"თავისუფალი დემოკრატები" თავდაცვის მინისტრის, თინა ხიდაშელის პარლამენტის ნდობის ჯგუფის ფორმატში მოწვევას ითხოვენ. მათ ოფიციალური მიმართვა ნდობის ჯგუფის ხელმძღვანელის, ირაკლი სესიაშვილის სახელზე უკვე წარადგინეს.
"თავისუფალი დემოკერატების" მოთხოვნაა, ნდობის ჯგუფის ფორმატში შეხვედრა საფრანგეთთან გაფორმებულ ხელშეკრულებასთან დაკავშირებით გაიმართოს.
"ხელშეკრულება თავდაცვითი საჰაერო სისტემის გაძლიერებას ეხება. ნდობის ჯგუფს აქვს სრული ლეგიტიმაცია და მოვალეობა, მოიწვიოს თავდაცვის მინისტრი და ვიმსჯელოთ აღნიშნულ ხელშეკრულებაზე, ასევე იმის თაობაზეც, რომ როდესაც ეკონომიკური კრიზისი სახეზეა და მცირდება თავდაცვის ბიუჯეტიც, როგორ განხორციელდება ხელშეკრულება," - ამბობს "თავისუფალი დემოკრატების" ერთ-ერთი ლიდერი ზურაბ აბაშიძე.
თავის მხრივ, ნდობის ჯგუფის ხელმძღვანელი ირაკლი სესიაშვილი განმარტავს, რომ თავდაცვის მინისტრთან ნდობის ჯგუფის ფორმატში შეხვედრა პრობლემას არ წარმოადგენს. თუმცა, მისივე განმარტებით, შეხვედრის ფორმატი თავდაეცვის სამინისტროსთან დაზუსტდება.
ამასთან, როგორც სესიაშვილი აცხადებს, მომავალი კვირისთვის რამდენიმე საკითხთან დაკავშირებით ისედაც გეგმავს ნდობის ჯგუფის მოწვევას.
"დასამალი არაფერია, მით უფრო პარლამენტის ნდობის ჯგუფისათვის", - აღნიშნა ირაკლი სესიაშვილმა.
