თავდაცვის მინისტრის თანამდებობაზე წარდგენილი თინა ხიდაშელის მტკიცებით, აღნიშნულ პოსტზე არც ბიძინა ივანიშვილს და არც ირაკლი ღარიბაშვილს შეურჩევია. 
როგორც ხიდაშელმა გადაცემა "რეაქციაში" განაცხადა, თავდაცვის მინისტრად მისი წარდგენის თაობაზე გადაწყვეტილება კოალიციამ მიიღო.

"ამაზე პრემიერ-მინისტრმა ძალიან კონკრეტულად ისაუბრა ჩემი წარდგენის დროს, როდესაც თქვა, რომ ეს არის კოალიციური მთავრობა და შესაბამისად, კოალიციურ რეჟიმში იყო გადაწყვეტილება მიღებული. მე ძალიან დიდი იმედი მაქვს, რომ ბიძინა ივანიშვილი ეთანხმება ამ გადაწყვეტილებას და მოსწონს, მაგრამ კიდევ ერთხელ ხაზგასმით ვამბობ - ეს იყო კოალიციური გადაწყვეტილება, რომელიც ყველამ ერთად მიიღო. სხვათა შორის, მე არ ვესწრებოდი იმ შეკრებას. უჩემოდ მიიღეს გადაწყვეტილება", - განაცხადა ხიდაშელმა.

რაც შეეხება შეკითხვას, როგორ წარმოუდგენია თავდაცვის მინისტრის პოსტზე საკუთარი თავი, მისივე შეფასებით, არ არსებობს პოლიტიკური თანამდებობა, სადაც რისკი და გამოწვევები არ არის.
"როცა ხელისუფლებაში ხარ, ყველაფრისთვის მზად უნდა იყო. სხვაგვარად გაუგებარი და უპასუხისმგებლობა იქნება ნებისმიერი ჩვენგანის მოქმედება. როდესაც, რა მომენტში, სად ჩაითვლება საჭიროდ, იმ უბანზე უნდა იბრძოლო. მე არ ვთვლი, რომ საერთოდ არსებობს რაიმე პოლიტიკური თანამდებობა ქვეყანაში, სადაც რისკი არ არის, სადაც გამოწვევები ნაკლებია. მე არ ვეკუთვნი იმ ადამიანებს და არც მიცნობს ასე საზოგადოება, ვინც ეძებს ადვილ ცხოვრებას, ადვილ გამოსავალს და ვინც მოკლე დისტანციებით მოძრაობს იმისთვის, რომ წარმატებამდე მივიდეს", - აღნიშნა მან.