"ნაციონალური მოძრაობის" ინფორმაციით, შუალედური არჩევნებისთვის ოლქებში კანდიდატები არ ეყოლებათ და ცესკოში შესაბამისი რეგისტრაცია მხოლოდ იმ პრივილეგიებით სარგებლობის მიზნით გაიარეს, რომელიც არჩევნებში მონაწილე სუბიექტებს აქვთ.
როგორც "ინტერპრესნიუსს" პარტიის ერთ-ერთმა ლიდერმა ლევან თარხნიშვილმა განუცხადა, მათ შორის "ნაციონალური მოძრაობა" აპირებს ისარგებლოს უფასო სარეკლამო დროით, რასაც მათი ამოცანებისთვის გამოიყენებენ.
"ჩვენ არ ვიღებთ არჩევნებში მონაწილეობას, ანუ კანდიდატები არ გვეყოლება, რეგისტრაცია კი უბრალოდ იმისთვის გავიარეთ, რიმ ვისარგებლოთ იმ უფლებით, რაც აქვს რეგისტრაციაგავლილ პარტიას, მათ შორის ვისარგებლოთ უფასო დროით. ამას გამოვიყენებთ ჩვენი ამოცანებისთვის - მიგვაჩნია, რომ ქვეყანა არის კრიზისში და დღევანდელ ხელისუფლებას არ აქვს არც უნარი და არც სურვილი, რომ ქვეყანა ამ კრიზისიდან გამოიყვანოს. ამ სიტუაციაში ერთადერთ გამოსავლად გვესახება მთავრობის გადადგომა და რიგგარეშე არჩევნების დანიშვნა. სწორედ ამისთვის გამოვიყენებთ იმ უფლებებს და პრივილეგიებს, რაც აქვთ რეგისტრირებულ პარტიებს. როგორც თქვენ იცით, სწორედ შექმნილი ვითარებაა ჩვენი ბოიკოტის მიზეზი", - განაცხადა ლევან თარხნიშვილმა.
აღნიშნულ კონტექსტში, საპარლამენტო უმცირესობის წევრის თქმით, შუალედური არჩევნებისთვის "ნაციონალური მოძრაობის" საარჩევნო კამპანიის მიზანი იქნება მოსახლეობას დაანახონ, რომ გვყავს "აბსოლუტურად უუნარო მთავრობა".
"სხვა მხრივ, კანდიდატი არ გვეყოლება და ვუერთდებით იმ საპარლამენტო და არასაპარლამენტიო ოპოზიციას, რომელიც ცოტა განსხვავებული მიზეზის გამო, მაგრამ ასევე არ აპირებს არჩევნებში მონაწილეობის მიღებას", - აღნიშნა თარხნიშვილმა.
"ნაციონალურმა მოძრაობამ" გუშინ ცენტრალურ საარჩევნო კომისიაში პარლამენტის და საკრებულოს შუალედური არჩევნებისთვის შესაბამისი რეგისტრაცია გაიარა, რასთან დაკავშირებული ინფორმაციაც თავად ცესკოს ვებ-გვერდზეა განთავსებული.
საკრებულოს შუალედურ არჩევნებში "ნაციონალური მოძრაობა" "ქრისტიან-კონსერვატიულ პარტიასთან" ბლოკის სახით იქნება წარმოდგენილი, პარლამენტის შუალედურ არჩევნებზე კი – დამოუკიდებლად.
აქამდე გავრცელებული ინფორმაციით, "ნაციონალური მოძრაობა" შუალედურ არჩევნებს ბოიკოტს უცხადებდა და მასში მონაწილეობას არ გეგმავდა.
პარლამენტისა და საკრებულოს შუალედური არჩევნები ცენტრალური საარჩევნო კომისიის გადაწყვეტილებით 31 ოქტომბერს გაიმართება. პარლამენტის შუალედური არჩევნები მაჟორიტარული საარჩევნო სისტემით, #11 საგარეჯოს და #65 მარტვილის ოლქებში ჩატარდება, ხოლო ადგილობრივი თვითმმართველობის წარმომადგენლობითი ორგანოს, საკრებულოს შუალედური არჩევნები დმანისის, ვანის, ხობის და საგარეჯოს ადგილობრივ საარჩევნო ოლქებში.
