მოსკოვში Meduza-ს ჟურნალისტის ივან გოლუნოვის მხარდამჭერ მსვლელობაზე რუსი ოპოზიციონერი ალექსეი ნავალნი დააკავეს. ამის შესახებ რუსული მედია წერს.
დაკავებულთა საერთო რიცხვი 30-ს აღემატება. ივან გოლუნოვის მხარდამჭერი მსვლელობა ადგილობრივი დროით 12:00 საათზე დაიწყო. მსვლელობის მონაწილეები მოსკოვის პოლიციის მთავარი სამმართველოს შენობისკენ მიემართებიან. მოსკოვის მერიას აქციის გამართვის ნებართვა არ გაუცია.
Meduza-ს ჟურნალისტის ივან გოლუნოვის მიმართ საქმის გამოძიება შეწყდა. ამის შესახებ რუსეთის შინაგან საქმეთა მინისტრმა ვლადიმირ კოლოკოლცევმა განაცხადა.
გამოცემა Мeduza-ს კორესპონდენტს ივან გოლუნოვს ბრალი დიდი რაოდენობით ნარკოტიკების ფლობასა და გასაღების ფაქტზე წარუდგინეს. რუსეთის სისხლის სამართლის კოდექსით აღნიშნული ბრალდება 10-დან 20 წლამდე პატიმრობას ითვალისწინებს.
რუსი ჟურნალისტი, რომელიც მოსკოველი მაღალჩინოსნების კორუფციის საქმეს იძიებდა, პოლიციამ 6 ივნისს მოსკოვში დააკავა. 8 ივნისს მას შინაპატიმრობა მიუსაჯეს.
36 წლის ივან გოლუნოვი Мeduza-ს კორესპონდენტია. გამოძიების ცნობით, დაკავებისას მას ნარკოტიკული საშუალების შეკვრა აღმოუჩინეს, მეორე პაკეტს კი ჟურნალისტის სახლში მიაგნეს.
დამოუკიდებელი რუსულენოვანი ინტერნეტ-გამოცემა Meduza-ს ოფისი ლატვიის დედაქალაქ რიგაში მდებარეობს.
