უმრავლესობის ლიდერის, დავით საგანელიძის აზრით, უვადოდ თავისუფლებააღკვეთილ პატიმარათა ახლობლების მოთხოვნა ყურადღებამისაქცევია.
"კარგად მესმის ადამიანების, რომელთა ოჯახის წევრები უვადო პატიმრობაში იმყოფებიან. ეს ის საკითხია, რომელიც მარტივად არ უნდა "გავატაროთ". ვფიქრობ, პარლამენტის შესაბამისი – ადამიანის უფლებათა დაცვისა და იურიდიულ საკითხთა კომიტეტები აღნიშნულ საკითხს განიხილავენ", - განუცხადა ჟურნალისტებს დავით საგანელიძემ.
უვადოდ თავისუფლებააღკვეთილი პატიმრების ახლობლები ქობულეთში, მდინარე კინტრიშის ხიდთან აქციას მართავენ. აქციაში ბაღდათის, სამტრედიის, ქუთაისის და მთლიანად აჭარიდან პატიმრობაში მყოფი პირების ახლობლები მონაწილეობენ. ისინი უვადო პატიმრების საქმეების გადახედვას ითხოვენ.
აქციის მონაწილეებს შეუერთდა უფლებადამცველი თამაზ ბაკურიძე. მისი ინფორმაციით, უვადო პატიმრებთან დაკავშირებით და ამნისტიის შესახებ კანონში განხორციელებული ცვლილებები ამ ადამიანებზე არ გავრცელდა. შესაბამისად, უფლებადამცველი და აქციის მონაწილეები ითხოვენ, ხელისუფლებამ უვადო პატიმრობაში მყოფი ადამიანების საქმეებს გადახედოს.
