გაეროს გენერალური მდივანი, პან გი მუნი დონბასში სამშვიდობო მისიის განთავსებასთან დაკავშირებით ტელეფონით უკრაინის საგარეო საქმეთა მინისტრს, პავლო კლიმკინს ესაუბრა. ამის შესახებ გაერო-ს პრესცენტრი იტყობინება.
როგორც პან გი მუნმა აღნიშნა, მშვიდობისმყოფელების აღმოსავლეთ უკრაინაში გაგზავნის საკითხთან დაკავშირებით გაერო უშიშროების საბჭოს გადაწყვეტილების მიხედვით იმოქმედებს.
გაერო-ს გენერალურმა მდივანმა ასევე შეშფოთება გამოხატა დონბასში მიმდინარე საბრძოლო მოქმედებების გამო და იმედი გამოთქვა, რომ 12 თებერვლის მინსკის შეთანხმების განხორციელება შესაძლებელი იქნება. რამდენიმე დღის წინ გაერო-ში უკრაინის მუდმივმოქმედმა წარმომადგენელმა, იური სერგეევმა განაცხადა, რომ დონეცკში სამშვიდობო მისიის გაგზავნის საკითხთან დაკავშირებით გაერო-ში კონსულტაციები უკვე მიმდინარეობს.