ვაპირებთ აქტიურად დავიწყოთ მუშაობა ყველა იმ მიმართულებით, რომელიც ევროკომისიის მიერ გამოქვეყნებულ მოხსენებაშია გამოკვეთილი , - ამის შესახებ საქართველოს პრეზიდენტმა გიორგი მარგველაშვილმა ბრიუსელში, ევროკავშირის სამეზობლო პოლიტიკისა და გაფართოების საკითხებში ევროკომისარ იოჰანეს ჰანთან შეხვედრის შემდეგ გამართულ პრესკონფერენციაზე განაცხადა.
საქართველოს პირველი პირის შეფასებით, ევროკომისიის მოხსენება პოზიტიურია.
"შეხვედრაზე გამოვყავით ის ძირითადი პრიორიტეტები, რაც გვაქვს და ვისაუბრეთ განვითარების იმ მიმართულებაზე, რომელიც დავსახეთ რიგის სამიტამდე ერთი თვით ადრე. ასევე ხაზი გავუსვით იმ პოზიტიურ შედეგს, რომელსაც ჩვენმა ქვეყანამ მიაღწია, მათ შორის ასოცირების შესახებ ხელშეკრულების გაფორმებამდეც დემოკრატიული ინსტიტუტების განვითარების კუთხით. საქართველოს რეფორმების თვალსაზრისით საკმაოდ ამბიციური დღის წესრიგი ჰქონდა. ამ ყველაფერს ცოტა ხნის წინ საკმაოდ პოზიციური მოხსენება მოჰყვა. საქართველო ამ თვალსაზრისით, ვიზა ლიბერალიზაციაზე აქტიურად მუშაობს. ყველა საკითხი, რომელიც ნახსენებია ამ მოხსენებაში საქართველოსთვის არის საინტერესო სამოქმედო გეგმა. ვაპირებთ აქტიურად დავიწყოთ მუშაობა ამ მოხსენებაში გამოკვეთილი მიმართულებების თვალსაზრისით. ახლა ევროპელ პარტნიორებთან იდეების გაცვლის ინტენსიური რეჟიმი გვაქვს. ასევე დატვირთული სამუშაო დღის წესრიგი და ამ მიმართულებით მუშაობას ვაგრძელებთ. ჩვენ ამ მიზანს უახლოეს მომავალში მივაღწევთ", - განაცხადა გიორგი მარგველაშვილმა.
პრეზიდენტის შეფასებით, საქართველო დადებითი კუთხით ვითარდება და ეს ძალიან კარგ, პოლიტიკურ იმპულსს მისცემს სხვა ქვეყნებსაც.
ევროკომისიამ 8 მაისს გამოაქვეყნა თავისი მესამე, მიმდინარე ანგარიში საქართველოს მიერ სავიზო რეჟიმის ლიბერალიზაციის სამოქმედო გეგმის განხორციელების თაობაზე.
