დარწმუნებული ვარ 2016 წლის საპარლამენტო არჩევნებზე კოალიცია "ქართული ოცნება" ქართველი ხალხის წინაშე პირნათელი წარდგება, - ამის შესახებ ჟურნალისტებს პარლამენტის თავმჯდომარემ, დავით უსუფაშვილმა განუცხადა.
საკანონმდებლო ორგანოს სპიკერის შეფასებით, გუშინდელი დღე ჩვენს პოლიტიკურ ცხოვრებაში ძალიან მნიშვნელოვანი მოვლენა იყო.
"გუშინდელი დღე იყო ძალიან მნიშვნელოვანი მოვლენა ჩვენს პოლიტიკურ ცხოვრებაში. გუშინ 12-საათიანი განხილვის და დებატების შემდეგ პარლამენტმა ნდობა გამოუცხადა მთავრობის განახლებულ შემადგენლობას, პრემიერ-მინისტრს. ეს იყო ერთ-ერთი ყველაზე შინაარსიანი განხილვა, რაც მე მახსოვს საქართველოს უახლოეს პერიოდში. მთავრობამ წარმოადგინა მომავლის დეტალური და კომპლექსური გეგმა და ეს იყო მნიშვნელოვანი. აღმასრულებელ ხელისუფლებას აქვს გაცნობიერებული ის პრობლემები, რაც ქვეყანას გააჩნია უსაფრთხოების თვალსაზრისით, ეკონომიკური საკითხების თვალსაზრისით და მთავრობას აქვს ძალიან კონკრეტული გეგმა დემოკრატიზაციის გაგრძელების მიმართულებითაც. დარწმუნებული ვარ, 2016 წელს, საპარლამენტო არჩევნების დროს კოალიცია "ქართული ოცნება" პირნათელი წარდგება, პირველ რიგში, ქართველ ხალხთან. რაც შეეხება ოპონენტების შეფასებებს, რაც არ უნდა მწვავე ფორმით იყოს ის გამოთქმული, ჩვენ ის გვესმის, თუ რაიმე რაციონალურია, ჩვენ მას სერიოზულ ყურადღებას დავუთმობთ", - აღნიშნა დავით უსუფაშვილმა.
