რაც უფრო წინ წაიწევთ ასოცირების შეთანხმების მიმართულებით, მით უფრო მეტი უფლება გექნებათ, დასვათ შეკითხვა როდის გახდებით ევროკავშირის წევრი, - ამის შესახებ ევროკავშირის ელჩმა საქართველოში იანოშ ჰერმანმა ილიას სახელმწიფო უნივერისტეტში მოხსენებით გამოსვლისას განაცხადა.
ევროპის კვირეულის ფარგლებში ევროკავშირის წარმომადგენლების ხელმძღვანელმა ლექცია წაიკითხა თემაზე - ევროკავშირისა და საქართველოს ურთიერთანამაშრომლობა. ელჩის მოხსენების შემდეგ შეხვედრა კითხვა-პასუხის რეჟიმში წარიმართა. ერთ-ერთი შეკითხვა შეეხებოდა იმას, თუ როდის გახდება საქართველო ევროკავშირის წევრი.
"არ მაქვს პასუხი ამ კითხვაზე და ვფიქრობ, არც არავის აქვს ალბათ, ვინაიდან ჯერ არ წამოჭრილა ეს საკითხი. ამ კითხვაზე ვერ გიპასუხებთ არა იმიტომ, რომ ევროკავშირის კარგად დისციპლინებული საჯარო მოხელე ვარ, არამედ იმიტომ ეს ჯერ ჰიპოთეტური საკითხია. თქვენ გაქვთ ევროკავშირთან ასოცირების შეთანხმება და რაც უფრო წინ წაიწევთ ამ მიმართულებით, მით უფრო მეტი უფლება გექნებათ ამ შეკითხვის დასმის", - განაცხადა იანოშ ჰერმანმა.
მისივე თქმით, ევროკავშირის წევრობას ბევრი წინაპირობა უძღვის წინ, რასაც ძალიან ბევრი დრო და ინტენსიური მუშაობა სჭირდება. იანოშ ჰერმანის თქმით, მას არ უყვარს ჩინური სიბრძნეების ციტირება, თუმცა ჩინელები ამბობენ, რომ თუ გინდა ხიდზე გადახვიდე, ჯერ მდინარესთან უნდა მიხვიდე. შესაბამისად, ელჩის თქმით, ეს სავარაუდოდ, ერთი თაობის საკითხია.
