო სადღაც 12 საათზე. არ მომწონდა რაც ხდებოდა იმიტომ, რომ ადგილი ჰქონდა პარლამენტში შევარდნის მცდელობას. ვხედავდი ამას, ეს ჩემთვის იყო მიუღებელი, მაგრამ შემდეგ რაც მოხდა, კიდევ უფრო იყო მიუღებელი, ვგულისხმობ დარბევას. როცა დაიწყო ეს დარბევა მე გამიკვირდა რაში სჭირდებოდათ.

გახარია ამტკიცებს, რომ უკვე რაღაც მომენტში ვეღარ აკავებდნენ და მოუხდათ მერე გამოყენება ამ ცრემლსადენი გაზის და რეზინის ტყვიების. ის ასე ამტკიცებს. ის ასევე ამბობს, რომ ბოლო მომენტამდე იმედი ჰქონდა, ფიზიკურად ასე ჯაჯგურით შეაკავებდნენ ამ მომიტინგეებს, რომლებიც როგორც თვითონ ამბობს, იყვნენ ძალიან კარგად მომზადებულები, ძალიან კარგად მოქმედებდნენ ტაქტიკურად, მაგრამ რაღაც მომენტში შეგვეშინდა, რომ უბრალოდ ვეღარ დავაკავებდითო -

„ისინი იყვნენ კარგად მომზადებული, კარგად იბრძოდნენ, გამოგლიჯეს ფარები პოლიციას. იმედი გვქონდა, შეგვეძლო ფიზიკურად ვმდგარიყავით და მოგვეგერიებინა, მაგრამ რაღაც მომენტში გაჩნდა საფრთხე, რომ ვეღარ ვიგერიებდით ამიტომაც გამოვიყენეთ ის საშუალებები, რამაც მოიტანა ეს უბედურება“ – ესაა რასაც თვითონ ყვება“, – აცხადებს თორნიკე შარაშენიძე.

ექსპერტ ლევან ნიკოლეიშვილის განცხადებით, მიმდინარე მოვლენები ადასტურებს, რომ „ნაციონალები“ და „ევრო ნაცები“ რევოლუციურ–პროვოკაციულ სცენარებზე კვლავ ფიქრობენ.

„ამ საქმეში კი მათი ერთერთი მთავარი იარაღი ისევ „რუსთავი 2“ პროპაგანდისტული მანქანაა, რომელსაც ცნობილი პროვაკოტორ–რეჟისორი ნიკა გვარამია ხელმძღვანელობს. გვარამია ჯერ კიდევ გენპროკურორობის დროს ქმნიდა საინტერესო სცენარებსა და ფილმებს (მარტო ნოემბრიდან ნოემბრამდე ღირს ერთ რამედ). იგი, თითქმის, ყველა არეულობის ხელშემწყობ–გამშუქებელი და მხარდამჭერია. ასევე ყველამ იხილა ცნობილი კადრები თუ როგორ ერთვება ე.წ. რევკომის თათბირში 20 ივნისის ღამეს პარლამენტის შენობასთან. ფაქტია, რომ ნიკა გვარამია არათუ პროვაკატორ-მავნებლობით გამოირჩევა, არამედ მთავარი კორდინატორი და ორგანიზატოია“, – აღნიშნა ლევან ნიკოლეიშვილმა.