"ნაციონალური მოძრაობა" მოითხოვს, პრეზიდენტის უარის მიუხედავად, რიგგარეშე სხდომა პარლამენტის რეგლამენტის შესაბამისად ჩატარდეს.
როგორც ვიცე სპიკერმა გიორგი ბარამიძემ დღეს განაცხადა, გუშინ საქართველოს პრეზიდენტმა "ნაციონალური მოძრაობის"მიმართვის საპასუხოდ უარი განაცხადა საპარლამენტო სესიის მოწვევაზე.
"ამ მძიმე ვითარების ფონზე, რაც შექმნილია ქვეყნის ეკონომიკაში, ქვეყნის მთავრობამ, რომელსაც ვაფრთხილებდით რომ არასწორ ეკონომიკურ კურსს ატარებდა, არ წარმოდგინა თავისი შეხედულებები იმ მიზეზებისა, თუ რამ მიგვიყვანა ამ მდგომარეობამდე. ქვეყნის მთავარ საკანონმდებლო ორგანოში მსჯელობის არგამართვა უპასუხისმგებლო, მავნებლური და არასწორი პოლიტიკის გაგრძელების ნაბიჯია. მოვითხოვთ, რომ საქართველოს პარლამენტის რეგლამენტის შესაბამისად, ჩატარდეს საქართველოს პარლამენტის სხდომა", - განაცხადა გიორგი ბარამიძემ.
პრეზიდენტის გადაწყვეტილების მიუხედავად, ამ ეტაპისთვის პარლამენტის რიგგარეშე სხდომა არ მოიწვიოს, პარლამენტის რეგლამენტის თანახმად, რიგგარეშე სხდომა მაინც უნდა ჩატარდეს. პარლამენტის რეგლამენტის მიხედვით, რიგგარეშე სხდომის მოწვევის აქტი წერილობითი მოთხოვნის წარდგენიდან 48 საათის განმავლობაში გამოიცემა. შესაბამისად, ეს ვადა დღეს იწურება. პრეზიდენტის მიერ აქტის არგამოცემის შემთხვევაში პარლამენტი მომდევნო 48 საათის განმავლობაში იკრიბება.
პარლამენტის რეგლამენტის გათვალისწინებით, პრეზიდენტს რიგგარეშე სხდომის მოწვევის მოთხოვნით პარლამენტის თავმჯდომარე, პარლამენტის შემადგენლობის არა ნაკლებ 1/4, ან მთავრობა მიმართავს. გიორგი მარგველაშვილს ამ შემთხვევაში საპარლამენტო უმცირესობამ მიმართა. მათ შესაბამისი მოთხოვნა პრეზიდენტის ადმინისტრაციას სამშაბათს წარუდგინეს.
ამ ეტაპზე პარლამენტის აპარატში ვერ აკონკრეტებენ, ჩატარდება თუ არა მიმდინარე კვირის განმავლობაში პარლამენტის რიგგარეშე სხდომა. პარლამენტის აპარატს რიგგარეშე სხდომის მომზადების თაობაზე რაიმე მითითება ჯერ არ მიუღია. გადაწყვეტილება ამის შესახებ დღეს გახდება ცნობილი.
