NDI-ის კვლევების სანდოობა ჩემთვის არის ნულის ტოლი, - ამის შესახებ "ინტერპრესნიუსს" შესაბამის საკითხზე კომენტირებისას საპარლამენტო უმრავლესობის ერთ-ერთმა ლიდერმა ირაკლი სესიაშვილმა განუცხადა.
მისივე მტკიცებით, აღნიშნული ორგანიზაციის მიერ ჩატარებული კვლევები საზოგადოების მანიპულაციის საშუალებად გამოიყენება.
"NDI-ისა და IRI-ის კვლევების სანდოობა ჩემთვის და დარწმუნებული ვარ საზოგადოების უდიდესი ნაწილისთვის არის ნულის ტოლი ერთი მარტივი მიზეზის გამო. სამწუხაროდ, ამ ორგანიზაციებთან პარტნიორი ადგილობრივი ორგანიზაციების წარმომადგენლები იყვნენ პირდაპირ "ნაციონალურ მოძრაობასთან" ასოცირებული ადამიანები, რომლებიც დღეს მათ რიგებში ირიცხებიან და ზოგიერთი მათგანი პარლამენტშიც კი არის. ამ კვლევებს მიხეილ სააკაშვილი თავის დროზე იყენებდა პოლიტიკური მანიპულაციისთვის, იმ თემების წამოწევისთვის, რომელიც მას აწყობდა. მათ შორის ეს არჩევნებისთვის მოსახლეობაზე ფსიქოლოგიური ზეწოლის საშუალებაა_ გაგახსენებთ, რომ 2012 წლის არჩევნების წინ NDI-ის კვლევების მიხედვით 42 %-იანი მხარდაჭერა ჰქონდა "ნაციონალურ მოძრაობას" და 10 %-იანი "ქართულ ოცნებას". როგორც NDI-ში აცხადებენ, მათი კვლევების შედეგების ცდომილება საშუალოდ 3 %-ია, მაგრამ, საბოლოო ჯამში, მარტო "ქართულ ოცნებასთან" მიმართებაში 50 %-იანი ცდომილება დაფიქსირდა", - განაცხადა ირაკლი სესიაშვილმა.
ამასთან, მმართველი გუნდის წარმომადგენელმა აღნიშნულ კვლევას "მოსახლეობის ნერვების მომშლელი" უწოდა და განმარტა, რომ ის "ნაციონალური მოძრაობის" სტრატეგიის ნაწილია.
"ჩემი აზრით, NDI-ის კვლევები მიზანმიმართულად პოლიტიკური ინტერესებისთვის გამოიყენება. ბოლო კვლევებს შემიძლია თამამად ვუწოდო, რომ ეს არის მოსახლეობის ნერვების მოსაშლელი, გამაღიზიანებელი კვლევები. პოლიტიკური სტრატეგია, რომლითაც "ნაციონალური მოძრაობა" მოქმედებს, გულისხმობს იმას, რომ საზოგადოების თვალში როგორმე ჩვენი ხელისუფლება წარმოჩინდეს როგორც არაფრისშემძლე, რომელსაც მოსახლეობის მხარდაჭერა არ აქვს. ძალიან საინტერესოა, რომ ამ კვლევებში მიზანმიმართულად მანიპულაციის საგანია ევრაზიული კავშირი. თუ საზოგადოება იფიქრებს, რომ 30 %-ზე მეტი უჭერს მხარს ევრაზიულ კავშირს, ეს პირდაპირ თუ არაპირდაპირ ქმნის იმის შთაბეჭდილებას, რომ პრორუსული განწყობები მატულობს, არადა, თუ პრორუსული განწყობები მატულობს, მაშინ რეალურად ამ კვლევაში ნინო ბურჯანაძეს უნდა ჰქონდეს ასეთივე მხარდაჭერა – 30 %-ზე მეტი რეიტინგი.
ერთი სიტყვით, თეთრი ძაფით არის ყველაფერი შეკერილი. მთავარია, ჩვენ საზოგადოებას ავუხსნათ, რომ ეს კვლევები არის მხოლოდ და მხოლოდ საზოგადოების პოლიტიკური მანიპულაციის საშუალება, რომელშიც, სამწუხაროდ, ამაში ჩართულია ძალიან პრესტიჟული ორგანიზაციები", - აღნიშნა ირაკლი სესიაშვილმა.
NDI-ის კვლევის მიხედვით, ხვალ რომ საპარლამენტო არჩევნები ტარდებოდეს, კოალიცია "ქართულ ოცნებას" მხარს გამოკითხულთა 11% დაუჭერდა, "ერთიან ნაციონალურ მოძრაობას" კი 13%.
