უძრავი ქონების ბაზრის კვლევას უცნაური და არაორდინალური არაფერი უჩვენებია, მაგრამ რამდენიმე საინტერესო დეტალი მაინც გამოკვეთა. მაგალითად, ის, რომ დედაქალაქის ცენტრალურ უბნებში ბინები 3-ჯერ უფრო ძვირია, ვიდრე გარეუბნებში. წლეულს განსაკუთრებული შემთხვევაა, როდესაც ბაზარზე არჩევნების გავლენა არ იგრძნობა და ა.შ.

„ილიაუნი ბიზნეს რევიუმ“ და „ეკოპალიტრამ“ უძრავი ქონების ბაზარს სპეციალური კვლევა მიუძღვნა, თუმცა კვლევა მხოლოდ მეორად საცხოვრებელ კორპუსებში არსებული ბინებს შეეხებოდა. 

თითოეულ უბანში ათ-ათი ბინა შეირჩა: ორი - 1-ოთახიანი, ორი - 1,5-ოთახიანი, ორი - 2-ოთახიანი, ორი - 2,5-ოთახიანი, ერთი - 3-ოთახიანი და ერთიც - 4-ოთახიანი ბინები. 1 კვ/მ-ის საშუალო ღირებულების გამოსაყვანად ბინის საბაზრო ღირებულება საცხოვრებელი ფართობზე გაიყო. შეისწავლეს თბილისის 27 უბანი და სულ 270 საცხოვრებელი ბინის მონაცემი დამუშავდა.

გაირკვა, რომ რაც უფრო ნაკლებია ბინის ფართობი, მით უფრო მაღალია 1 კვ/მ-ის ფასი და შესაბამისად, 1-ოთახიან ბინაში 1 კვ/მ უფრო ძვირია, ვიდრე 4-ოთახიანში. ბინის ფასზე მოქმედებს მისი მდებარეობა, ბინის მდგომარეობა, აგრეთვე ტერიტორიაზე მიმდინარე სარეაბილიტაციო-სარეკონსტრუქციო სამუშაოები. ბინის ფასები განსაკუთრებით მაღალია მეტროს მიმდებარე ტერიტორიაზე. ფასები განსაკუთრებით გაზრდილია იქ, სადაც სარეკონსტრუქციო სამუშაოები მიმდინარეობს - ძველი თბილისის უბნებში, აღმაშენებლის გამზირზე.

თბილისში მეორადი საცხოვრებელი ბინები ყველაზე ძვირი ძველი თბილისის უბანსა და ვაკეში ღირს, სადაც 1 კვ ფართის ფასი 986 დოლარს შეადგენს. ვერაზე მეორადი ბინის შეძენა მოხმმარებელს 935 დოლარად შეუძლია, მთაწმინდა-სოლოლაკში ეს მაჩვენებელი 865 დოლარით განისაზღვრება. ვაჟა-ფშაველასა და ქავთარაძის ტერიტორიაზე ბინის ფასი 1 კვ/მ-ზე 837 დოლარია, ხოლო ჩუღურეთში - 831 დოლარი ღირს. ფასები მიახლოებულია ვაზისუბნისა და გლდანის შემთხვევაში და მისი მაჩვენებელი 473-474 დოლარამდეა.

ყველაზე დაბალფასიანი ბინები ლილოშია - 1 კვ/მ-ის ფასი 234 დოლარს შეადგენს, ხოლო ფონიჭალაში მეორადი უძრავი ქონების ფასი 1 კვ/მ-ზე, საშუალოდ, 381 დოლარამდეა.

კვლევის შედეგებს უძრავი ქონების სფეროს სპეციალისტების გამოეხმაურნენ. მათი შეფასებით, წლის მეორე კვარტალში მოთხოვნა მეტი წილი კვლავაც მეორად სეგმენტზე მოდის. ამის მიზეზი, მათი ვარაუდით, უსაფრთხოების მეტი გარანტიაა, რაც დასრულებულ ბინას აქვს.

კომპანია „ბონუსის“ ხელმძღვანელი ილია ინაშვილი განმარტავს, რომ უძრავი ქონების ბაზარზე მიმდინარე სეზონი პასიურია.  „მოთხოვნა მეტ-ნაკლებად შენარჩუნებულია, მაგრამ ეს არ არის ის შედეგი, რომლის მოლოდინიც იყო. უძრავი ქონების ბიზნესისთვის ივლისი პასიური პერიოდია. ბინებზე მეტად მოთხოვნა კომერციულ ფართებზეა. რაც შეეხება ფასს, ვაკის შემთხვევაში ის 3000 დოლარსაც აღწევს. ძალიან ბევრი ფაქტორია, რომელიც ფასს განსაზღვრავს. მაგალითად, საცხოვრებელი ფართი, აგრეთვე მომხმარებლის ინტერესს იპყრობს კეთილმოწყობილი ეზო და სადარბაზო (ვაკეში მდებარე საცხოვრებელი კორპუსების ნაწილს ეზო საერთოდ არ აქვს), ბინის განლაგება და სხვა.

ამასთან, წლეულს განსაკუთრებული შემთხვევაა, როდესაც არჩევნების გავლენა არ იგრძნობა. რატომღაც ქვეყნისთვის ამ მნიშვნელოვანი პოლიტიკური პროცესი უძრავი ქონების არც ფასზე აისახა და არც მოთხოვნაზე. ვერაფერს გეტყვით, როგორი იქნება არჩევნების შემდგომი პერიოდი“, - ამბობს ილია ინაშვილი.

თუმცა, სულ განსხვავებულ შედეგებს აქვეყნებს საჯარო რეესტრი. მათი ინფორმაციით, მაისში, უძრავი ქონების ბაზარზე 51 243 სარეგისტრაციო ტრანზაქცია შესრულდა. აქედან, პირველადი სარეგისტრაციო ტრანზაქციების რაოდენობამ 11 079, ხოლო მეორადის - 40 164 ერთეული შეადგინა.

წინა თვესთან შედარებით ტრანზაქციების რაოდენობა 38,2%-ით გაიზარდა: ზრდა დაფიქსირდა როგორც პირველადი (60,8%-ით), ისე მეორადი (33%-ით) სარეგისტრაციო ტრანზაქციების რაოდენობის მიხედვით.

2011 წლის მაისთან შედარებით, კი ტრანზაქციების რაოდენობა 15,5%-ით გაიზარდა. გასული წლის მაისში განხორციელებული სარეგისტრაციო ტრანზაქციების 82,4%-ს მეორადი, ხოლო 17,6%-ს - პირველადი სარეგისტრაციო ტრანზაქციები შეადგენდა.

თუმცა, უკვე ყველასთვის კარგად არის ცნობილი, რომ უძრავი ქონების ბაზარზე ტრანზაქციების მატება მოსახლეობის კუთვნილი ქონების ვალში გაყიდვის შედეგია. ამ კუთხით განსაკუთრებით აქტიურობენ ბანკები, რომელებმაც ჯერ უზარმაზარი ვალი წამოკიდეს ხალხს, ახლა კი დიდი სისწრაფით ისაკუთრებენ მათ ქონებას.