"ნაციონალური მოძრაობის" წევრის სერგო რატიანის შეფასებით, უნივერსიტეტის შენობის გაყიდვით მთავრობა რეგიონში - საერთაშორისო დონის ტექნოლოგიური უნივერსიტეტის, ხოლო ბათუმის, როგორც რეგიონის საგანმანათლებლო ცენტრის იდეის პერსპექტივას სპობს.

სერგო რატიანის თქმით, ბათუმის ტექნოლოგიური უნივერსიტეტის პროექტის ჩაშლა "ქართული ოცნების" მთავრობის ერთ-ერთი ყველაზე სერიოზული დანაშაულია. "ეს პროექტი შეჩერებული იყო მხოლოდ პოლიტიკური მოტივებით, ისევე, როგორც პოლიტიკური მოტივებით აკრედიტაცია აგრარულ უნივერსიტეტს შეუჩერდა და კახა ბენდუქიძის მიმართ პოლიტიკური დევნა წარმოებდა. მთავრობის ქმედება დანაშაულებრივია არა მხოლოდ კონკრეტული წარმატებული პროექტის მიმართ, არამედ წარმოადგენს შემაშფოთებელ გზავნილს, რომ ნებისმიერი საერთაშორისო პროექტი, კერძო ინვესტიცია და თავად სახელმწიფოს მიერ განხორციელებული პროექტები არ არის დაცული და მათი ჩაშლა პოლიტიკური მოტივების საფუძველზე შეიძლება. განსაკუთრებით შემაშფოთებელია, რომ ეს ეხება განათლების სფეროს. მთავრობის ქმედებები მნიშვნელოვან ზიანს აყენებენ ქვეყნის პრესტიჟს, საინვესტიციო გარემოს და კერძოდ, განათლების სფეროს განვითარების პერსპექტივას", - განაცხადა რატიანმა.

"ნაციონალური მოძრაობის" განცხადებაში ასევე ნათქვამია, რომ აშშ-ს "ათასწლეულის გამოწვევის კორპორაციის" (MCC) და საქართველოს მთავრობის მიერ შემუშავებული პროექტის ფარგლებში დაგეგმილი იყო, ამერიკული სტანდარტების ბათუმის ტექნოლოგიური უნივერსიტეტის შექმნა. საქართველოს მთავრობის მიერ ამერიკული უნივერსიტეტის ფუნქციონირების წინაპირობად განისაზღვრა საქართველოში ამერიკული დიპლომის გაცემა, ასევე სწავლების საფასურის წლიური ზედა ზღვარი 8000-10000 აშშ დოლარი (რაც ამერიკული უნივერსიტეტების სწავლის საფასურის მესამედია). მთავრობის მიერ უნივერსიტეტის განთავსების ადგილად ბათუმი განისაზღვრა; კორპორაციის ჯამურ ინვესტიციას 30 მილიონი აშშ დოლარი უნდა შეედგინა. 2012 წლის ოქტომბრისთვის პრაქტიკულად დასრულებული იყო კონკურსი/ტენდერი, რომლის მეორე ეტაპზე წარმოდგენილი პროექტები შეაფასა დამოუკიდებელმა საერთაშორისო კომისიამ და მათი რანჟირებული რეკომენდაციის საფუძველზე, ტენდერის მეორე ეტაპის წინაპირობა დააკმაყოფილა ორმა განაცხადმა: 1) კონსორციუმი, რომლის შემადგენლობაშიც მიჩიგანის სახელმწიფო უნივერსიტეტი, მისურის უნივერსიტეტი, კალიფორნიის უნივერსიტეტის ლოს-ანჟელესის კამპუსი და საქართველოს აგრარული და თბილისის თავისუფალი უნივერსიტეტები შედიოდნენ და 2) ობურნის უნივერსიტეტი. უნივერსიტეტში სწავლა უკვე 2013 წლიდან იქნებოდა შესაძლებელი.