ეკონომიკისა და მდგრადი განვითარების მინისტრი, ვიცე პრემიერი გიორგი კვირიკაშვილი და ფინანსთა მინისტრი ნოდარ ხადური დღეს საქართველოს პრეზიდენტს, გიორგი მარგველაშვილს შეხვდებიან.
როგორც გიორგი კვირიკაშვილმა ჟურნალისტებს სასტუმრო "თბილისი მარიოტში" ბიზნესასოციაციის მიერ ორგანიზებული შეხვედრის დასრულების შემდეგ განუცხადა, შეხვედრაზე საუბარი შეეხება ეკონომიკური გუნდის მინისტრების პარლამენტში მისვლის საკითხსაც.
"ჩვენ გვექნება სამუშაო შეხვედრა ფინანსთა მინისტრთან ერთად, პრეზიდენტთან და ამ შეხვედრაზე ალბათ მოვითათბირებთ ამ საკითხზე", - განაცხადა გიორგი კვირიკაშვილმა.
ამით გიორგი კვირიკაშვილი გამოეხმაურა კითხვას, რომლის მიხედვითაც "ნაციონალური მოძრაობა" ითხოვს პარლამენტში ეკონომიკური გუნდის მინისტრების მისვლას.
"ერთიანი ნაციონალური მოძრაობა" 27 თებერვალს პარლამენტის რიგგარეშე სხდომის ჩატარებას მოითხოვს. როგორც პარტიის წევრმა გოკა გაბაშვილმა განაცხადა, ამ სხდომას უნდა დაესწროს პრემიერ-მინისტრი, ვიცე პრემიერები და ეკონომიკური ბლოკის მინისტრები. "ნაციონალური მოძრაობა" რიგგარეშე სხდომის მოსაწვევად პრეზიდენტს მიმართავს.
"ქვეყანაში მძვინვარებს ძალიან მძიმე ეკონომიკური და ფინანსური კრიზისი. ლარის გაუფასურება პირდაპირ ურტყამს ჩვენი მოქალაქეების ინტერესს. ხდება სწრაფი გაღარიბება ჩვენი მოქალაქეეების. ეს კრიზისი სახეზეა და ეს კრიზისი არის შედეგი მთავრობის უნიათობის, არაკომპეტენტურობის, გაუმართლებელი და დამღუპველი პოლიტიკის. ამ კრიზისის გათვალისწინებით, სასწრაფო ღონისძიებად მიგვაჩნია, რომ ჩატარდეს საქართველოს პარლამენტის რიგგარეშე, საგანგებო სხდომა, რომელზეც უნდა მოვიდნენ პრემიერ-მინისტრი, ვიცე პრემიერიები, ეკონომიკური ბლოკის მინისტრები, რათა პარლამენტმა იმსჯელოს ამ კრიზისულ ვითარებაზე და მოძებნოს გამოსავლის გზები", - განაცხადა გაბაშვილმა.
