„საარჩევნო გარემო არის ისეთი, როგორიც ზოგადად ევროპულ ქვეყნებში და რაიმე არსებითი განსხვავება ევროპულ საზოგადოებაში შექმნილ კანონმდებლობასა და ჩვენს კანონმდებლობას შორის არ არსებობს“, - ეს განცხადება presage.tv-თან საუბრისას საპარლამენტო უმრავლესობის ერთ-ერთმა ლიდერმა პავლე კუბლაშვილმა საია-ის მიერ განხორციელებული მონიტორინგის შედეგად გაკეთებული დასკვნის საპასუხოდ გააკეთა, რომლის თანახმად
„საარჩევნო გარემო საკმაოდ უთანასწოროა ხელისუფლების სასარგებლოდ და მართველი გუნდი საკუთარი კანდიდატების მხარდასაჭერად საბიუჯეტო და ადმინისტრაციული რესურსების სრულ მობილიზაციას ახდენს“.
ამ მონიტორინგის მიზანი წინასაარჩევნო ტენდენციების გამოვლენა და იმის დადგენა იყო, რამდენად თანაბარი და კონკურენტული გარემოა შექმნილი პოლიტიკური პარტიებისთვის.
კვლევა სამთვიანი პერიოდის განმავლობაში, იანვრიდან მარტის ბოლომდე, საქართველოს ოთხ ქალაქში - ბათუმში, ქუთაისში, გორსა და თბილისში ჩატარდა.
შედეგები კი საკმაოდ შემაშფოთებელი აღმოჩნდა, რადგან დასკვნის თანახმად, საარჩევნო გარემო საკმაოდ უთანასწოროა. ყველაზე მნიშვნელოვანი ხარვეზი კი ადმინისტრაციული რესურსის ხელისუფლების საარჩევნო კამპანიისთვის გამოყენებაა. ასევე პოლიტიკური მოტივის გამო მოქალაქეთა სამსახურებიდან განთავისუფლების ფაქტები. სახელმწიფო და ადგილობრივ ბიუჯეტებში „სხვა ხარჯების“ კატეგორიის გაზრდა, რომლითაც, შესაძლოა, ამომრჩეველზე ორიენტირებული ღონისძიებები დაფინანსდეს და ა.შ.
საიას წარმომადგენლები ამ პრობლემებს საკმაოდ მნიშვნელოვნად მიიჩნევენ და აცხადებენ, რომ ამის გამოსწორების გარეშე არჩევნები სამართლიანად ვერ ჩატარდება.
რა არგუმენტები აქვს ამ პრობლემებთან დაკავშირებით ხელისუფლებას და რა შანსი არსებობს იმისთვის, რომ ეს დარღვევები შეწყდეს, ამ საკითხებთან დაკავშირებით presage.tv პარლამენტის იურიდიულ საკითხთა კომიტეტის თავმჯდომარეს, პავლე კუბლაშვილს ესაუბრა.
პავლე კუბლაშვილი: მე ამ დასკვნას დეტალურად არ გავცნობივარ. თუმცა, იმ ინფორმაციების საფუძველზე, რაც მე მაქვს, ვფიქრობ, ეს დასკვნა არასწორი შეფასებების შედეგად არის გაკეთებული. ამ შემთხვევაში ვგულისხმობ კონკრეტულ მაგალითს ვაუჩერებთან დაკავშირებით. როდესაც ვსაუბრობთ იმაზე, რომ სახელმწიფო ბიუჯეტიდან ვაუჩერები იქნას გამოყოფილი, რათა ჩვენს მოქალაქეებს გავუწიოთ დახმარება მძიმე ზამთრის პირობებში, ამის შერაცხვა ადმინისტრაციული რესურსის გამოყენებად, საკითხისადმი უკიდურესად ტენდენციური მიდგომაა.
ჩვენი მიზანი, მიუხედავად იმისა, თუ როგორია პოლიტიკური პროცესი, არის საარჩევნო წელი თუ არ არის, არის ჩვენი მოსახლეობის, ჩვენი მოქალაქეების პრობლემების მოგვარება და ამას ვერ შეზღუდავს ვერანაირი ჩანაწერი საარჩევნო კოდექსში. ვერანაირი რაღაც ზოგადთეორიული მსჯელობები ადმინისტრაციულ რესურსთან დაკავშირებით. დიახ, სახელმწიფო არის ვალდებული ვაუჩერის გზით, ან რაიმე სხვა ფორმით გვერდში დაუდგეს თავის მოქალაქეებს, რომლებსაც ძალიან უჭირთ.
ასეთივე ლოგიკით ჩვენმა ახალგაზრდა იურისტებმა, შეიძლება, ადმინისტრაციული რესურსის გამოყენებად ჩათვალონ ის, რომ საარჩევნო წელს რიგდება პენსიები, რიგდება სოციალური დახმარებები, რიგდება შემწეობები, რიგდება ხელფასები და ა.შ. მაშინ გამოდის, რომ ესეც ადმინისტრაციული რესურსის გამოყენებაა. არ შეიძლება სახელმწიფო ბიუჯეტიდან გაწეულ ხარჯებთან დაკავშირებით საუბარი როგორც ადმინისტრაციულ რესურსზე.
საია-ში ამბობენ, რომ ეს ვაუჩერები მაინცდამაინც საარჩევნო წელს რიგდება. თქვენ, როგორც იურისტი და პარლამენტის იურიდიულ საკითხთა კომიტეტის თავმჯდომარე, პენსიების და ხელფასების დარიგებასა და საარჩევნო წელს ვაუჩერების დარიგებაში განსხვავებას ვერ ხედავთ?
- ორივე კეთდება მოსახლეობისთვის. თუმცა, არც იმას გამოვრიცხავ, რომ არის ფაქტები, რომელთან დაკავშირებით ინფორმაციები დასაზუსტებელია და ჩვენ მზად ვართ, რომ არასამთავრობო ორგანიზაციებთან ერთად ვიმსჯელოთ ყველა ამ თემაზე და საბოლოო ჯამში, კიდევ ერთხელ შევქმნათ ისეთი სიტუაცია, როდესაც არავის არ ექნება საშუალება, რომ საარჩევნო გარემოსთან დაკავშირებით რაიმე სპეკულაციები დაიწყოს, ან რაიმე ფორმით არასწორი ინფორმაცია მიაწოდოს და საზოგადოება შეცდომაში შეიყვანოს. ამ შემთხვევაში არ ვგულისხმობ არც საია-ს და არც სხვა საერთაშორისო ორგანიზაციებს, ან არასამთავრობო ორგანიზაციებს. უბრალოდ ვფიქრობ, რომ ხშირ შემთხვევაში პოლიტიკური პარტიები რაღაც ტერმინებზე აპელირებით ცდილობენ, რომ საზოგადოება დააბნიონ და შეცდომაში შეიყვანონ.
რა თქმა უნდა, არც ერთ შემთხვევაში არ შეიძლება დღეს საუბარი რაიმე ფორმით ტენდენციურობაზე ან მიკერძოებულობაზე რომელიმე პარტიის სასარგებლოდ.
სამსახურიდან ადამიანების პოლიტიკური ნიშნით გათავისუფლებაც არ ხდება?
- მე ეს ინფორაცია არა მაქვს და ამიტომ ვამბობ, რომ, ალბათ, დეტალურად უნდა ვნახოთ თითოეულ საკითხთან დაკავშირებით, თუ სად რა ხდება. დარწმუნებული ვარ, რომ პოლიტიკური ნიშნით განთავისუფლებები არ არის. თუმცა, თუ სადღაც ასეთი ეჭვი არსებობს, ჩვენ ამ ეჭვებთან დაკავშირებით შესაბამისი ინფორმაცია უნდა მივაწოდოთ საზოგადოებას იმისთვის, რომ ეს კითხვის ნიშნები არ დარჩეს.
ამ ანგარიშის მიხედვით, კონტროლის პალატის ბოლოდროინდელი ქმედებები მანდატის ფარგლებს გასცდა და მოქალაქეთა პოლიტიკური ნიშნით მასობრივი დევნის სახე შეიძინა...
- მე ვფიქრობ, რომ მთავარი ხარვეზი რაც იყო, ამ შემთხვევაში უკავშირდება ინფორმაციის ნაკლებობას, რომელიც აქვს საზოგადოებას და ამაზე კონტროლის პალატის თავმჯდომარემაც გააკეთა განცხადება, როდესაც პარლამენტში იყო მოსული.
დიახ, საზოგადოებისთვის უფრო მეტი ინფორმაცია უნდა მიგვეწოდებინა და ამასთან დაკავშირებით ჩვენ შევიმუშავეთ ახალი მექანიზმი. უფრო სწორად, ეს იყო კონტროლის პალატის შემოთავაზება, რომ მსგავს შემთხვევებში აუცილებლად მოხდება ჩანაწერების გაკეთება, აუცილებლად მოხდება კონკრეტულ კითხვებთან დაკავშირებით ინფორმაციის მიწოდება, აუცილებლად იქნება ვიდეოჩანაწერები, ადვოკატის დასწრების შესაძლებლობა და ა.შ. ეს ყველაფერი უკვე დეტალური „გაიდლაინების“ დონეზე იქნება ჩამოყალიბებული და მიეწოდება ყველა დაინტერსებულ პირს.
ანუ თქვენ ფიქრობთ, რომ საქართველოს საარჩევნო გარემო თანაბარია?
- მე ვფიქრობ, რომ საარჩევნო გარემო არის ისეთი, როგორიც ზოგადად ევროპულ ქვეყნებში და რაიმე არსებითი განსხვავება ევროპულ საზოგადოებაში შექმნილ კანონმდებლობასა და ჩვენს კანონმდებლობას შორის არ არსებობს.
