ევროპული და ევროატლანტიკური კურსის ცვლილებასთან დაკავშირებით საფრთხე არ არსებობს, - ამის შესახებ საქართველოს პრეზიდენტმა გიორგი მარგველაშვილმა საზოგადოებრივი მაუწყებლის ეთერში განაცხადა. მისი თქმით, ქართველმა ხალხმა ამ კურსის მიმართ ნათელი ნება ბევრჯერ გამოხატა.
"ქართველი ხალხის ნება ნათლად არის გამოხატული და ეს ნება გამოიხატა ბევრჯერ, მათ შორის 2012 წლის არჩევნებზე, მათ შორის ჩემ არჩევნებზე ამ კურსის დადასტურების ნაწილში. მიევსალმები, როდესაც პოლიტიკოსები ასეთ თემებს დიდ ყურადღებას უთმობენ, რადგან ჩვენ ყოველთვის ფხიზლად უნდა ვიყოთ იმ თემების მიმართ, რომლებიც ჩვენთვის ძალიან მნიშვნელოვანია", - განაცხადა პრეზიდენტმა.
გარდა ამისა, მარგველაშვილი კიდევ ერთხელ გამოეხმაურა აბაშიძე-კარასინის ფორმატს. მისი თქმით, ეს ფორმატი არ უნდა შევიწროვდეს, თუმცა სახელმწიფო ინსტიტუტებში უნდა იყოს გარკვეული თუ ვინ სად, რა თემაზე საუბრობს და ვის სად რა თემაზე აქვს საუბრის მანდატი.
"კარასინ-აბაშიძის ფორმატში უნდა იყოს ის საკითხები, რომლებიც არის შედარებით კარგი ფონის, კარგი გარემოს შემქმნელი. არა მარტო ქართველებმა და რუსებმა ერთმანეთს, არამედ მსოფლიოს უნდა ვაჩვენოთ, რომ არის თემები, რაზეც არის შეხების წერტილები და გავამრავლოთ ასეთი შეხების წერტილები. მე არანაირად არ მიმაჩნია, რომ აბაშიძე-კარასინის ფორმატი უნდა შევიწროვდეს, მაგრამ თუ ისინი ლაპარაკობენ სავაჭრო-ეკონომიკურ ურთიერთობებზე, მოველით მათგან ამ ურთიერთობებზე საკითხების კომენტირებას", - აღნიშნა მარგველაშვილმა.