ელექტროენერგიის ტარიფის შენარჩუნების და მისი მოსალოდნელი გაზრდის თავიდან აცილების მიზნით, "ახალი პოლიტიკური ცენტრი" მთავრობას ორ კონკრეტულ წინადადებას სთავზობს.
როგორც პარლამენტის ოპოზიციონერი წევრი, ზურაბ ჯაფარიძე აცხადებს, საქართველოს ენერგეტიკაში სერიოზული პრობლემებია, აღინიშნება ამ სფეროში ინვესტიციების მნიშვნელოვანი ვარდნა და მოსალოდნელია სამომხმარებლო ტარიფების ზრდა.
"იმისათვის, რომ კიდევ უფრო არ გაუარესდეს გაჭირვებული მოსახლეობის ეკონომიკური მდგომარეობა და შენარჩუნებული იქნეს ელექტროენერგიაზე არსებული ტარიფები, საჭიროა გადაიდგას შემდეგი ორი ნაბიჯი: ჰიდროელექტროსადგურების მიერ გამომუშავებული ელექტროენერგია, ისევე როგორც ნებისმიერი სხვა განახლებადი ენერგია, უნდა გათავისუფლდეს დამატებითი ღირებულების გადასახადისგან. გენერაციიდან საბოლოო მომხმარებლამდე უნდა მოხდეს ელექტროენერგიაზე განსხვავებული ტარიფების დაწესება დღე-ღამისა და წლის სხვადასხვა პერიოდებზე, რაც ელექტროენერგიაზე პიკურ დატვირთვას გადაანაწილებს და მოთხოვნას შეამცირებს. დამატებითი ღირებულების გადასახადისგან გათავისუფლება, დიფერენცირებული სატარიფო პოლიტიკის შემოღებასთან ერთად, გაზრდის ენერგეტიკის სფეროს საინვესტიციო მიმზიდველობას, გააუმჯობესებს საქართველოს ენერგოსისტემის ხარჯეფექტურობას და ხელს შეუწყობს განახლებად ენერგიაზე დაფუძნებული ენერგოსისტემების განვითარებას. მთავრობის ხარჯების შემცირება, ენერგეტიკაში მეტი ფულის დატოვება, ენერგოეფექტურობის გაუმჯობესება და საინვესტიციო მიმზიდველობის ზრდა – ეს არის ერთადერთი სწორი გამოსავალი შექმნილი მძიმე ვითარებიდან", - აცხადებს ზურაბ ჯაფარიძე.
მისივე თქმით, თუ ხელისუფლება საპირისპირო გზას აირჩევს და ელექტროენერგიის ტარიფის სახელმწიფო ბიუჯეტიდან სუბსიდირებას შეეცდება, ეს ქვეყანაში არსებულ ეკონომიკურ პრობლემებს კიდევ უფრო გააღრმავებს და საქართველოს ენერგოსისტემის მდგრადობას საფრთხეს შეუქმნის.
