სოხუმში, აფხაზეთის დე ფაქტო რესპუბლიკის ცენტრალური საარჩევნო კომისიის თავმჯდომარის, ბატალ ტაბაღუას სახლის ეზოში აფეთქება მოხდა. ინფორმაციას რუსული მედია ავრცელებს.
აფხაზეთის დე ფაქტო რესპუბლიკის შინაგან საქმეთა მინისტრის მოვალეობის შემსრულებლის, რაულ ლოლუას განცხადებით, აფეთქების შედეგად არავინ დაშავებულა. ასაფეთქებელი მოწყობილობის ტიპი ჯერ უცნობია.
24 აგვისტოს აფხაზეთის დე ფაქტო რესპუბლიკაში "ვადამდელი საპრეზიდენტო არჩევნები" გაიმართება. არჩევნებში მონაწილეობას მიიღებს ოთხი კანდიდატი – რაულ ხაჯიმბა, ასლან ბჟანია, ლეონიდ ძიაპშიბა და მერაბ ქიშმარია.
