"საქართველოს ლეიბორისტული პარტიის" პოლიტიკური კომიტეტის წევრებმა საგანგებო განცხადება გააკეთეს და პარტიის რიგები დატოვეს. როგორც "ინტერპრესნიუსთან" ექსკლუზიურად "ლეიბორისტული პარტიის" პოლიტიკური კომიტეტის წევრებმა განაცხადეს, ისინი ტოვებენ პარტიის რიგებს.
კერძოდ, "ლეიბორისტული პარტიის" პოლიტიკურ კომიტეტში 8 წევრია, რომელთაგან ექვსმა დატოვა პარტია.
რაც შეეხება პარტიის სამდივნოს, 6 წევრიდან ხუთმა "ლეიბორისტული პარტია" დატოვა.
ამ დროისთვის თავისი პოზიცია არ დაუფიქსირებია "ლეიბორისტული პარტიის" პოლიტიკურ მდივან გიორგი გუგავას.
იმ პირებმა კი, რომლებმაც "ლეიბორისტული პარტია" დატოვეს, გაავრცელეს საგანგებო განცხადება, რომელსაც "ინტერპრესნიუსი" უცვლელად გთავაზობთ:
"საქართველოს ლეიბორისტული პარტიის პოლიტიკური კომიტეტის განცხადება.
ჩვენთვის ცნობილი გახდა, რომ მიმდინარეობდა და, სამწუხაროდ, დღემდე გრძელდება მოღალატე, გამყიდველი პოლიტიკოსების "ნაციონალური მოძრაობის" მეხამრიდად გამოყენება. "ლეიბორისტული პარტიის" პოლიტიკური კომიტეტის უმრავლესობა ერთგული, მებრძოლი აქტივის პატივისცემის მიუხედავად, ვემიჯნებით პარტიის თავმჯდომარეს და ვტოვებთ პარტიის რიგებს. ამასთანავე ვაცხადებთ, რომ ვაგრძელებთ ბრძოლას, ვქმნით ახალ ოპოზიციურ პოლიტიკურ პარტიას და ვრჩებით ჩვენი პოლიტიკური პრინციპების ერთგულნი", - აღნიშნულია განცხადებაში.
აღნიშნულ განცხადებას ხელს აწერენ პოლიტიკური კომიტეტის წევრი, გენერალური მდივანი იოსებ შატბერაშვილი; პოლიტიკური კომიტეტის
წევრი იდეოლოგიური მდივანი კახაბერ ძაგანია; პოლიტიკური კომიტეტის
წევრი, აღმასრულებელი მდივანი პაატა ჯიბლაძე; პოლიტიკური კომიტეტის წევრი საორგანიზაციო მდივანი კონსტანტინე გუგუშვილი; პოლიტიკური კომიტეტის წევრი რეგიონალური მდივანი გიორგი მთვარელიძე და პოლიტიკური კომიტეტის წევრი აპარატის უფროსი დავით ვერძეული.
საქართველოს "ლეიბორისტული პარტია" პოლიტიკური კომიტეტის წევრების მიერ გაკეთებულ განცხადებასა და მათ მიერ პარტიის რიგების დატოვებას ეხმაურება. "ჩვენ საზოგადოება თავის დროზე არაერთხელ გავაფრთხილეთ, რომ პრემიერი ივანიშვილი ყველა თავისი რესურსით და სპეცსამსახურით ცდილობს მისგან უმართავი და დაუმორჩილებელი "ლეიბორისტული პარტიის" დაშლას ან დისკრედიტაციას.
სამწუხაროა, რომ როგორც ვვარაუდობდით ამ ანკესს წამოეგო პარტიის რამდენიმე აქტივისტი. ნაწილი არჩევნებამდე, ხოლო პატარა ჯგუფი დღეს.
"ლეიბორისტული პარტია" ჩვეულებრივ რეჟიმში აგრძელებს უკომპრომისო ბრძოლას ივანიშვილ-სააკაშვილის მჩაგვრელი რეჟიმის წინააღმდეგ და არ არსებობს ძალა, რომელიც ამ მიზანზე ხელს აგვაღებინებს", - ნათქვამია "ლეიბორისტული პარტიის" მიერ გავრცელებულ განცხადებაში.
