საქართველოს პრეზიდენტი, გიორგი მარგველაშვილი უზენაესი სასამართლოს თავმჯდომარის კანდიდატურასთან დაკავშირებით, არასამთავრობო სექტორის წარმომადგენელებს ხვდება. შეხვედრაში 20-ზე მეტი არასამთავრობო ორგანიზაცია იღებს მონაწილეობას.
არასამთავრობო ორგანიზაციის "კოალიცია გამჭვირვალე და დამოუკიდებელი მართლმსაჯულების" წარმომადგენელმა, ეკა გიგაურმა შეხვედრის დაწყებამდე ჟურნალისტებს განუცხადა, რომ თუ პოლიტიკური ძალა თვლის, რომ მასთან უნდა იყოს შეთანხმებული უზენაესი სასამართლოს თავმჯდომარის კანდიდატურა, იგი არ ხელმძღვანელობს საზოგადოების ინტერსებით. მისივე თქმით, ადამიანი, რომელიც იქნება უზენაესი სასამართლოს თავმჯდომარის კანდიდატურაზე წარდგენილი, არ უნდა ატარებდეს, რომელიმე პოლიტიკური გუნდის ინტერესს.
"კანდიდატი უნდა ატარებდეს საზოგადოების ინტერსებს და სწორედ ეს იქნება შედეგი იმისა, რომ ჩვენ მივიღებთ სასამართლო სისტემას, რომლის მიმართაც მაღალი ნდობა იქნება", - განაცხადა ეკა გიგაურმა.
მისივე განცხადებით, პრეზიდენტ მარგველაშვილთან შეხვედრაზე არასამთავრობო ორგანიზაციების მხრიდან არ იქნება წარდგენილი უზენაესი სასამართლოს თავმჯდომარესთან დაკავშირებით კონკრეტული კანდიდატურა.
"პირველ რიგში უნდა შევთანხმდეთ კრიტერიუმებზე თუ როგორ უნდა შეირჩეს უზენაესი სასამართლოს თავმჯდომარე. ჩვენ ვფიქრობთ, რომ გარდა იმ კრიტერიუმებისა, რომელიც გაწერილია, ასევე მნიშვნელოვანია გათვალისწინებული იქნას სხვადასხვა მნიშვნელოვანი საკითხები. მაგალითად ის, რომ ეს პიროვნება, რომელიც წარდგენილი იქნება არ უნდა იყოს რომელიმე პოლიტიკურ გუნდთან და პოლიტიკურ პარტიასთან დაკავშირებული. ეს არის მნიშვნელოვანი, რომ საბოლოოდ ამ ადამიანის მიმართ იყოს ნდობა და ასევე მიუკერძოებლად განახორციელოს ის რეფორმები, რომელიც საჭიროა ჩატარდეს მართლმსაჯულებისა და სასამართლო სისტემაში. გარდა ამისა, მნიშვნელოვანია ვისაუბროთ ზოგადად პროცესზე, თუ როგორ წარიმართება ეს პროცესი", - განაცხადა ეკა გიგაურმა.
მისივე თქმით, უზენაესი სასამართლოს თავმჯდომარის კანდიდატურის დასახელების უფლება საქართველოს პრეზიდენტს გააჩნია.
"შეუძლია დაასახელოს კანდიდატი, თუმცა ვფიქრობ, რომ ეს უნდა იყოს გამჭვირვალე პროცესი და ყველა დაინტერესებული პირი და ორგანიზაცია უნდა იყოს ჩართული იმისთვის, რომ ეს კანდიდატი შეირჩეს გამჭვირვალე პროცესის შედეგად, საბოლოოდ, პარლამენტში მოვთხოვოთ პოლიტიკური ძალებს ამ კანდიდატურას დაუჭირონ მხარი", - განაცხადა ეკა გიგაურმა.
