საჯარო რეესტრის ეროვნულმა სააგენტომ თბილისის საქალაქო სასამართლოს განჩინება შპს სამაუწყებლო კომპანია "რუსთავი 2"-ში დროებითი მმართველების დანიშვნის თაობაზე უკვე აღასრულა. 
აღნიშნულთან დაკავშირებით საჯარო რეესტრის ეროვნული სააგენტო განცხადებას ავრცელებს, რომელშიც განმარტავს, რომ "რუსთავი 2"-ის რეგისტრირებულ მონაცემებში შესაბამისი ცვლილებები უკვე განხორციელებულია. უფრო კონკრეტულად, საჯარო რეესტრის ეროვნული სააგენტოს ინფორმაციით, დროებითი მმართველის უფლებამოსილებები და სასამართლოს განჩინებით დადგენილი შეზღუდვები დღეს, 6 ნოემბერს სამეწარმეო რეესტრში აისახა. 
"საჯარო რეესტრის ეროვნულ სააგენტოს წარედგინა ქიბარ ხალვაშის წარმომადგენლის პაატა სალიას განცხადება, რომლითაც მოთხოვნილ იქნა შპს ,,სამაუწყებლო კომპანია რუსთავი 2"-ის რეგისტრირებულ მონაცემებში ცვლილების რეგისტრაცია.
განცხადებას თან ერთვოდა თბილისის საქალაქო სასამართლოს 2015 წლის 5 ნოემბრის განჩინება (საქმეზე #2/15651-15) ამავე სასამართლოს მიერ 3 ნოემბერს მიღებული გადაწყვეტილების აღსრულების უზრუნველყოფის შესახებ (სამოქალაქო საპროცესო კოდექსის 271-ე და 193-ე მუხლები).
ეს განცხადება (#B15218092) და სასამართლოს განჩინება საჯარო რეესტრის ეროვნულ სააგენტოს წარედგინა 2015 წლის 5 ნოემბერს და გამოქვეყნდა სააგენტოს ოფიციალურ ვებგვერდზე (napr.gov.ge) 18 საათსა და 09 წუთზე.
5 ნოემბრის განჩინების თანახმად, კომპანია "რუსთავი 2"-ის საქმეზე საბოლოო გადაწყვეტილების მიღებამდე მხარეთა ინტერესების დაცვისათვის, ასევე, დავის მიმდინარეობისას კომპანია "რუსთავი 2"-ის ფინანსებისა და ქონების შენარჩუნებისა და კომპანია "რუსთავი 2"-ის პროფილით ნორმალურად ფუნქციონირების გაგრძელების უზრუნველსაყოფად, მისი ხელმძღვანელობის, მართვისა და წარმომადგენლობის მიზნით მოსამართლის გადაწყვეტილებით დანიშნულ იქნენ დროებითი მმართველები. ამავე განჩინებით, ყველა სხვა პირს დროებით შეუჩერდა აღნიშნული უფლებამოსილებები, სასამართლოს მიერ დროებითი მმართველის დანიშვნიდან მის გაუქმებამდე.
განჩინება, მისი სარეზულუციო ნაწილის მე-12 პუნქტის შესაბამისად, ექვემდებარებოდა დაუყოვნებლივ აღსრულებას. შესაბამისად, განჩინების მე-8 და მე-9 პუნქტების თანახმად, დროებითი მმართველის უფლებამოსილებები და ამავე განჩინებით დადგენილი შეზღუდვები აისახა სამეწარმეო რეესტრში.
საჯარო რეესტრის ეროვნულმა სააგენტომ, საქართველოს კონსტიტუციისა და მოქმედი კანონმდებლობის შესაბამისად დადგენილი წესით აღასრულა თბილისის საქალაქო სასამართლოს განჩინება 2015 წლის 6 ნოემბერს.
საჯარო რეესტრის ეროვნული სააგენტოს ეს გადაწყვეტილება შეიძლება გასაჩივრდეს თბილისის საქალაქო სასამართლოს ადმინისტრაციულ საქმეთა კოლეგიაში, აქტის გამოქვეყნებიდან 30 კალენდარული დღის ვადაში", - ნათქვამია საჯარო რეესტრის ეროვნული სააგენტოს განცხადებაში.