აღნიშნულის შესახებ ბაჩო ახალაიამ ჩვენების მიცემისას განაცხადა, რაც გირგვლიანის საქმეზე მსჯავრდებული პირებისთვის პრივილეგირებული მდგომარეობის შექმნას ეხებოდა.
„ჩემი მეუღლის ძმა იჯდა მე-8 საპყრობილეში და იმისთვის არ შემიქმნია პირობები და ვიღაც ნაძირლებს რატომ შევუქმნიდი?! ამის არც სურვილი მქონდა და არც საშუალება", - განაცხადა ახალაიამ.
რაც შეეხება იმას, ისხდნენ თუ არა ერთად სანდრო გირგვლიანის მკვლელობაში მსჯავრდებულები, ახალაიას თქმით, იგი მე-7 დაწესებულებას სტუმრობდა და იქ ვინც იყო, ყველა ჰყავს ნანახი.
„ხშირად დავდიოდი და ვათვალიერებდი, რადგან ნდობის ხარისხი ციხის თანამშრომლების მიმართ იყო დაბალი. მე რაც ნანახი მაქვს, ისინი ცალ-ცალკე ისხდნენ. ჟურნალისტებიც კი მყავდა შეყვანილი, რადგან გავრცელდა ინფორმაცია, თითქოს ისინი ისხდნენ ერთად და მე ჟურანლისტები შევიყვანე, რათა ენახათ", - განაცხადა ახალაიამ.
შეგახსენებთ, რომ საქმე ეხება ახალაიას სასჯელაღსრულების დეპარტამენტის უფროსად მუშაობის პერიოდს. პროკურატურის ცნობით, ბაჩო ახალიას ბრალი სანდრო გირგვლიანის მკვლელობაში მსჯავრდებულებისთვის ციხეში პრივილეგირებული პირობების შექმნაში ედება.
