სახელმწიფო უსაფრთხოების სამსახურის ხელმძღვანელი არ უნდა იყოს სახელმწიფო პოლიტიკური თანამდებობის პირი, - ამის შესახებ განცხადება იურიდიულ საკითხთა კომიტეტის თავმჯდომდარემ ვახტანგ ხმალაძემ ჟურნალისტებთან საუბრისას გააკეთა.
ხმალაძის თქმით, პარლამენტი იწყებს მუშაობას ახალ კანონზე, რომლის მიხედვითაც, შინაგან საქმეთა სამინისტროსა და სახელმწიფო უსაფრთხოების სამსახურის ერთმანეთისგან გამიჯვნა უნდა მოხდეს.
"შინაგან საქმეთა სამინისტროს რეფორმა აუცილებელია სახელმწიფოს უსაფრთხოების უზრუნველყოფის თვალსაზრისით. რამდენიმე წლის წინ, როდესაც კონსტიტუცია იქნა მიღებული, პირდაპირ ჩაიწერა, აკრძალულია შინაგან საქმეთა სამინისტროს და სახელმწიფო უსაფრთხოების რაიმენაირი გაერთიანება. ეს ემსახურებოდა უსაფრთხოების უზრუნველყოფას იმ თვალსაზრისით, რომ ის სტრუქტურები რომელთაც აქვთ შეიარაღება და რომლებიც პასუხს აგებენ როგორც საგარეო, ასევე საშინაო უსაფრთხოებაზე, ერთ ხელში არ უნდა იყოს კონცენტრირებული. ასე იყო 2004 წლამდე. მაშინ ხელისუფლებაში მოსულმა ,,ნაციონალურმა მოძრაობამ" გააერთიანა შინაგან საქმეთა სამნისიტრო და სახელმწიფო უშიშროების სამსახური. ეს ორი სტრუქტურა აღმოჩნდა ერთი მინისტრის დაქვემდებარებაში. ,,ქართული ოცნების" წინასაარჩევნო პროგრამაში ჩვენ ჩავწერეთ, რომ ეს აუცილებლად უნდა გაიყოს. როგორც იქნა დადგა დრო, როდესაც რეალურად მოხდება ამ ორი სამსახურის ერთმანეთისგან გაყოფა. გაყოფა ხდება იმდაგვარად, რომ სახელმწიფო უსაფრთხოებაზე პასუხისმგებელი უწყება, რომელიც გამოეყოფა შინაგან საქმეთა სამინისტოს, უკვე აღარ იქნება სამინისტროს დაქვემდებარებაში. მისი ხელმძღვანელი იქნება არა სახელმწიფო პოლიტიკური თანამდებობის პირი, არამედ პროფესიონალი. ხელისუფლების შეცვლა არ გამოიწვევს ამ სამსახურის ხელმძღვანელის შეცვლას. ეს არ უნდა იყოს პოლიტიკური უწყება და უნდა ემსახურებოდეს სახელმწიფო უსაფრთხოებას. იმედი გვაქვს, წელს კანონსაც მივიღებთ და ეს გაყოფაც დასრულდება", - განაცხადა ვახტანგ ხმალაძემ.
