მთავრობამ სრულიად საფუძვლიანად ჩათვალა, რომ სამაშველო სამუშაოებში საგარეო დახმარება არ გვჭირდებოდა, - ამის შესახებ ექსპერტებთან და არასამთავრობო ორგანიზაციების წარმომადგენლებთან შეხვედრაზე საქართველოს თავდაცვის მინისტრმა თინა ხიდაშელმა დასმულ შეკითხვაზე პასუხისას განაცხადა. კითხვა ეხებოდა იმას, თუ რატომ არ ჩაერთვნენ საერთაშორისო ორგანიზაციები, ნატო-ს ძალები სტიქიის შედეგად გამოწვეულ სამაშველო სამუშაოებში.
"სრულ კომუნიკაციაში ვართ საერთაშორისო ორგანიზაციებთან, ნაკლებად ნატო-სთან, რადგან საუბარი ამ ეტაპზე უფრო მიმდინარეობს საერთაშორისო დონორებთან, მათ შორის მსოფლიო ბანკთან და USAID-თან, იმისთვის, რომ სარეაბილიტაციო სამუშაოები სწრაფად წარიმართოს", - განაცხადა ხიდაშელმა.
მისივე თქმით, ასევე მიმდინარეობს საუბარი საერთაშორისო ორგანიზაციებთან საექსპერტო დახმარებისთვის.
