თავდაცვის მინისტრი თინა ხიდაშელი არ მოელის, რომ საპარლამენტო ოპოზიცია მისთვის თავდაცვის მინისტრის პოსტზე ნდობის გამოცხადებას მხარს დაუჭერს.
„არ მაქვს არც ერთი მიზეზი ვიფიქრო, რომ პარლამენტი ნდობას არ გამომიცხადებს და ძალიან სკეპტიკურად ვუყურებ იმას, რომ უმცირესობა მხარს დაგვიჭერს. რა თქმა უნდა, ეს ასე არ მოხდება, რომ ოპოზიციამ მთავრობას მხარი დაუჭიროს, თუმცა ჩემთვის საინტერესო იქნება მიზეზები თუ რას იტყვიან, მაგალითად მე რატომ არ მიცხადებენ ნდობას ამ თანამდებობაზე“, - განაცხადა თინა ხიდაშელმა.
ხიდაშელის განმარტებით, თავდაცვის მიმართულებით პრიორიტეტები არ იცვლება. მისი თქმით, ერთ-ერთი უპირველესი ამოცანა და უპირველესი საქმე, რითიც სამინისტრო ყოველდღიურად არის დაკავებული, ესაა ნატო-სთან არსებითი პაკეტის ეფექტური და სწრაფი განხორციელება.
ცნობისთვის, პრეზიდენტმა მინისტრთა კაბინეტის ახალი შემადგენლობა ნდობის გამცხადებისთვის საკანონმდებლო ორგანოს უკვე წარუდგინა. ამ საკითხზე პარლამენტში რიგგარეშე სხდომა 8 მაისს, 13:00 საათზეა ჩანიშნული.
