სავალუტო ფონდის მისია ბიძინა ივანიშვილის განცხადებაზე ჯერ კომენტარს არ აკეთებს

სავალუტო ფონდის მისია ბიძინა ივანიშვილის განცხადებაზე ჯერ კომენტარს არ აკეთებს

საქართველოში საერთაშორისო სავალუტო ფონდის მისია, საქართველოს ყოფილი პრემიერის, ბიძინა ივანიშვილის გუშინდელ განცხადებაზე ამ ეტაპზე კომენტარს არ აკეთებს. 
"ინტერპრესნიუსი" საქართველოში მისიის პრესსამსახურს დაუკავშირდა, სადაც განახადეს, რომ ამ ეტაპზე კომენტარი არ კეთდება. 

ბიძინა ივანიშვილმა ჟურნალისტებთან გუშინ განაცხადა, რომ საერთაშორისო სავალუტო ფონდის წარმომადგენელმა სთხოვა, ეროვნული ბანკის პრეზიდენტი გიორგი ქადაგიძე არ დაეკავებინათ და ეს თხოვნა გაითვალისწინა. 

"საერთაშორისო სავალუტო ფონდის წარმომადგენლის მხრიდან ეს თხოვნა პირად შეხვედრაზე დაფიქსირდა და მისი პოზიცია იყო, რომ რაც "მისი პირადია", შეუძლია, აპატიოს. 

"ქართუ ბანკის" საკითხი პირადი იყო. საერთაშორისო სავალუტო ფონდის წარმომადგენლებმაც იცოდნენ, რომ მან კანონი დაარღვია, ის კი არ უთქვამთ, დასაჭერი არ არისო. ჩვენ ვიცით, რომ ის დასაჭერია, მაგრამ იქნება აპატიოთო. მეც ვუთხარი, რომ რაც პირადულია, შემიძლია გავაკეთო და პროკურატურაში განცხადების მსვლელობა შევაჩერე, რაზეც ჯავახიშვილი ძალიან განაწყენდა, მაგრამ ვინც მთხოვა, იმასაც და თვითონ გიორგი ქადაგიძესაც განვუმარტე, რომ სახელმწიფოს წინაშე თუ აქვს დარღვევა ჩადენილი, მე ხელს ვერ დავაფარებდი", - განაცხადა ბიძინა ივანიშვილმა. 

ამასთან, არსებული ინფორმაციით, ბიძინა ივანიშვილი საუბრობს საერთაშორისო სავალუტო ფონდის მისიის ხელმძღვანელ მარკ გრიფითსის თხოვნაზე. შეხვედრა კი 2012 წლის ნოემბერში თბილისში, მთავრობის კანცელარიაში შედგა.