საგარეო საქმეთა მინისტრ თამარ ბერუჩაშვილის განცხადებით, ევროკავშირთან ასოცირების შეთანხმების ამოქმედება იმ მასშტაბის ფინანსურ და ტექნიკურ რესურსებს მოითხოვს, რომელთა მობილიზაცია საერთაშორისო დახმარების გარეშე ძალიან ძნელი იქნება, - ამის შესახებ ბერუჩაშვილმა დღეს, სასტუმრო "ქორთიარდ მარიოტში" მიმდინარე დონორთა ყოველწლიურ საკოორდინაციო ფორუმზე სიტყვით გამოსვლისას განაცხადა.
საგარეო უწყების ხელმძღვანელმა დიპლომატებსა და საერთაშორისო დონორ ორგანიზაციებს საქართველოსთვის გაწეული ეკონომიკური და პოლიტიკური დახმარებისთვის მადლობა გადაუხადა.
"საერთაშორისო დახმარების კუთხით საქართველო კვლავ რჩება პარტნიორი სახელმწიფოების და საერთაშორისო ორგანიზაციების პრიორიტეტად. მნიშვნელოვანია, რომ საქართველოს მხარდამჭერი ქვეყნების რიცხვი სულ უფრო იზრდება. საზღვარგარეთ საქართველოს დიპლომატიური კორპუსის საქმიანობის პრიორიტეტულ მიმართულებად კვლავ რჩება პარტნიორი ქვეყნების საგარეო დახმარების ინსტიტუტებთან აქტიური თანამშრომლობა. ევროკავშირთან ასოცირების შეთანხმება ღრმა და ყოვლისმომცველი თავისუფალი სავაჭრო სივრცის ჩათვლით, იძლევა ახალ, უნიკალურ შესაძლებლობებს, რომელთა ამოქმედება იმ მასშტაბის ფინანსურ და ტექნიკურ რესურსებს მოითხოვს, რომელთა მობილიზება საერთაშორისო დახმარების გარეშე ძალზე ძნელი იქნება. იმედი გვაქვს, რომ მომავალი წლების განმავლობაში ჩვენი პარტნიორი ქვეყნების მხარდაჭერა და კონკრეტული დახმარება ყველა მიმართულებით, იმ გამოცდილების გაზიარებისთვის, რომელიც ესოდენ მნიშვნელოვანია ამ პროცესის წარმატებისთვის, გააქტიურდება", - განაცხადა თამარ ბერუჩაშვილმა.
მან ასევე იმედი გამოთქვა, რომ მიზანმიმართული და პროაქტიური მუშაობით საქართველოს წინაშე არსებული პრიორიტეტული ამოცანების განხორციელება პარტნიორი ქვეყნების მხარდაჭერით მოხდება. რაც საქართველოს მდგრად და სტაბილურ განვითარებას უზრუნველყოფს.
