უმრავლესობის წევრი ლევან ბერძენიშვილი საგარეო კურსთან დაკავშირებით დებატების გამართავს პარლამენტში უაზრობად მიიჩნევს.
როგორც ბერძენიშვილმა ჟურნალისტებთან საუბრისას აღნიშნა, ,,ნაციონალური მოძრაობის" მოთხოვნა დებატებზე პიარის ნაწილია, რაც შეეხება ეკონომიკური გუნდის პარლამენტში დაბარებას, ბერძენიშვილის თქმით, ეს გონივრული გადაწყვეტილება იქნება.
,,საგარეო კურსთან დაკავშირებით მათი ეჭვიანობა აშკარად პიარის ნაწილია და არა სხვა რამე. საქართველოს საგარეო კურსი არ იცვლება. ორჯერ ორი, რომ ოთხია, ამის მტკიცებას რად უნდა დებატები?დებატები არის საჭირო ნინო ბურჯანაძესთან, ირმა ინაშვილთან, რომელთაც როგორც ჩანს, სხვა კურსი აქვთ. ჩვენ რა შუაში ვართ? ჩვენ ევროპასთან ინტეგრაციის კუთხით, მათზე უფრო მონდომებულები ვართ. რაც შეეხება პარლამენტში ეკონომიკური გუნდის დაბარებას, ეს გონივრულია და ეს პარლამენტმა მართლაც უნდა გააკეთოს, მაგრამ რაღა კვირის ბოლო დღეს უნდა გავიხსენოთ ეს. თვითონაც იციან სად არის პარლამენტი და დავიბაროთ თბილისში. მდგომარეობა ისეთია, მაგას ახლა ნებისმიერი პარლამენტი მხარს დაუჭერს", - განაცხადა ლევან ბერძენიშვილმა ჟურნალისტებთან საუბარში.
ფრაქცია "თავისუფალი დემოკრატები" პარლამენტში, ფრაქციის სხდომის ფორმატში, ეკონომიკისა და ფინანსთა მინისტრებს იბარებენ. "თავისუფალი დემოკრატები" ფრაქციის სხდომაზე დასწრების მოთხოვნით, გიორგი კვირიკაშვილსა და ნოდარ ხადურს დღეს მიმართავენ.
