საქართველოს თავდაცვის მინისტრი მინდია ჯანელიძე საფრანგეთთან საჰაერო უსაფრთხოებასთან დაკავშირებულ შეთანხმებაზე ხელმოწერასთან დაკავშირებით ირაკლი ალასანიას განცხადებას უპასუხისმგებლოს უწოდებს.
"ეს არის უპასუხისმგებლო განცხადება, თუ ეს განცხადება გაკეთდა, მე არ მომისმენია. შესაბამისად, სხვა კომენტარი რა უნდა გავაკეთო ამასთან დაკავშირებით", - განუცხადა ჯანელიძემ ჟურნალისტებს და შეკითხვაზე, უარყოფს თუ არა თავდაცვის ყოფილ მინისტრთან დარეკვას, კიდევ ერთხელ აღნიშნა, რომ ირაკლი ალასანიას განცხადება "უპასუხისმგებლოა".
"თავისუფალი დემოკრატების" ლიდერმა, ირაკლი ალასანიამ 24 მარტს გააკეთა განცხადება, რომ თავდაცვის მინისტრის რანგში საფრანგეთში მისი ბოლო ვიზიტის დროს მინდია ჯანელიძემ დაურეკა და უთხრა, რომ საჰაერო უსაფრთხოებისთვის შეთანხმებაზე ხელი არ მოეწერა. ალასანიას თქმით, მართალია მინდია ჯანელიძემ დაურეკა, თუმცა, "იგი გადაწყვეტილებების მიმღები არ იყო". "მე შემიძლია დაგიდასტუროთ, რომ არც მაშინ და არც ახლა მინდია ჯანელიძე არ არის გადაწყვეტილების მიმიღები. ვინ შეასრულებდა მედიატორის ფუნქციას, დიდი მნიშვნელობა არ აქვს. ჩემს იმედს რაც შეეხება, ადამიანებმა ყოველთვის პოზიტიურად განვითარების სცენარზე უნდა ვიფიქროთ. მეც მწამს, რომ ფუნდამენტჩაყრილი საქმე არ უნდა გაფუჭდეს", - აღნიშნა ალასანიამ.
