იუსტიციის მინისტრის თეა წულუკიანის შეფასებით, პარლამენტში უმცირესობის წევრებს მინისტრებისთვის კონკრეტული შეკითხვები არ დაუსვამთ.
როგორც წულუკიანმა ჟურნალისტებთან საუბრისას განაცხადა, უმცირესობის მხრიდან შეხვედრაზე იყო ბევრი შფოთვა და ყვირილი.
"უმცირესობის შეხვედრაზე სამინისტროს მიმართ იყო აბსურდული კითხვები. გიორგი ვაშაძეს უნდა, რომ მე მცხეთაში, სადაც მან გათხარა მიწა, ავაშენო იუსტიციის სახლი. მე ამას არ გავაკეთებ, რადგან ჩემთვის და ამ მთავრობისთვის მნიშვნელოვანია კულტურული მემკვიდრეობა, რომელიც იუნესკოს სიაშია. თუკი ვაშაძის მიერ ამოთხრილ ადგილას აშენდება იუსტიციის სახლი, მაშინ სვეტიცხოველი და მცხეთა აღარ იქნება კულტურული მემკვიდრეობის სიაში. ამიტომ მე ამ პროექტზე ვთქვი უარი. თუმცა მცხეთაში იუსტიციის სახლი აშენდება სხვაგან. ამგვარი აბსურდული კითხვები იყო სხდომაზე. თურმე ადეიშვილ-ვაშაძის წყვილმა გახსნა ძალიან ბევრი საზოგადოებრივი ცენტრი. ეს არის სიცრუე. რატომღაც ვაშაძეს უნდა, რომ მისი გახსნილი იყოს საზოგადოებრივი ცენტრები, რომელიც აშენდა ჩემი მმართველობის დროს. ფაქტიურად ვერანაირი ფუნდამენტური კრიტიკა მე იუსტიციის სამინისტროსთან მიმართებაში ვერ მოვისმინე. იყო ბევრი შფოთვა და ყვირილი", -განაცხადა თეა წულუკიანმა.
დღეს პარლამენტში უმცირესობის წევრები მინისტრებს შეხვდნენ.
