IDFI-ის ინფორმაციით ქეთევან კერესელიძე პარტიის შემომწირველებს შორის 2012 წელს ფიგურირებს და მან "ნაციონალური მოძრაობა" 30 ათასი ლარით დააფინანსა.
არსებული ინფორმაციით, "Sputnik"-ი თბილისის სამაუწყებლო ზონაში FM 101.4 სიხშირეზე გადაიცემა. ამ სიხშირის მფლობელი კი შპს „რ-რადიოა“, რომელიც საქართველოს კომუნიკაციების ეროვნული კომისიის ლიცენზიატია და ეთერში „რადიო მონტე კარლოს“ სახელით ვრცელდებოდა.
"შპს „რ-რადიოს“ დირექტორი ქეთევან კერესელიძეა. აღსანიშნავია, რომ კერესელიძე 2012 წელს „ნაციონალური მოძრაობის“ შემომწირველებში ფიგურირებს, ის პარტიას 30 ათასი ლარით დაეხმარა. „რ-რადიოს“ 61.5%-ს შპს „საზოგადოება მედია ინვესტ“ ფლობს. 38.5% კი შპს „ხიტ ეფ ემ“-ის საკუთრებაშია. თავის მხრივ „ხიტ ეფ ემ“-ის მფლობელი ნოდარ დარსაველიძეა, „საზოგადოება მედია ინვესტი“ კი ვახტანგ მგელაძის საკუთრებაშია. მასვე ეკუთვნის კომპანიები შპს „ჯენერალ პრომოუშენი“, შპს „მედია პროდაქშენს“, შპს „გლობალ მედია“ და შპს „პრესის სახლი“. შპს „რ-რადიოს“ საკუთარ ვებ-გვერდზე გამოქვეყნებული აქვს პროგრამული ბადე, რომლის მიხედვითად, საინფორმაციო გამოშვება ყოველ ხუთ წუთში ერთხელ გადის. რია ნოვოსტისთან საუბარში რადიოსადგურის რედაქტორი ანტონ ლასხიშვილი ირწმუნება, რომ კონტენტი ქართულ ენაზე გადაიცემა და ის პროპაგანტისტული არ იქნება. 2014 წლის 13 ნოემბრის მდგომარეობით, რადიო მონიტორინგის პერიოდი 14-17 საათები FM 101.4 სიხშირეზე „მონტე კარლოს“ სახელით რუსულენოვანი პროგრამა გადაიცემა. საქართველოს კომუნიკაციების ეროვნული კომისიის 2012 წლის 18 მაისის N369/6 გადაწყვეტილებით რადიოკომპანიას ლიცენზიის ვადა 2022 წლამდე გაუგრძელა. სალიცენზიო პირობების განსაზღვრისას გადაწყვეტილებაში მიეთითა, რომ შპს „რ-რადიო“ ვალდებულია: "მიიღოს ყველა ზომა პროგრამებში მოყვანილი ფაქტების ჯეროვანი სიზუსტის უზრუნველსაყოფად და დროულად შეასწოროს შეცდომები. უზრუნველყოს ფაქტების ზუსტი და სამართლიანი გაშუქება, ფაქტისა და აზრის მკაფიო გამიჯვნა და აზრის ავტორის იდენტიფიცირება, დაიცვას” მაუწყებლობის შესახებ” საქართველოს კანონით განსაზღვრული სხვა შინაარსობრივი ვალდებულებები." "მაუწყებლობის შესახებ" საქართველოს კანონის შესაბამისად მაუწყებლები ვალდებული არიან, მიიღონ ყველა ზომა პროგრამებში მოყვანილი ფაქტების ჯეროვანი სიზუსტის უზრუნველსაყოფად და დროულად შეასწორონ შეცდომები. ამავე კანონის 56-ე მუხლის შესაბამისად იკრძალება ომის ნებისმიერი სახით პროპაგანდა. ასევე იკრძალება ისეთი პროგრამების გადაცემა, რომლებიც რაიმე ფორმით რასობრივი, ეთნიკური, რელიგიური ან სხვაგვარი შუღლის გაღვივების, რომელიმე ჯგუფის დისკრიმინაციის ან ძალადობისკენ წაქეზების აშკარა და პირდაპირ საფრთხეს ქმნის. საქართველოს კანონმდებლობით და საქართველოს კომუნიკაციების ეროვნული კომისიის მიერ გაცემული სალიცენზიო პირობების შესაბამისად შპს „რ-რადიო“ ვალდებულებები პროგრამების შინაარსთან დაკავშირებით განსაზღვრულია. მიუხედავად აღნიშნული რეგულირებისა, რუსულენოვანი "სპუტნიკის" კონტენტის ტრანზიტული მაუწყებლობის შემთხვევაში დასადგენია, თუ როგორ მოხდება პროგრამული პრიორიტეტების დაცვა, განსაკუთრებით იმ პირობებში, როდესაც „რ-რადიოს“ სიხშირეზე სხვა კომპანიის კონტენტი გადაიცემა" - ნათქვამია IDFI-ის განცხადებაში.
ორგანიზაცია მოუწოდებს "რ-რადიოს", საკითხის მიმართ მომეტებული საზოგადოებრივი ინტერესის გამო მასსა და "რია ნოვოსტის" შორის გაფორმებული ხელშეკრულება გაასაჯაროვოს. IDFI საკუთარ განცხადებაში ასევე აღნიშნავს, რომ მნიშვნელოვანია განმარტება იმის შესახებ, თუ როგორ მოხდება სარედაქციო პრიორიტეტების დაცვის საკითხების კონტროლი, ასევე არასწორი ინფორმაციის კორექტირება და მისი უარყოფის გავრცელება.
აღსანიშნავია, რომ „რ-რადიოს“ 61.5% წილის ფლობაში შპს "გლობალ მედიაც" ფიგურირებს, რომლის თავდაპირველი დამფუძნებელი საზოგადოებრივი მაუწყებლის ყოფილი დირექტორი ლევან ყუბანეიშვილია.
ყუბანეიშვილი საზოგადოებრივ მაუწყებელს 2008 წლის აპრილიდან 2009 წლის ივლისამდე ხელმძღვანელობდა
