ირაკლი ღარიბაშვილი:

ირაკლი ღარიბაშვილი: "პრეზიდენტისა და სხვა უმაღლეს თანამდებობის პირთა დაცვით ღონისძიებას არა შსს, არამედ სდსს ახორციელებს"

შს მინისტრის ირაკლი ღარიბაშვილის განცხადებით, პრეზიდენტისა და სხვა უმაღლეს თანამდებობის პირთა დაცვით ღონისძიებას არა შსს, არამედ სახელმწიფო დაცვის სპეციალური სამსახური ახორციელებს.

როგორც ღარიბაშვილმა დღეს სამინისტროში დიპლომატებთან შეხვედრისას განაცხადა, 8 თებერვალს ეროვნულ ბიბლიოთეკასთან მომხდარი ინციტენტის დროს, სახელმწიფო დაცვის სპეციალურმა სამსახურმა ასეთი შემთხვევებისთვის აუცილებელი ღონისძიება არ გაატარა.

ღარიბაშვილის თქმით, სახელმწიფო დაცვის სპეციალური სამსახურმა, რომელიც საქართველოს პრეზიდენტის იურისდიქციის ქვეშ მყოფი სამოქალაქო სტრუქტურაა, გასული წლის ოქტომბრიდან მოყოლებული შსს-სთან კავშირი პრაქტიკულად გაწყვიტა, რაც ღარიბაშვილის შეფასებით, "მიუღებელი და საფრთხის შემცველი პროცესია".

ღარიბაშვილის თქმით, სახელმწიფო დაცვის სპეციალურ სამსახურს ძალოვან უწყებებთან ერთად უნდა შეემუშავებინა ერთობლივი დაცვითი ღონისძიებების უზრუნყველსაყოფად ერთჯერადი გეგმა, ასევე არ განხორციელებულა ერთობლივი ჯგუფის მიერ ობიექტის წინასწარი მონახულება, რომლის დროსაც უნდა განსაზღვრულიყო პოლიციის სამოქმედო არეალი და ასევე ქალაქის მერიიდან დაცვითი ჯებირები არ გამოუთხოვია.

"სახელმწიფო დაცვის სპეციალურმა სამსახურმა მხოლოდ 15:00 საათისთვის ჩვენგან მოითხოვა საპატრული პოლიციის ერთი ეკიპაჟი და რაიონულ პოლიციელთა ადგილზე გამოცხადება. ჩემი ბრძანების თანახმად, მე ერთის ნაცვლად 55 საპატრულო ეკიპაჟი გავგზავნე და დაახლოებით 100-მდე ქალაქის პოლიციის მთავარი სამმართველოს და ცენტრალური კრიმინალური პოლიციის თანამშრომლები, ჯამში 200 პოლიციელი. ჩვენ 2 საათში ფორსმაჟორულ სიტუაციაში შევძელით მობილიზება და ორი კორიდორის გაკეთება, რისთვისაც მინდა, ყველა იქ მყოფ პოლიციელს მადლობა გადავუხადა", - განაცხადა ღარიბაშვილმა.

მან დიპლომატებს უჩვენა ვიდეო-მასალა და კადრები, რომელშიც ასახული იყო 8 თებერვალს ეროვნულ ბიბლიოთეკასთან მომხდარი ინციდენტი.

ღარიბაშვილის თქმით, გამოძიება იმ დღესვე დაიწყო, დაკავებულ იქნა 4 ადამიანი და დაიკითხა 43 მოქალაქე. როგორც მინისტრმა განაცხადა, კადრებიდან ნათლად ჩანს, რომ ქალაქის მერი და საპარლამენტო უმცირესობის წარმომადგენლები როგორ აყენებენ დემონსტრანტებს სიტყვიერ და ზოგჯერ ფიზიკურ შეურაცხყოფასაც.

ამასთან, მინისტრმა მოუწოდა ქალაქის მერს და საპარლამენტო უმცირესობის წევრებს, რომ პატივი სცენ კანონის უზენაესობას, დაივიწყონ თანამდებობრივი ამბიციები და კანონით დადგენილი წესით ითანამშრომლონ გამოძიებასთან.

"არ დავუშვებთ, რომ ქვეყანაში პრივილეგირებულთა კასტა ჩამოყალიბდეს", - განაცხადა მინისტრმა დიპლომატებთან შეხვედრაზე 8 თებერვალს ეროვნულ ბიბლიოთეკასთან მომხდარ ინციდენტებზე საუბრისას.