"ერთიანი ნაციონალური მოძრაობის" ყოფილი წევრი გოგა ხაჩიძე მისი და მისი კოლეგების მიერ პარტიის დატოვებას სოციალური ქსელში გამოეხმაურა.
როგორც გოგა ხაჩიზე "ფეისბუქის" საკუთარ გვერდზე წერს, ხვალ გამოქვეყნდება განცხადება, სადაც იქნება საჯარო განმარტება მათ მიერ მიღებული გადაწყვეტილების შესახებ. ხაჩიზე კვლავ ადასტურებს, რომ "მათთვის არ შეცვლილა ღირებულებები, არც ქვეყანაში არსებული რეალობის აღქმა, არც პოლიტიკური ხედვები და არც პოლიტიკური მოწინააღმდეგე".
"მეორე დღეა მოთმინებით ვადევნებ თვალს იმ გამოხმაურებას, რომელიც ჩემი და ჩემი კოლეგების "ნაციონალური მოძრაობადან" წამოსვლას მოჰყვა. უამრავი პატივსაცემი და გასათვალისწინებელი აზრი მოვისმინე, მრავალი შეფასება, ბევრი ვარაუდი და ცოტაც - იაფფასიანი სისულელე.
ხვალ, როგორც შეთანხმებულები ვიყავით, გამოვაქვეყნებთ განცხადებას და გავაკეთებთ საჯარო განმარტებას იმ მიზეზებზე, რის გამოც რეალურად გადავდგით ეს, არც თუ ისე მარტივი და კარგად გასააზრებული ნაბიჯი. როგორც გუშინ ზურა ჯაფარიძემ ხაზგასმით აღნიშნა - "ჩვენთვის არ შეცვლილა ღირებულებები, არც ქვეყანაში არსებული რეალობის აღქმა, არც პოლიტიკური ხედვები და არც პოლიტიკური მოწინააღმდეგე". დანარჩენს უახლოესი მომავალი გვაჩვენებს. წინ მნიშვნელოვანი საქმეებია", - წერს გოგა ხაჩიზე.
"ნაციონალური მოძრაობა" პარტიის ოთხმა წევრმა ზურაბ ჯაფარიძემ, გოგა ხაჩიძემ, პავლე კუბლაშვილმა და გიორგი მელაძემ გუშინ დატოვა.
