საქართველოს პრეზიდენტი გიორგი მარგველაშვილი ენერგოუსაფრთხოების საკითხის მთავრობის სხდომაზე განხილვას ითხოვს. ამის შესახებ "ინტერპრესნიუსს" პრეზიდენტის ადმინისტრაციიდან აცნობეს.
როგორც საქართველოს პრეზიდენტის ადმინისტრაციის მიერ გავრცელებულ მოკლე ინფორმაციაშია ნათქვამი, გიორგი მარგველაშვილი მთავრობის სხდომაზე "საქართველოს ენერგოუსაფრთხოებისა და ენერგომატარებლების ტრანზიტის სფეროში არსებული მდგომარეობის" განხილვას ითხოვს.
როგორც პრეზიდენტის ადმინისტრაციის უფროსის დავით პატარიას მიერ მთავრობის ადმინისტრაციის უფროსისადმი, მაია ცქიტიშვილისადმი გაგზავნილ წერილშია ნათქვამი, აღნიშნული საკითხის საქართველოს მთავრობის სხდომაზე განხილვას საქართველოს პრეზიდენტი გიორგი მარგველაშვილი და ეროვნული უშიშროების საბჭოს მდივანი ირინე იმერლიშვილი დაესწრებიან.
შეგახსენებთ, რომ ეს საკითხი აქტუალური მას შემდეგ გახდა, რაც ვიცე-პრემიერმა, კახი კალაძემ "გაზპრომის" ხელმძღვანელობასთან მოლაპარაკებები გამართა, ხოლო "გაზპრომმა" ქართულ მხარესთან კიდევ ერთ მოსალოდნელ შეხვედრაზე გააკეთა განცხადება.
