მამუკა ივანიაძის განცხადების საფუძველზე მთავარმა პროკურატურამ გამოძიება დაიწყო. როგორც მთავარი პროკურატურის განცხადებაშია აღნიშნული, გამოძიება საქართველოს სისხლის სამართლის კოდექსის 335-ე მუხლით მიმდინარეობს.
"2013 წლის 11 ივლისს საქართველოს მთავარ პროკურატურაში, ბრალდებულ მამუკა ივანიაძის მიერ მასობრივი საინფორმაციო საშუალებებით გავრცელებული განცხადების საფუძველზე, რომელშიც უთითებს საქართველოს შინაგან საქმეთა სამინისტროსა და საქართველოს პროკურატურის თანამშრომელთა მხრიდან ჩვენების მიცემისას განხორციელებული ზეწოლის ფაქტზე, დაუყოვნებლივ დაიწყო გამოძიება საქართველოს სისხლის სამართლის კოდექსის 335-ე მუხლით.
შემჭიდროებულ ვადებში გამოძიების ჩატარების უზრუნველსაყოფად საქმეზე შექმნილია საგამოძიებო ჯგუფი და მამუკა ივანიაძის მიერ გავრცელებული ინფორმაციის დადასტურების შემთხვევაში მიღებული იქნება კანონშესაბამისი გადაწყვეტილება", - ნათქვამია მთავარი პროკურატურის განცხადებაში.
სოფლის მეურნეობის სამინისტროს დაკავებული მაღალჩინოსნების საქმეში ბრალდებულმა მამუკა ივანიაძემ დღეს, "საქართველოს ახალგაზრდა იურისტთა ასოციაციის" ოფისში გამართულ პრესკონფერენციაზე განაცხადა, მას სოფლის მეურნეობის მინისტრ დავით კირვალიძის წინააღმდეგ ჩვენების მიცემას აიძულებდნენ.
მისი განმარტებით, დაკავების შემდეგ მასზე ხორციელდებოდა სერიოზული ზეწოლა, საბოლოოდ კი ჩვენება პროკურორ გიორგი დავითაშვილის კარნახით დაწერა.
ივანიაძის ინფორმაციით, ის 1-ელ მაისს დააკავეს. ე.წ. მოდულის შენობაში შეყვანისას ოფიციალურად არ გაუფორმებიათ და როგორც უცხოელი ისე წარადგინეს. მისივე თქმით, ოთხი საათის განმავლობაში მასზე ზეწოლა მიმდინარეობდა და ადვოკატის ნახვის საშუალება არ მისცეს.
"მოდულის შენობაში შესვლიდან დაიწყო ჯოჯოხეთი. 12-მდე პიროვნება პერიოდულად შემოდიოდა, ვისაც რა უნდოდა შეგინებით, შეურაცხყოფით გრძელდებოდა ზეწოლა ოთხი საათის განმავლობაში. პერიოდულად, ვიღაც პიროვნება, რბილი ფორმებით, თითქოს ჩემზე ზრუნავდა, მირჩევდა რაღაც მეთქვა. ისინი მპირდებოდნენ, რომ თუ მივცემდი ჩვენებას, გამათავისუფლდებდნენ, თუ არადა - დამაპატიმრებდნენ", - განაცხადა მამუკა ივანიაძემ.
ბრალდებულის თქმით, სოფლის მეურნეობის ყოფილი მინისტრი დავით კირვალიძე მისი კლასელია და ჩვენების მიცემას მის წინააღმდეგ სთხოვდნენ, რაც სასჯელაღსრულების მე-8 საპყრობილეში გადაყვანის შემდეგაც გაგრძელდა. ივანიაძე ყვება, რომ ღამის საათებში, მე-8 საპყრობილეში პროკურორი გიორგი დავითაშვილი მასთან შეხვედრას მართავდა, საბოლოოდ კი, ჩვენება სწორედ გიორგი დავითაშვილის კარნახით დაწერა. "დავითაშვილი მკარნახობდა, მე ვწერდი", - აღნიშნა ივანიაძემ.
მისივე თქმით, ჩვენების პათოსი არასწორია და ჩვენება არც კი წაუკითხავს, ისე მოაწერა ხელი. ივანიაძის განცხადებით, როდესაც სასამართლო პროცესი გაიმართება, აღნიშნულ ჩვენებას აუცილებლად შეცვლის.
ბრალდებული ასევე განმარტავს, რომ ადვოკატ სოსო ბარათაშვილის აცილება მოთხოვნილი იყო პროკურატურის მხრიდან, თუმცა ჩვენების მიცემის პროცესს სახაზინო ადვოკატიც კი არ ესწრებოდა.
"საქართველოს ახალგაზრდა იუსრისტთა ასოციაციის" თავმჯდომარე კახა კოჟორიძე განმარტავს, რომ აღნიშნული საქმე თავიდანვე უამრავ კითხვას ბადებდა. მისივე თქმით, საქმეში სამი უწყების - პროკურატურის, სასამართლოსა და სასჯელაღსრულების დაწესებულების არასწორი ქმედებები იკვეთება.
კოჟორიძე განმარტავს, რომ პროკურატურის ბრალდების არსი აბსურდულია, სასამართლოს განჩინებები – დაუსაბუთებელი, საქმეში კი იკვეთება სასჯელაღსრულების სამინისტროს არასწორი მოქმედება.
კოჟორიძის თქმით, დაკავებულ ივანიაძეს ე.წ. მოდულის შენობაში აგინებდნენ, მის თვალწინ იარაღს ტენიდნენ და თუკი დავით კირვალიძის წინააღმდეგ ჩვენებას არ მისცემდა, უებნებოდნენ, რომ ციხეში ყოფნა დიდი ხნით მოუწევდა. მისივე ინფორმაციით, დაკავებულს უხსენებდნენ ოჯახის წევრებს და მინიშნებას აკეთებდნენ მის სტუდენტ გოგონაზე.
საიას ხელმძღვანელის ინფორმაციით, საკანში მამუკა ივანიაძეს სამი უცნობი პატიმარი დახვდა, რომლებმაც ჩხუბის ინსცენირება მოახდინეს. ერთ-ერთმა მათგანმა ხელი გაიჭრა და სისხლი კედელს წაუსვა, მოგვიანებით ადმინისტრაციის თანამშრომლებმა ფაქტი დააფიქსირეს, რის შემდეგაც პროკურორმა გიორგი დავითაშვილმა ივანიაძეს უთხრა, რომ ჩხუბთან დაკავშირებით, შესაძლოა მას სასჯელი დამატებოდა.
მამუკა ივანიაძე ეჭვობს, რომ დავით კირვალიძის წინააღმდეგ ჩვენების მიცემას შიდა პოლიტიკური დაპირისპირების გამო აიძულებდნენ. ბრალდებული 2 ივლისს 10 000-ლარიანი გირაოს საფუძველზე გაათავისუფლეს. საქმესთან დაკავშირებით, პატიმრობაში რჩება 5 პირი, გირაოთი გათავისუფლებულია 3 ადამიანი, ხოლო სამინისტროს ერთი თანამშრომლის კონსტანტინე ხუცაიძის სასამართლო პროცესი ახლა მიმდიანრეობს.
ივანიაძის განმარტებით, გუშინ "ახალგაზრდა იუსრისტთა ასოციაციაში" ამავე თემაზე დაგეგმილი პრესკონფერენცია რისკების არსებობიდან გამომდინარე არ გაიმართა.
