ბოლო სამი წლის განმავლობაში არ ყოფილა არც ერთი შემთხევევა, რომ საკონსტიტუციო სასამართლოს ნორმის შეჩერების მოთხოვნა მხარეთა მონაწილეობის გარეშე დაეკმაყოფილებინოს, - ამის შესახებ ჟურნალისტებს პარლამენტის იურიდიულ საკითხთა კომიტეტის თავმჯდომარემ ვახტანგ ხმალაძემ განუცხადა.
ხმალაძემ მედიასთან საუბრისას ის მიზეზები განმარტა, რომელთა საფუძველზეც პარლამენტი "რუსთავი2"-ის მიერ საკონსტიტუციო სასამართლოში შეტანილ სარჩელებზე ორი მოსამართლის - კოლეგიის თავმჯდომარის, კონსტანტინე ვარძელაშვილისა და ამავე კოლეგიის წევრის, მაია კოპალეიშვილის აცილებას ითხოვს.
ხმალაძე სამართლებრივ-პროცედურულ საკითხებსა და პერსონალურ ურთიერთობებზე ამახვილებს ყურადღებას.
"სასამართლოს გადაწყვეტილებების შეფასებისგან ყოველთვის თავს ვიკავებ მაშინ, როცა ხელისუფლების წარმომადგენელი ვარ, მაგრამ როცა საუბარია საკონსტიტუციო სასამართლოზე, აქ პარლამენტი არის საპროცესო მხარე – მოპასუხე ამ შემთხვევაში პარლამენტია. აქ პარლამენტი არა მარტო უფლებამოსილია, არამედ ვალდებულიც არის ყველა ის მექანიზმი გამოიყენოს, რომელიც სასამართლო განხილვისას მხარეს აქვს. ამ შემთხვევაში ჩვენ საფუძვლიანი ეჭვი შეგვექმნა კოლეგიის თავმჯდომარის, ბატონ ვარძელაშვილისა და კოლეგიის წევრის, ქალბატონი კოპალეიშვილის არაობიექტურობასა და მიკერძოებულობაზე. შუამდგომლობაში დაწვრილებით არის აღწერილი მთელი პროცესი, რამაც ეჭვის წარმოქმნა გამოიწვია. პირველი რიგში, ეს წმინდა პროცედურული საკითხებია: - "რუსთავი2"-ის გარდა, იგივე საკითხი კიდევ ორ სუბიექტს ჰქონდა გასაჩივრებული. ერთმა სარჩელი უფრო ადრე შეიტანა, ვიდრე "რუსთავი2"-მა. მეორემ სარჩელი შეიტანა უფრო გვიან, ვიდრე "რუსთავი2"-მა. სასამართლომ ეს ორი სარჩელი, გარდა "რუსთავი2"-ის სარჩელისა, გააერთიანა და მათ განსახილველად გამწესრიგებელი სხდომა დანიშნა – ვიტყოდი, უპრეცედენტოდ მოკლე დროში, ერთი სამუშაო დღეც კი არის იყო დარჩენილი ჩვენთვის შეტყობინებასა და სხდომას შორის. ამ დროს არანაირი ინფორმაცია არ იდო "რუსთავი2"-ის სარჩელის თაობაზე. უფრო მეტიც, ჩვენს წარმომადგენელს ეუბნებოდნენ, რომ სარჩელი ჯერ დარეგისტრირებული არ იყო. შემდგომ აღმოჩნდა, რომ სარჩელი დარეგისტრირებული იყო. სარჩელი, რომელიც იმავე საკითხს ეხებოდა, არ გააერთიანეს უფრო ადრე და უფრო გვიან შეტანილ სარჩელებთან. გარდა ამისა, პირველ ორ სარჩელზე სხდომა დანიშნული იყო ორშაბათს, დილით და როცა ჩვენი წარმომადგენელი სხდომაზე მივიდა, გამოაცხადეს, რომ მოსარჩელეებმა სარჩელზე უარი თქვეს და შესაბამისად, გამწესრიგებელი სხდომა აღარ შედგებოდა. ამის შემდეგ ჩვენს წარმომადგენლეს სასამართლოდან დაურეკეს და უთხრეს, რომ 12:00 საათისათვის გამოცხადდება სასამართლოს განჩინება ან საოქმო ჩანაწერი "რუსთავი2"-ის სარჩელთან დაკავშირებით. ეს მოხდა გამოცხადებამდე 20 წუთით ადრე და გამოცხადდა, რომ დაკმაყოფილდა სარჩელი ნორმის მოქმედების შეჩერების ნაწილში და მიიღო არსებითად განსახილველად. აქვე დავამატებ, რომ პირველ-ორ სარჩელზე დანიშნული იყო ზეპირი მოსმენა, ანუ განხილვა მხარეების მონაწილეობით. "რუსთავი2"-ის სარჩელი განიხილეს მხარეთა დასწრების გარეშე. უფრო მეტიც, მოპასუხე მხარემ არც კი ვიცოდით, რომ ასეთი სხდომა იმართებოდა", - განუცხადა ჟურნალისტებს ვახტანგ ხმალაძემ.
იურიდიულ საკითხთა კომიტეტის თავმჯდომარე კონსტანტინე ვარძელაშვილისა და მაია კოპალეიშვილის ნიკა გვარამიასთან პიროვნულ ურთიერთობებზეც ამახვილებს ყურადღებას.
"ამ ორ მოსამართლეს მრავალი წლის განმავლობაში ძალიან მჭიდრო ურთიერთობა ჰქონდათ ბატონ ნიკა გვარამიასთან. ერთ-ერთი მათგანი იყო მისი მოადგილე, როდესაც გვარამია იუსტიციის მინისტრი გახლდათ. შემდგომ იყო მისი მოადგილე, როცა გვარამია გახლდათ განათლების მინისტრი. კოლეგიის თავმჯდომარე მოსამართლე წლების განმავლობაში იუტიციის მინისტრის მოადგილე იყო. იყვნენ ერთი და იმავე პოლიტიკური გუნდის წევრები. შესაძლოა ეს ამანც განაპირობა, მაგრამ აქ მთავარია, თუ როგორ მოხდა სხვადასხვა მოსარჩელის მიერ წარდგენილი სარჩელების განხილვა. ბოლო სამი წლის განმავლობაში არ ყოფილა არც ერთი შემთხევევა, რომ სასამართლოს დაეკმაყოფილებინოს ნორმის შეჩერების მოთხოვნა მხარეთა მონაწილეობის გარეშე", - განაცხადა ვახტანგ ხმალაძემ.
