თბილისის საქალაქო სასამართლო თავდაცვის მინისტრის ყოფილი მოადგილის, დათა ახალაიას და კუდ-ის სხვა ყოფილი მაღალჩინოსნებისთვის აღმკვეთი ღონისძიების შეფარდების საკითხზე იმსჯელებს.
ახალაიას ადვოკატის ირაკლი ზაქარეიშვილის განცხადებით, იგი მოითხოვს, რომ თავდაცვის მინისტრის ყოფილ მოადგილეს აღმკვეთი ღონისძიების არცერთი სახეობა არ შეეფარდოს.
სასამართლო პროცესი 11:00 საათზეა ჩანიშნული.
ცნობისთვის, თავდაცვის მინისტრის ყოფილ მოადგილეს დათა ახალაიას, შსს სამინისტროს კუდ-ის დირექტორის მოადგილეს სოსო თოფურიძეს, ოლეგ მელნიკოვს და გერონტი ალანიას ბრალი სისხლის სამართლის კოდექსის რამდენიმე მუხლის შესაბამისად დაუსწრებლად წარედგინათ.
საქმე ეხება მთაწმინდა-კრწანისის შს სამმართველოს მუშაკთა ცემის ფაქტს.
აღნიშნული დანაშაულისთვის დათა ახალაიას ბრალი სსკ-ის 143-ე მუხლის მე-2 ნაწილით (თავისუფლების უკანონო აღკვეთა), 144/1 მუხლის მე-2 ნაწილით (წამება) და 333-ე მუხლის მე-3 ნაწილით (სამსახურეობრივი უფლება-მოსილების გადამეტება) წარედგინა.
იოსებ თოფურიძეს, გერონტი ალანიას და ოლეგ მელნიკოვს ბრალი სსკ-ის 144/1 მუხლის მე-2 ნაწილით (წამება) და 333-ე მუხლის მე-3 ნაწილით (სამსახურეობრივი უფლება-მოსილების გადამეტება) წაუყენეს.
