ბათუმის იუსტიციის სახლში ცნობილი ქართველი მსახიობის რამაზ ჩხიკვაძის დაბადებიდან 85 წლის იუბილესადმი მიძღვნილ გამოფენას იუსტიციის მინისტრის პირველი მოადგილე დავით ჯანდიერი და ეროვნული არქივის გენერალური დირექტორი თეონა იაშვილი გახსნიან. ღონისძიება ხვალ გაიმართება.

როგოც "ინტერპრესნიუსს" იუსტიციის სამინისტრიოდან აცნობეს, გამოფენაზე წარმოდგენილი იქნება რამაზ ჩხიკვაძის თეატრალური და კინოროლების, რეპეტიციებისა და შეხვედრების ამსახველი ფოტოები.

ამავე უწყების ინფორმაციით, ეროვნული არქივის კინოფოტოფონოდოკუმენტების ცენტრალურ არქივში რამაზ ჩხიკვაძის რამდენიმე ასეული ფოტო ინახება. მათი ერთი ნაწილი მხატვრული ფილმების გადასაღებ მოედანს ასახავს. გარდა ამისა, არქივი ინახავს თეატრალური სპექტაკლების, რეპეტიციების, სხვადასხვა ღონისძიების ფოტოებს. გამოფენაზე დაცული ფოტოების ნაწილი დაცულია "საქინფორმის" კოლექციაში.

ქართული თეატრისა და კინოს მსახიობი რამაზ ჩხიკვაძე 1928 წლის 28 თებერვალს თბილისში, მუსიკოს გრიგოლ ჩხკიკვაძის ოჯახში დაიბადა. 1951 წელს დაამთავრა თეატრალური ინსტიტუტის სამსახიობო ფაკულტეტი. ამავე წლიდან რუსთაველის დრამატული თეატრის მსახიობი გახდა. რუსთაველის თეატრის სცენაზე განასახიერა მრავალი საინტერესო და დაუვიწყარი როლი: ლეანდრო (,,ესპანელი მღვდელი"), პეტრი პეტრუსი (,,როცა ასეთი სიყვარულია"), ქოსა მრჩეველი (,,ჭინჭრაქა"), მეკი დანა (,,სამგროშიანი ოპერა"), კასიანე (,,მზიანი ღამე"), თედო (,,ბებერი მეზურნეები"), აკოფ დარდიმანდიანცი (,,ხანუმა"), კირილე მიმინოშვილი (,,სამანიშვილის დედინაცვალი"), შოშია (,,საბრალდებო დასკვნა"), ყვარყვარე (,,ყვარყვარე"), აზდაკი (,,კავკასიური ცარცის წრე"), რიჩარდი (,,რიჩარდ III"), ლირი (,,მეფე ლირი").

რამაზ ჩხიკვაძე 70-ზე მეტ მხატვრულ ფილმშია გადაღებული. მათ შორის, "ჭრიჭინა", "წარსული ზაფხული" "ლონდრე", "თეთრი ბაირაღები", "ქალაქი ანარა", "ნერგები", "სოფლის აშიკი", "ნატვრის ხე", "თხუნელა".

ბათუმის იუსტიციის სახლში გამოფენა 23 აგვისტომდე გაგრძელდება.