"ნაციონალური მოძრაობის" ერთ-ერთი ლიდერი გიგა ბოკერია დაკითხვაზეა დაბარებული. როგორც "ინტერპრსნიუსს" "ნაციონალურ მოძრაობაში" განუცხადეს, ბოკერია დაკითხვაზე ე.წ. მოდულის შენობაში , 18:30 საათზე უნდა გამოცხადდეს. ბოკერიამ უწყება ცოტა ხნის წინ ჩაიბარა.
როგორც საქართველოს სახელმწიფო უსაფრთხოების სამსახურის კონტრდაზვერვის დეპარტამენტის საგამოძიებო მთავარი სამმართველოს უწყებაშია აღნიშნული, ბოკერიას დაკითხვა მოწმის სახით იგეგმება საქმეზე "შეთქმულება საქართველოს სახელმწიფო ხელისუფლების დასამხობად ან ხელში ჩაგდების ფაქტზე".
ამასთან, საგამოძიებო უწყება ბოკერიას აფრთხილებს, რომ არასაპატიო მიზეზით გამოუცხადებლობის შემთხვევაში მის მიმართ გამოყენებული იქნება სამართლებრივი ხასიათის იძულებითი ღონისძიებები – დაკითხვაზე იძულებითი მიყვანისა და ფულადი სახდელის დაკისრების ჩათვლით.
უწყებაში ასევე განმარტებულია, რომ ბოკერიას აქვს უფლება დაკითხვაზე ადვოკატთან ერთად გამოცხადდეს, თუმცა ადვოკატის გამოუცხადებლობა არ შეაფერხებს საგამოძიებო მოქმედებების ჩატარებას. არსებული ინფორმაციით, ბოკერია დაკითხვაზე მისვლას აპირებს.
სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული ოპერატიულ-სამძებრო ღონისძიებებისა და მედიის მიერ გავრცელებული ინფორმაციის საფუძველზე გამოძიება დაიწყო.
როგორც "ინტერპრესნიუსს" სახელმწიფო უსაფრთხოების სამსახურიდან აცნობეს, გამოძიება საქართველოს სსკ-ის 315-ე მუხლის პირველი ნაწილით მიმდინარეობს, რაც გულისხმობს შეთქმულებას სახელმწიფო ხელისუფლების დასამხობად ან ხელში ჩასაგდებად.
"სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული ოპერატიულ-სამძებრო ღონისძიებებისა და მედიასაშუალებებში გავრცელებული ინფორმაციის საფუძველზე, დაიწყო გამოძიება საქართველოს სსკ-ის 315-ე მუხლის პირველი ნაწილით, რაც გულისხმობს შეთქმულებას სახელმწიფო ხელისუფლების დასამხობად ან ხელში ჩასაგდებად. დაწყებული გამოძიების ფარგლებში ჩატარდება ყველა საჭირო ოპერატიულ-სამძებრო და საგამოძიებო მოქმედებები", - აცხადებენ სახელმწიფო უსაფრთხოების სამსახურში.
მედიაში გუშინ გავრცელდა ინფორმაცია, რომლის თანახმადაც, თითქოსდა საქართველოს ყოფილი პრეზიდენტი მიხეილ სააკაშვილი უშიშროების საბჭოს ყოფილ მდივანს გიგა ბოკერიას 22 ოქტომბერს, სტამბულის ათა-თურქის აეროპორტში ესაუბრება. საუბრის სტენოგრამაში სააკაშვილისა და ბოკერიას მიერ საქართველოში სახელმწიფო გადატრიალების მომზადების გეგმაზეა საუბარი. მედიით გავრცელებულ სტენოგრამაში ასევე ნახსენებია საქართველოს პრეზიდენტი გიორგი მარგველაშვილიც.
